من اقوى الاسباب اللي بتأثر علي التركيز والصحة الجسدية والنفسية هي المواقف السلبية و البايخة اللي بنمر بيها وبتتراكم علينا من غير ما نتخلص منها وعشان نقدر ننسى المواقف البايخة دي لازم نعرف الطريقة المناسبة كالتالي:

خطوات التخلص من المواقف المحرجة والسيئة

  • اتخلص منها أول بأول

عشان متتراكمش عليك افكار كتير سيئة وتحمل عقلك الباطن أكثر من اللازم ويرجع عليك بالسلب زي انك تشوف كوابيس اثناء نومك او يبدا يظهر عليه أعراض مرضية غالبا بتظهر عن طريق أمراض في المعدة والقولون و ضغط الدم وفقد الشهية واحيانا الاكل الزايد عن اللزوم وبردو بيترتب عليه امراض او تعب في أعصاب الجسم وده لان العقل بيبدا يدافع عن نفسه لأنه بيترجم المواقف السيئة اللي انت مش قادر تنساها علي أنها خطر بيهددة فبيحاول يدافع عن نفسه أنه يلهيك عن التفكير فيها عن طريق التعب الجسدي اللي بيبدأ يظهر عليك وعشان تقدر تتخلص منها لازم متخليش مواقف يتراكم علي موقف لحد ماتوصل للمرحلة دي اتخلص منها دايما عن طريق الاتي :

1-احكيها لحد بتثق فيه

2-لو مفيش حد تحكيله ابدا فرغها من عقلك علي ورق وقطعه

3-لو هي مشكلة وفي امل انها تتحل ابدا خد خطوات إيجابية وحلها

4-ولو هي عيب فيك اتعلم منه وارميه ورا ضهرك

6-اشغل تفكيرك بحاجات تانيه عشان تصرف عقلك عن التفكير فيها وتساعد نفسك تنساها اكتر بعد ما تفرغها علي الورق أو تحكيها لحد

  • استبدل الفكرة السيئة بفكرة إيجابية

حاول دايما تفتكر ايجابيات الموقف وتتعلم منه وتاخده من الناحية الايجابية اللي هتطلع بحياتك لقدام مش ترجع بيك لورا ولازم هتقدر تطلع الحكمة من كل موقف سئ حصل معاك ولازم هتلاقي مهما كان الموقف بايخ

  • فكر نفسك ان الموقف انتهى

دايما فكر نفسك ان الموقف خلص وعدي وانتهي والتفكير فيه مش هيرجع ولا هيغير حاجة فيه اللي تقدر تغيره هو اللي جاي اللي هيكون بنفس السلبية لو فضلت عايش في اللي فات

  • ابعد عن دور المظلوم

طول مانت عايش في مواقف الماضي اللي بتألمك ومش شايف غير انك مظلوم مع ان اوقات فعلا بتكون مظلوم وفي الاغلب بتكون عملت خطأ ولو بسيط ,ركز دايما علي أخطائك واشتغل عليها بدلا من تفكيرك في ظلم اللي حواليك لو قادر تغير حاجه غيرها لو مش قادر يبقى حول الموقف لحاجة تقويك مش تضعفك لان احساسك بالظلم دايما هيضعف منك ويخليك انسان سلبي

  • الحاضر أهم من الماضى

الخطأ اللي بيقع فيه كتير من الناس انه بيفصل الماضي عن الحاضر و المستقبل والحقيقة انهم مرتبطين ببعض ارتباط قوي جدا لان تاثير الماضي عليك بيمثل الحاضر بتاعك واللي بتعمله عشان مستقبلك يكون افضل وفي الغالب لما بتفضل فاكر مواقف حصلت ضايقتك أو آلمتك مبتقدرش تشتغل كويس عشان تحسن مستقبلك ولا تستمتع بالحاضر بتاعك عشان كده حاول تبص للي حصل في الماضي نظره افضل او تتغلب عليها ولما تفتكره احمد ربنا انه عدي وانتهي وانك في حال أفضل

نصائــــح

  • دور دايما عن الأخطاء بتاعتك وبطل تبص علي اخطاء الاخرين ساعتها هتغير نظرتك لأي موقف ضايقك بسهولة
  • حاول دايما تلتمس الأعذار لان مفيش حد خالى من العيوب وان بتغلط كتير و هتحتاج تلاقي اللي يسامحك