الجواز في الاصل مبيتطلبش اكتر من موافقة العروسه و والد العروسة علي تزويجها من الشاب اللي اتقدم للزواج في وسط حضور الناس في العلن و الاشهار ، مش محتاج لكل الترتيبات الكبيره والمبالغ فيها بشكل ضخم من القاعات الضخمه للتجهيزات اللي مبتخلصش للقصص الاسطوريه اللي بدل ما يحطها الناس كوسيلة للاحتفال خلوها عقبة بتمنع الجواز وبتهد جوازات من قبل ما تبتدي او تكون سبب دين الشاب لفترة طويلة جدا لبعد الجواز فبقت بمثابة قانون واجب التنفيذ وعرف لا يجوز الخروج عنه وبقت عبئ وقيد علي الشباب وعلي والد العروسه .

لو فكرنا ان من الاساس الهدف الرئيسي للجواز انه يجمع شخصين في بيت واحد عشان يكملوا حياتهم مع بعض تحت موافقة الاهل ، و مع الارتفاع اليومي المبالغ فيه للاسعار ومع الظروف الحالية اللي بيمر بيها معظم الشباب فالخيار الافضل هو التيسير والتبسيط وعدم المبالغة في اي شئ .

اعملي حفلة علي الضيق بين الاسرتين ببيتك لو كان يسمح وكام صديق ليكوا من المقربين ، و استعيني بصحباتك يوم الخطوبة عشان تحضروا البيت مع بعض بالزينه والديكورات البسيطه المخصصه للخطوبات وتجهزوا كل ترتيبات الخطوبة.
لو مش متاح انك تعملي الخطوبة في البيت ممكن تعمليها في كافيه او ببيت اي حد من قرايبك او الناس المقربين منك او أي مكان مفتوح قريب منك ينفع للخطوبه مع بعض التجهيزات البسيطه اللي هتضفيها للمكان اللي هتعملوا بيه الاحتفال .

مش لازم تجيبي طقم دهب كامل او شبكة كبيرة كامله عشان الناس تتفرج عليها في بلاد كتير جدا متحضره بره مصر بيحيبوا خاتم زواج فقط ، استبدلي الشبكة الكبيرة بخاتم زواج هيقضي نفس غرض الشبكة ومتهتميش لكلام الناس او انتقادتهم الناس دايما بتنتقد وبتتكلم حتي لو جيبتي شبكة كامله بردو هيتكلموا

او جيبي طقم كامل فضة والفضة كمان بتحتفظ بقيمتها زي الدهب وشكلها جميل ،بلاش نتمسك بعادات بتوقف حياتنا مش بتسهلها.

اسعار الدهب يوميا بقت بتزيد بشكل كبير جدا وبقت الشبكة من ضمن الحاجات اللي بتخلي اي شاب مش قادر يتقدم للبنت اللي عاوز يتجوزها لان الاهل بيطلبوا منه شبكة معينة بمواصفات معينه عشان يجيبها هيحتاج مش اقل من سنة عشان بس يوفر تمن الشبكة غير بقيت تجهيزات الجواز ،الشبكة في الاصل هي هدية من العريس للعروسه علي اد امكانياته سواء يقدر يوفر شبكة غالية او سواء يقدر يوفر خاتم فقط فكل الاديان تحث علي التيسير في الزواج .

في قطع كتير جدا في العفش مبتبقاش مهمة ومبتستخدمش غير كل فترة طويلة جدا ممكن تختصريها من الجهاز او تشتري بدلها قطع تانيه هتحتاجيها اكتر

زي السفره ممكن تستبدلها بترابيزه صغيره وكراسي .،وفيه منها حاجات كتير مودرن شكلها شيك وحلو جدا وفكرتها بسيطه ومش مكلفة وبتوفر مساحة كبيرة في الشقة .
استبدلي غرفة الاطفال الكامله بغرفة ليفينج كنبها مجهز انو يتفتح سراير فهتقدري تستغلها كلفينج وكغرفة نوم او تستبدلي غرفة الاطفال الكامله بسرير صغير مش هتحتاجي غيره قبل اول 6 سنين علي الاقل من الجواز
استبدلي النجف الكريستال الضخم والغالي بالنجف المودرن الصغير ، هيديكي الشكل والاضاءة اللي انتي محتاجها وسعر نجفه كرستال واحدة بيعادل 4 نجفات من النجف المودرن .
مش لازم نيش ، النيش من الحاجات اللي في الغالب تكلفتها عالية جداا وغالبا مبيستخدمش كتير او مبيستخدمش معظم القطع اللي جواه استبدليه باي قطع تانيه تحتاجيها او اختصريه تماما من الجهاز
الرفايع وحاجات المطبخ ، في الغالب بنشتري كم كوبايات واطباق وحلل ومفروشات تكفي قرية كاملة عمرنا ما بنستخدمها بس لمجرد التفاخر او المبالغة الغير مقصوده احيانا من الاهل بحجة انها متبقاش اقل من حد غيرها او محرومه من حاجه اشتري علي اد الحاجات اللي هتحتاجيها وتستخدميها والحاجات اللي هتحتاجيها في المستقبل بعد سنين طويله ابقي اشتريها في المستقبل .

