مشكلة عدم الاكل عند الاطفال بترجع لعدة أسباب غالبا بتكون أسباب خارجة عن إرادة الطفل، وممكن يكون بسبب الجو المحيط بيه ,علشان تقدري تخلي ابنك ياكل بشكل كويس اتبعي الخطوات التالية :-

  • متأكليش الطفل غصب عنه

من اكتر الاسباب اللي بتخلي الطفل يكره خصوصا لو سنه صغير يكره الأكل هو انه يتغصب عليه لان ببساطه فم الطفل مليان خلايا عصبية وممكن يكون مش مستوعب نوع الاكل اللي بتغصبيه عليه فيبدأ مياكلش كويس

  • فهميه ليه مهم ياكل

لو الطفل في سن يقدر يستوعب ويفهم كلامك ليه ابداي فهميه ليه مهم ياكل زي انك تقوليله ياكل كويس عشان يكبر ويبقي زيك او زي باباه او عشان يقدر يلعب ويجري براحته

  • خليه يشوفك بتاكلي اكل صحي

يعني مينفعش الطفل بيشوف باباه او مامته بيشرب بيبسي ويقولوله لا متشربوش عشان وحش ،هو مش هيستوعب غير اللي بيشوفه مش اللي بيسمعه ودي من اكتر الكوارث اللي ممكن تخلي الطفل مياكلش كويس وكمان يتسببله في امراض كتير ده غير انه مبيثقش في كلام اهله بعد كده

ولما بنطلب قدام الطفل اكل كتير من بره البيت والخطأ في الحاله دي ممكن يتعمل علي شكلين
1- انك تمنعيه من الأكل ده و بالطريقة دي هو مش هيستوعب اللي بتعمليه معاه لانه بيشوفك بتاكل منه وبالتالي هتعمليه اضطرابات في شخصية الطفل ومش هيحب الاكل التانى لانه بيشوفك مبتاكلش منه ولو غصبت عليه هيشوفك بتتحكم فيه وبتضطهده

2-انك تسيبه ياكل من الاكل ده وبكده صعب جدا تخليه يتعود علي الاكل الطبيعي اللي المفروض يأكله لان الاكل الجاهز بيكون مليان مكسبات طعم صعب تكون موجودة في الاكل العادي وكمان هيتسببله في امراض كتير وهيقلل مناعة الطفل جدا وبردو مش هيحب الاكل

  • خلي الطفل يشارك في تحضير الطعام

فكرة المشاركة عند الطفل ولما يحس انه عمل حاجه بايده هيكون فرحان بيها جدا وهتحفزه انه ياكل من الاكل اللي حضره بايده ،زي انك تخليه يغسل حاجة بسيطة زي الخيار أو الطماطم أو يمسك المعالق يحطها علي السفرة أو ينادي علي اخواته عشان ياكلوا

وتبدأي تتكلمي معاه عن الاكل ده انك بتحبيه جدا وانتوا بتجهزوا فيه وأنه بيبقي طعمه حلو جدا عشان تحفزيه علي الاكل قبل مايقعد وياكل ،واوصفيله الاكل قبل ما تبدأي تعمليه وممكن توريله صوره ليه من على النت بس في الحالة دي هتضطري يكون الاكل قريب جدا من اللي ورتيهوله عشان يحس بالإنجاز ويتحفز للأكل

  • خليه يشتري الاكل معاكي

لما الطفل يروح معاكي وانتي بتشتري الاكل هتقدري تعرفي ايه اللي بيتشد ليه ،هتلاقيه بيختار الاكل لوحده وساعتها تقدري تتحكمي في نوعية الاكل اللي عايزها “زي انك لو لقيتيه اتشد لفراخ بانيه جاهزة تبدأي تعمليها انتي في البيت وتعرفيه ان ده اللي كان عاجبه وانك عملتيهوله بنفسك عشان يبقي طعمه احلي من اللي في السوبر ماركت ”

وكمان الاطفال بطبيعتها بتحب المشاركة وهي هتكون نفس فكرة المشاركة في إعداد الطعام وهيتحفز ياكل من الحاجة اللي شاركك وانتى بتشتريها

ده غير ان الطفل هيحس ان الاكل ده كان اختياره وممكن يكون الطفل اتشد لنوع أكل هو ميعرفوش لكن انتي عشان عارفاه وافقتي تشتريه واشتريتيه بناء علي طلبه هو كده هيتحفز يأكل منه لأنه معتقد ان هو اللي اختاره

  • ماتعاقبيش الطفل لما يوسخ هدومه من الاكل

مفيش مشكله لما الطفل يوسخ هدومه مدام هياكل كويس لان الهدوم سهل تغسليها تاني لكن الطفل لو مأكلش كويس هتكون مشكلة كبيرة لان لما بتزعقي للطفل بسبب انه وسخ هدومه وهو بياكل بيخاف ويأكل بحرص شديد فهيشبع بسرعة او اما انه هيفهم ان الاكل ده حاجة وحشة و هيبدا يكرهه ونفسه تتسد منه

  • نوعي الاكل

متخليش الطفل ياكل من نوع واحد فترة كبيرة او تكوني بتعمليهوله كتير لانه كده هيكرهه ده غير انه جسمه مش هيستفاد، حاولي دايما تخلي اطباقك متنوعة وتراعي ان ميكونش فيه علي الوجبة الواحدة أكثر من نوعين تلاتة لكن متكرريهمش كتير وغيريهم في الوجبة اللي بعدها

  • خصصي للطفل اطباق مميزة وملونة

مفيش مانع لو كان للطفل اطباقة الخاصة بيه واللي شكلها مميز و جذاب للأكل وفي نفس الوقت هو عارف ان دي الأطباق بتاعته اللي كل ما يشوفها قدامه هيفتكر الاكل وهيكون حابب ياكل فيها لانك كده بتلعبي علي نفسية الطفل لان شكل الاكل والاطباق من الحاجات المهمة اللي بتفتح شهية الطفل

  • تناقشي معاه

دايما الطفل بيفهم المناقشة خصوصا لو بطريقة كويسة من غير زعيق أو ضرب لكن احنا اللي بنستهتر بعقلية الطفل وبنكون فاكرين انه مش هيفهم اللي هنقولهوله

وفي موضوع الاكل لما تلاقي الطفل رافض الأكل وتبدأي تتناقشي معاه هتعرفي المشكلة بالظبط فين وتبدأي تقنعيه وتوصلي معاه لحل وسط تخليه يعمل اللي هو عايزه وفي نفس الوقت ياكل اللي هيفيده زي مانتي عايزه “زي انه يقولك انه مبيحبش الاكل ده وتبدأي تقنعيه انه مجرد انه يدوقه بس وانه ممكن لما يدوقه يحبه زي ما انتي بتحبيه و تعرفيه انه لو محبوش انه مش مشكلة والمرة اللي بعدها تختاريله الحاجه اللي هتتفقوا عليها ”

وممكن تخلي الطفل يختار بين نوعين اكل مهمين لصحته زي انك تقوليله تاكل بيض ولا جبنة؟ وبكده هتحسسي الطفل انه بيختار وانه مش مغصوب علي الاكل وده هيخليه يأكل بطريقة كويسه لانه هيقتنع من جواه بالاكل قبل ما يشوفه