البحث عن جليسة الأطفال المناسبة بيحتاج وقت لأنك لازم تقابليها الأول وتتكلمي معاها ومهم أنك تقابلي أكتر من شخص للوظيفة وعملية الإعلان والمقابلات بتستهلك وقت وبالتالي بلاش تيسبي نفسك لحد مثلا قبل معاد رجوعك لشغل بأسبوع لأن ده مش وقت كافي. أنتي محتاجة من شهر لشهرين عشان تقدري تاخدي وقتك في الإعلان عن الوظيفة وإجراء المقابلات واختيار الشخص المناسب.

  • حددي المهام والميزانية

مهم كمان جدا أنك تكوني محددة أنتي احتياجك ايه بالظبط هل أنتي محتاجة حد ياخد باله من أطفالك فقط؟ هل عاوزة جليسة الأطفال تشارك في شغل البيت؟ هل مهم أنها تكون بتعرف تطبخ؟ كمان مهم أنك تكوني عارفة الميزانية أو المرتب الي هتقدري تدفعيه.

  • اسئلي عنها

من المهم عند اختيار جليسة أطفال أنك تكلمي الناس الي كانت بتشتغل معاهم قبل كدة وتسأليهم عن تجربتهم معاها. ممكن تكلمي أكتر من أسرة لو ليها خبرة مع أكتر من أسرة وتفهمي منهم أهم المعلومات الي محتاجة تعرفيها.

  • اجراء المقابلة والأوراق المطلوبة

لازم تقابلي المرشحين بنفسك واحدة واحدة مينفعش ابدا تعيني شخص من غير ما تقابليه بنفسك، كمان مهم تطلبي فيش وتشبيه عشان تتأكدي من التاريخ الجنائي للست الي هتكون مسئولة عن أولادك وأنها مالهاش أي تاريخ اجرامي سواء بالسرقات أو غيره.

  • عمل فترة تجربة

قبل الاتفاق النهائي مع جليسة الأطفال ممكن تعملي فترة تجربة وتكوني موجودة معاها في البيت وتشوفي بنفسك شغلها وهل هتناسب أسرتك ولا لا وهل طريقتها في التعامل مع أولادك هتبقي مناسبة ولا لا وهل أولادك هيحبوها ولا لا.