علشان عارفين إنك زي أي عروسة جديدة بتعملي علي الأقل 3 أيام في الإسبوع مكرونة بالصلصة و بانيه (و بقية الايام بتاكلوا عند مامتك أو مامته) ، قررنا نقدملك فكرة أكلة جديدة بنفس المكونات (مكرونة ، طماطم و بانيه) و زيادة عليها شوية مكونات بسيطة و سهل تشتريها زي الريحان و السبانخ .

وصفة النهاردة هي المكرونة بالسبانخ و الفراخ ،و ده طبق خفيف و صحي من المطبخ الإيطالي المعروف بتميزه في أطباق المكرونة بكل أشكالها ، و ممكن تقدمي الطبق في الغداء أو العشاء مع سلطة خضراء بس من غير ما تتعبي نفسك في التفكير في طبق جنبه لأن الوجبة متكاملة غذائيا فيها النشويات و البروتين و الفيتامينات و ده كل اللي ممكن يحتاجه الجسم في اليوم ، ده غير إن الوصفة مش هتاخد منك غير 30 دقيقة في التحضير و ده وقت مناسب جدا لتحضير وجبة و خصوصا لو إنتي بتشتغلي و معندكيش وقت كتير تقضيه في المطبخ ، و علشان العين بتاكل الاول، هتلاقي في الطبق ألوان كتيرة تزيني بيها سفرتك و تبهري بيها جوزك و ضيوفك .

دلوقتي خليكي معانا نحضر مع بعض طبق اليوم في خطوات بسيطة.

نص كيلو مكرونة أسباجتي ، ربع كيلو فراخ بانيه مقطعة قطع صغيرة ، 2 معلقة زيت زيتون ، نص معلقة ملح ، ربع فنجان أوراق ريحان أخضر مقطع قطع صغيرة ،4 حبات طماطم مقطعة قطع صغيرة أو طماطم تشيري لو متوفرة ، فنجان سبانخ مقطعة ، 3 فصوص ثوم مقطعة ، ربع معلقة فلفل أحمر حامي مقطع (حسب الرغبة) ، ربع معلقة فلفل إسود .

ضيفي في طاسة معلقتين زيت الزيتون و الفلفل الأحمر و الفراخ البانيه المقطعة و قلبي علي نار هادية لمدة خمس دقايق.

ضيفي علي الفراخ اللي سوتيها( نص سوي)الطماطم و السبانخ و الريحان و الثوم و قلبي علي نار هادية لمدة خمس دقايق كمان، بعد كده تبلي الخليط بالملح و الفلفل الإسود ، و لما الفراخ تستوي و الخضار يدبل شوية ممكن ترفعي الطاسة من علي النار.

اسلقي المكرونة واشطفيها بميه باردة و صفيها كويس ، و ضيفيها لباقي المكونات في الطاسة و قلبي علي نار هادية لمدة دقيقتين لحد ما تختلط جميع المكونات بالمكرونة .

إغرفي المكرونة بالسبانخ و الفراخ في طبق التقديم بشكل فني و قدميها ساخنة .

علشان المكرونة متتكسرش أو تعجن منك ، ممكن ترجعي لنصايح جدتك القديمة و تضيفي ملح و شوية زيت أثناء غلي الميه ، و كمان إشطفي المكرونة كويس بعد السلق .
الكمية تكفي أربع أفراد قللي أو زودي المقادير حسب عدد الافراد .
ممكن تضيفي معلقة زيت زيتون قبل التقديم أو ممكن تبشري علي الوش جبنة شيدر أو موتزاريلا تجملي بيها الوش و تخلي الطعم أحلي و كمان تزود القيمة الغذائية للطبق .