اولا لازم نعرف ان مش كل الاطفال بيبدؤا ينطقوا في وقت واحد وان في ما بينهم فروق فردية بسيطة فبداية نطق الكلام بتختلف من طفل للتاني وبداية نطقه السليم كمان بتختلف من طفل للتاني ، لكن الحدود الطبيعية لبداية النطق من ست شهور لسنة .

اول مرحلة بتتم للطفل عشان يبدا ينطق انو يفهم المعاني و يقدر يربط بين الكلمة والشئ او الشعور ويبدا علي سبيل المثال ان كلمة زعلان علي الشخص اللي باين عليه ملامح الحزن مثلا .او الكرسي بالشئ اللي بيتقعد عليه وهكذا .

اول خطوة لازم تعمليها مش انك تحاولي تخليه ينطق ، انك تحاولي تخليه يفهم علي قد ما يقدر ، شاوريله علي الاشياء وقوليله اسمائها بس مش مره واحده حاولي تكرري علي قد ما تقدري هيبدا يربط بين الشئ واسمه ويتسجل في الذاكره .

لو حاجه مش ماديه زي الكرسي او الشجره وكانت حاجات ليها علاقة بالشعور حضري مجموعة من الصور لاطفال بتضحك مثلا في مشاهد مختلفه وقوليله دا مبسوط بيضحك فرحان ..الخ اربطيله بين شكل الابتسامه وكلمة الضحك في مشاهد مختلفة .

كتير من الاطفال بيتلغبط في انا و انتي ممكن يقول لمامته انت ولباباه انتي وهكذا ، حاولي كل مايقولها تصلحيله الكلام اسمها انت مش انتي ..الخ ، واربطيله بردو بين صور البنات وانتي ونفسه وانا ..الخ

في مقولة بتقول ان الام الثرثاره كثيرة الكلام طفلها بيمتلك مفردات متنوعة وكتيرة وبيتكلم اسرع عن الام الهادئه فحاولي تكثري من الكلام معاه كانه شخص كبير فاهمك وفاهم كل كلمة بتقوليها ، لانه بمرور الوقت بيكتسب منك المفردات دي تدريجيا بيدا يزيد فهمه لمعظم الكلام ، لو سالك علي معني كلمة حاولي تبسطيها لمفردات اسهل يعرفها تكون قريبة المعني لحاجه عارفها لحد ما يفهمها .

متتكلميش من غير ما تظهري مشاعر علي وشك معبرة سواء مبسوطة او حزينة او مضايقة الخ .. لان ده هيخليه يفهم بشكل اكبر فبالتالي نطقه هيتحسن ،حاولي تخلي في تناغم بين اللي بتقوليه وتعبيرات وجهك وجسدك .

في العصور الماضيه الطفل العربي كان بيدخل المدرسة عنده حصيلة لغوية كبيرة جدا ما يقارب من 50 الف كلمة بسبب دخوله الكتاب ، حاليا بيدخل الطفل العربي المدرسة بحصيلة لغوية 3000 كلمة فقط بسبب اقتصاره علي اللغة العامية اللي حدودها ضيقه جدا واللغة العامة غير غنية بالمصطلحات والمعاني ، حاولي تخليه يحضر دروس لتعليم القران او الانجيل ، ده هيقوي عنده حصيلته اللغوية والنطق بشكل كبير جدا .

قنوات كتير زي طيور الجنه بتجيب اغاني وكرتون مع صور بتعلم الاطفال وبتنمي حصيلة الطفل وبتساعده علي النطق عشان يتفاعل زي الاطفال اللي بيشوفهم ولكن متخلهوش قدمها طول الوقت عشان كمان من المهم انو يتعامل معاكوا ويحتك بالناس بطريقة مباشره وشخصية بتبدا تتكون وميصابش بالتوحد .

حاولي تغني مع طفلك لان الاغاني بتشد انتباهه وغانيله حاجات بيحبها زي اعلان معين للاطفال او اغنيه معينه ..الخ حاولي تحفظيها وتغنيهاله وهو عشان يتفاعل معاكي ويغنيها معاكي هيحاول يقلدك فده هيحفز جهاز النطق عنده بشكل اكبر .

بيواجهه معظم الاطفال العرب المغتربين صعوبه في النطق او تاخر في النطق بسبب تعامله مع ناس كتير من جنسيات وبلدان مختلفه ، بيبدا يسمع لغات كتير وهو لسه مقدرش يفهم اللغه الاساسية ليه ، مبيبقاش فيه كلمة ثابته للشئ يسمعها فيربط بينها وبين الشئ ده فبالتالي بيبقي مشتت بشكل كبير ومش قادر يفهم فينطق .

حاولي تشتركي له في حضانه او مدرسه بنفس لغتك او علي الاقل فيها كتير من مصطلحات اللغة اللي بيسمعها في البيت ، او علي الاقل في الفتره الاولي وهو طفل صغير في السنين الاولي من عمره حاولي لو هتسبيه مع مربيه او غيره تكون بتكلمه بنفس لغتك الام .

حاولي تمثلي معاه بعض المشاهد زي انك تديله سماعة تليفون وتمسكي موبايلك وكانك بتكلميه ، ده بيساعده انو يفكر هيرد عليكي يقولك ايه ويبدا يفتكر ويتخيل لما كنتي بتكلمي حد كنتي بتردي تقولي ايه فيبدا يتعلم ويعرف يرد في الموقف المختلفه جربي موضوع تمثيل المشاهد ده معاه في مواقف مختلفه مش بس في موقف التليفون كمان في مواقف حياتيه يوميه مختلفة .