من وقت للتاني اكيد بتحبي تغيري من استايلك ومفيش افضل من صبغ شعرك هيساعدك علي كدا ، لان الصبغه بتغير تماما من استايلك وبتخليكي تحسي براحه نفسيه وتديكي طاقه لبكرا ، بس بالتأكيد لازم تحسني اختيار نوع الصبغه بحيث تكون طبيعيه بنسبه كبيره وملهاش اي اثار جانبيه علي شعرك فيما بعد ، الي جانب تتديكي نفس اللون اللي هيتماشي مع لون بشرتك .

وتعتبر من أفضل الصبغات الموجوده حاليا وكلها مكونات طبيعيه بنسبه كبيره جدا هي ” صبغه غارنييه ” الي جانب نعومتها الشديده علي شعرك وهتحسي بدا وانتي بتعمليها ، والمده المحدده ليها علي شعرك ” شهرين ” ودي فتره زمنيه كويسه جدا لان طول ما بتستمر الصبغه في شعرك بترهقه جدا وبتأثر علي الفروه وبالتالي هتتعرضلي لتساقط الشعر عاجلا او اجلا .

لذلك هنعرفك عن طريق خطوات بسيطه وسهله أزاي تصبغي شعرك بصبغه غارنييه وتظهري بأستايل مميز جدا :

زي ما بتحطي مرطبات علي بشرتك قبل وضع الميكب أب ، لازم بردو تخلي الشعر مستعد كويس جدا قبل الصبغه ، وهتقدري تعملي دا عن طريق غسل شعرك جيدا بيوم او يومين قبل الصبغه ودا هيتم بدون اي مواد كيمائيه كالشامبو وغيره ، وبكدا هتحافظي علي الزيوت اللي بتفرزها فروه رأسك وبالتالي هتحافظي علي ثبات الصبغه في شعرك .

في البدايه هتشتري صبغه غارنييه من اي صيدليه ولازم تختاري لون يليق علي بشرتك علشان تظهري بشكل كويس ، وبعد ما بتشتريه تعملي الآتي :
_ جهزي طبق بلاستيك صغير .
_ فرشاه للصبغه ( هتقدري تجبيها من اي متخصص لأدوات التجميل )
_ فرغي أنبوبه الصبغه مع الكريم اللي هيساعد علي ظهور اللون في الطبق ، وقلبيهم كويس جدا بفرشاه الصبغه .
_ البسي حافظ الايد البلاستيك الموجود مع الصبغه بداخل العلبه ( جوانتي ) ، علشان متعرضيش أيدك لاي ألوان وتحميها .

لازم تسرحي شعرك كويس جدا ويفضل بمشط اسنانه واسعه او فرشاه عريضه علشان تفرقي خصل شعرك من بعضها وبالتالي عند وضع الصبغه هتقدر تخلل لجميع شعرك ، وقومي بتقسيم شعرك لاربعه اجزاء وثبتي كل جزء كويس .

لازم قبل ما تحطي الصبغه علي شعرك تتدهني كويس بفازلين طبي عند منابت شعرك ومنطقه الرقبه والاذن علشان تحمي جلدك من الصبغه وميتعرضش للألتهاب أو الحرق فيما بعد ، وحطي فوطه علي رقبتك علشان متعرضيش لبسك لاي ألوان .

أبداي اصبغي خصله بخصله عن طريق فرشه الصبغه ولازم تصبغيه من الجذور الي الأطراف وتستمري بصبغ شعرك كله بهذه الطريقه ، وهتقعدي حوالي ربع ساعه في صبغه ، وبعد ما تخلصي دلكي شعرك بأطراف صوابعك كويس جدا لمده خمس دقاديق أو اكثر علشان تساعدي الصبغه تتخلل لجميع شعرك ويبقي الشعر كله بنفس اللون .

بعد ما بتنتهي من تدليك شعرك بنعومه ، قومي بتغطيته بطاقيه الشعر أو كيس بلاستيك لو مش متوفره عندك وأبداي احسبي نص ساعه بالظبط ، ولازم متعديش الوقت دا لان الصبغه ممكن تسبب ضرر كبير لشعرك لو حطيتها لفتره طويله ، لذلك أحسبي الوقت بعد أخر خصله بتصبغيها .

جهزي مايه دافيه واغسلي بيها شعرك لحد ما اللون كله ينزل منها ، وهتعرفي دا لما تشوفي المايه وهي بتنزل من شعرك بلونها الطبيعي ، وأتركي شعرك لمده ساعه بالظبط ينشف من الصبغه وبعده أغسليه بالبلسم الخاص بيكي علشان ترطبيه كويس . وهتشوفي اللون اللي اديته لشعرك بعد ما ينشف تماما .

لو شعرك جاف وقررتي تصبغيه ، لازم تبدأي ترطبيه وتنعميه كويس باسبوع قبل الصبغه .
غسل الشعر كتير بيدمره الي جانب انه هينزل الصبغه من شعرك بشكل سريع ، فأكتفي بغسله بالشامبو والبلسم الخاص بيكي مرتين اسبوعيا .
بلاش تصبغي شعرك باستمرار أكتفي بمره كل 6 شهور علشان متدمريش فروه راسك .