الحكاية أنه في أطباق وحوض مليان وغسيل ولعب وحاجات كتير محتاجة تتعمل في البيت والمتوقع أن الأم لوحدها الي هتقوم بكل ده! بعيدا عن أن ده شغل كتير علي شخص واحد لازم الأم تعلم أطفالها أنهم أي مكان يسكونوا فيه يشاركوا في الأعمال المنزلية ومهم جدا أنهم يتعلموا يعتنوا بيبتهم وأوضتهم ويحافظوا علي نظافة البيت بشكل عام فلو عاوزة تعلمي طفلك المشاركة في الأعمال المنزلية اتبعي الخطوات دي:

لازم الأم تبقي قدوة لولادها فبلاش تشتكي أدامهم من الأعمال المنزلية عشان ميرطبتش عندهم أن دي حاجة وحشة وبالتالي يكرهوها ويحاولوا يهربوا منها. خلكي كلامك عن أعمال المنزل حيادي مش لازم يبقي ايجابي بس مش سلبي واتكلمي مع أولادك عن أهمية أنهم يتعلموا يحافظوا علي البيت.

أولادنا دلوقتي بقوا علي طول مشغولين باستخدام الانترنت للتواصل مع أصحابهم وللألعاب وده طبيعي جدا يشغلهم عن المهام المنزلية. اتفقي مع أولادك أنه مفيش استخدام للإنترنت الا لما ينتهوا من مهام محددة تكوني متفقة معاهم عليها مسبقا زي فرش السراير وجمع الألعاب وغيره من الأعمال المنزليه الي هتوكليها ليهم.

من ضمن الطرق الي هتعلم الأطفال أنهم يحافظوا علي نظافة البيت أنك لما تلاقيهم أهملوا في إعادة أشيائهم لمكانها زي مثلا سابوا الجزمة في وسط غرفة المعيشة أو الألعاب لعبوا بيها وملموهاش ممكن أنتي تلمي الحاجات دي وتحتفظي بيها وممكن ياخدوا حاجتهم تاني في حال أنهم قاموا ببعض الأعمال المنزلية الي هتوكليها ليهم. ميزة الطريقة دي أنها هتساعدهم أنهم يحافظوا علي حاجتهم ويلموا لعبهم وفي نفس الوقت يشاركوا في أعمال المنزل.

مهم أن أولادك يسحوا أنهم جزء من البيت وعشان كدة لازم يشاركوا في أعمال المنزل مش عشان هما مجبرين لا عشان هما جزء من الأسرة. تجني عمل مسابقات وسباقات بين الأخوات في البيت عشان متنشريش روح المنافسة بينهم بالعكس خاليهم يفكروا في إزاي كلنا ننجز الشغل الي ورانا والي يخلص المهمة بتاعته ممكن يساعد الي لسه مخلصش. كمان مهم أنك تقعدي معاهم وتقسموا المهام عليكوا وأولادك يختاروا الوظايف الي ممكن يقوموا بيها.

واظبي علي النظام الي حطيته مع أولادك لو اتفقتي معاهم أنهم لازم يعملوا سرايرهم كل يوم بيقي لازم تتابعي وتتأكدي أنهم ملتزمين بالاتفاق لأنهم لو شافوا أنك مش مهتمة بالشكل الكافي أو أنك اهتميتي في الأول بس وبعد كدة لا هما كمان مش هيستمروا في المساعدة في شغل البيت.

أهم شئ المحافظة علي هدوئك ومعاملة أطفالك بلطف