مع دخول الأطفال في حياتك واللحظات الحلوة الي بتمر علي كل أسرة بيبدأ الأهل أنهم عاوزين يصوروا اللحظات دي عشان يحتفظوا بيها. ومن اللحظات الثمينة قوي دي هي لحظة وصول المولود الجديد وكل ما يتبعها من لحظات أولي في حياته. لو عاوزة تعرفي ازاي تصوري طفلك الرضيع اتبعي الخطوات دي:

من طرق التصوير الجذابة أنك تصوري رضيعك بشكل يوضح اد ايه أن حجمه صغير. ركزي علي التفاصيل الصغيرة زي رجليه وصوابعه.

اهتمي كمان بتصوير طفلك الرضيع وهو وسط الأسرة مع أخواته ومعاكي ومع باباه. تصويره مع الأسرة لا يقل أهمية عن تصويره مع بقية أفراد الأسرة. الصور دي هتبقي ذكري لابنك بعد كدة اد ايه هو كان مرحب بيه!

من الحاجات المهمة كمان أنك تهتمي بتصوير وش ابنك لانه بيتغير بسرعة وملامحة بتختلف والصور بتبقي لطيفة أكتر وأكتر لو عرفتي تصوريه وهو بيعمل تعبيرات مختلفة بوشه!

لو طفلك عنده أخوات أكبر منه ممكن تخاليهم يتصوروا جنبه وهما واخدين نفس الوضع بتاعه أو بيعملوا نفس الحاجة الي هو بيعملها وبيقلدوه. الصور دي بتبقي دمها خفيف جدا وبتسيب ذكري حلوة مع الأخوات. ممكن كمان يلبسوا لبس زي بعض أو شبه بعض.