بدل ما اصحابك يشترولك هدايا مش هتحتاجيها جهزي قائمه فيها الحاجات اللي ناقصاكي ومحتاجينها او لسه مشتريتهاش ، ممكن تقترحيها عليهم لو كانوا مقربين منك يشتروها بدل الهدايا المكرره

في معارض بتعمل سنويا في اوقات معينة من السنه بتبقي مجمعة جميع كل شركات الاثاث وعاملة تخفيضات 60%ل70% بيبقي اسعارها افضل بكتير من محلات الاثاث طول السنه ، اعرفي مواعيدهم وانزلي اشتري في التخفيضات
ممكن تشتري العفش من اماكن اسعارها بتبقي مناسبة ورخيصة زي المناصرة بوسط البلد او طنان ..الخ
ممكن تشتري عفش خشب صيني اسمه mdf جودته كويسه واسعاره افضل بكتير من الخشب الزان
الرفايع ممكن تشتريها من اماكن اسعرها افضل بكتير من المحلات والمولات زي حمام التلات حارة اليهود الخ .. ممكن تشتري كل الحاجات اللي نقصاكي بسعر جملتها

في حاجات بسيطه في تجهيز الشقه ممكن تقوم بيها بسهوله هتختصرلك مصاريف كتير جدا وكمان ممكن تستعين ببعض اصحاب ليك يساعدوك وهيبقي الموضوع ممتع و في نفس الوقت هيوفرلك مبالغ كبيره زي دهان الشقة تقدر تعمله بنفسك بسهولة وكمان في فيديوهات علي اليوتيوب ممكن تساعدك في ده

الميكب ارتست او الكوافير من الحاجات اللي بقت اسعارها مبالغ فيها جداا وبيحملك و بيحمل العريس الافات ممكن تساعدكوا في حاجات تانيه ،طبيعي انك تحلمي انك تكوني اجمل عروسه اليوم ده .. او تطلعي باحسن شكل ليكي بس انتي تقدري تعملي ده عن طريق حد من صحباتك اللي بيعرفوا يحطوا ميكب كويس واشتري ميكب نوعيته كويسه او ماركة كويسه هيطلع الشكل الانتي عايزاه وهيبقي عندك الميكب نفسه تستخدميه بعد الجواز لفتره طويلة
اتعلمي تعملي ميكب لنفسك عن طريق فيديوهات قصيرة علي اليوتيوب هتعلمك كل اللي هتحتاجيه مع ماتريال ميكب كويسه هيطلع شكلك حلو جدا يوم فرحك

دلوقتي في جروبات كتير جداا علي الفيس بوك لفساتين عرايس بيبعوها او بياجروها بسعر اقل بكتير من المحلات بعد ما استخدموها مره واحده بس تقدري تعملي سيرش علي اكتر من جروب وتشوفي اكتر من فستان وتختاري ما بينهم ممكن كمان تفصلي الفستان هيتكلف اقل من تاجيره او شراه من محل او مول.

اعملي فرح في مكان مفتوح زي جناين فلل المريوطية او الهرم وسقارة اسعارهم اقل بكيتر من القاعات الدارات الغالية وهتقضي الغرض ،و كمان من الحاجات اللي ممكن تقتصر معاكي مبلغ كبير من الفرح الاوبن بوفيه تقدري تسبيدليه بطبق صغير لكل فرد .

متصعبوش الخطوات ، الجواز اساسه التيسير .
*ممكن تكملي حاجات نقصاكي بعد الفرح عادي جدا
*متبوظيش الجوازه عشان النيش
مش لازم تحققي كل احلامك يوم الفرح لسه العمر طويل
*الخطوبة مش لازم تكون في قاعة
اختيار الزوج اهم من التفاصيل التانيه الكتير
*الجوازة مش هتقف من غير ال 30 لحاف وال 70 مفرش