لما الرخصة بتضيع وتحب ترجعها تاني إجراءاتها بتختلف شوية عن إجراءات استخراجها اول مره وعشان تتجنب تضيع الوقت قبل ماتبدأ في الإجراءات هنقولك الخطوات بالترتيب والاوراق المطلوبة عشان تقدر تعمل بدل فاقد .

اعمل محضر بالمركز الخاص برخصتك بفقد الرخصة برقم رخصتك القديمة ده في حالة ان كانت رخصتك لسه سارية وعايز تروح تطلع بدل فاقد ليها وتاخد باقي المده المتبقية ليك في رخصتك .

روح ادارة المرور ومعاك المستندات التاليه :-

1-محضر فقد الرخصة .

2-صورة شخصية .

3-ملف رخصة خاصة و هتلاقيه في اي مكتبة قدام إدارة المرور .

4-البطاقة الشخصية ولازم تكون سارية .

5-صورتين من البطاقة الشخصية .

6-قيمة استخراج بدل الفاقد 25 ج ونموذج 56 من الخزنة وتمنه 6 جنيهات .

روح امضي محضر الفقد من مكتب الضبط بإدارة المرور عشان يتأكدوا ان الرخصة مش مسحوبة منك ، وبعد كده تروح للموظف على شباك استخراج بدل فاقد للرخصة الخاصة والموظف هيستلم منك الورق وياخد بياناتك وتتصور وتستلم الرخصة في نفس اليوم .

في حالة كانت رخصتك منتهية المدة بردو هتروح تعمل محضر فقد في القسم الخاص بيك بس هتروح تطلع شهادتين باطنة ونظر من أي مستشفى حكومي ولازم تاخد معاك صورتين شخصيتين ورسوم استخراج الشهادتين هيتكلفوا 50ج وبتعملهم عشان هتاخد مدة جديدة للرخصة لانك بتكون بتعمل بدل فاقد وتجديد في نفس الوقت يعني لمدة 10 سنين جداد ، يعني هتاخد معاك :-
صورة شخصية حديثة
البطاقة الشخصية وصورة منها ولازم تكون البطاقة الشخصية سارية .
ملف للرخصة الشخصية من اي مكتبة .
هتروح تتصور وتاخد الرخصة الجديدة بمدة 10 سني

شهادات الباطنة والنظر لازم تكون من اي مستشفي حكومية ولو عملتها من عند أي دكتور أو مستشفى خاصة مش هتقبل وتضطر ترجع تعمل واحده جديده من اي مستشفي حكومية عشان يتأكدوا من اعتمادها لأنها بتكون مختومة بختم النسر .

في حالة ان البطاقة اتسرقت مع الرخصة فلازم تعمل بدل فاقد للبطاقة قبل ما تروح تعمل بدل فاقد للرخصة لان لازم تاخذ البطاقة الشخصية معاك في وقت استخراج بدل الفاقد للرخصة بالذات لانك هتحتاجها في الاجراءات .

لما بتروح تطلع بدل فاقد الموظف بيطلعلك الملف القديم بتاعك من الارشيف الاول وده إجراء اوقات بياخد وقت واوقات تانية مبياخدش عشان تكون عامل حسابك ولازم يكون معاك رقم الملف عشان يقدر يطلعه غالبا بيكون مكتوب على ضهر الرخصة ولو متعرفوش اول ماتروح المرور هتروح مكتب الكمبيوتر تطلب منهم يطلعوا رقم الملف بتاعك من على الكمبيوتر .

مجرد ما تخلص الاجراءات تتجه لغرفة الكمبيوتر عشان تتصور وتاخد رخصتك وده في الغالب بياخد نص ساعة او ساعة بالكتير لو في زحمة .

-لازم يعدي على محضر فقد الرخصة 7 أيام قبل البدء في إجراءات استخراجها .
وقت العمل في الإدارة بيكون من 8 ل 2 ،حاول تروح بدري من 9 ل1 عشان تضمن تخلص ورقك بسهولة ولان الخزنة غالبا بتقفل قبل المعاد الرسمي لانها بتكون بتعمل جرد لليوم