أغلب الأطفال دلوقتي بيدخلوا علي الإنترنت لأوقات طويلة سواء عشان المدرسة أو لمجرد الترفيه والتسلية وده بيخلي الأب والأم قلقانين من تعرض أولادهم لمحتوي غير مناسب لسنهم أو لغرباء ممكن يضروا أولادهم وعشان تحمي ولادك علي الإنترنت اتبع الخطوات التالية

  •  علم أولادك ميردوش علي رسائل من الغرباء

لازم الأطفال يفهموا كويس أن مجتمع الإنترنت فيه مخاطر زي الشارع بالظبط وزي ماهما مش المفروض يتكلموا مع حد غريب في الشارع مينفعش برضو يكلموا حد غريب علي الإنترنت.

  •  علم أولادك يستخدموا محركات بحث للأطفال

في محركات بحث متخصصة للأطفال بتساعدهم يحصلوا علي نتايج بحث آمنة ومناسبة، علم أولادك يستخدموها دايما ويتجنبوا استخدام محركات البحث العامة الي ممكن تجيب نتايج غير مناسبة لسنهم زي جوجل.

  •  حدد وقت لاستخدام الإنترنت

اتفق مع أولادك علي عدد ساعات معين لاستخدام الإنترنت يوميا. متسمحش لأولادك أنهم يقضوا طول اليوم أدام شاشة الكومبيوتر أو الأجهزة التانية لأن ده بيزيد فرصة تعرضهم لمحتوي غير مناسب. كمان لو حددت لأولادك ساعة مثلا يوميا بحد أقصي لاستخدام الإنترنت ده هيخاليهم يحاولوا يستخدموها في حاجات مفيدة ويتجنبوا الفيديوهات والمواضيع الغير مفيدة بالنسبة ليهم.

  •  حط قواعد لمشاركة الصور

علم أولادك أنه مينفعش يشاركوا صورهم إلا مع أهلهم وأصحابهم وممنوع تماما يشاركوا صورهم أو أي معلومات أخري شخصية مع الغرباء. كمان لازم تتكلم مع أولادك عن خطورة وجود صورهم علي الإنترنت وأنه الصورة بمجرد ما تبقي علي الإنترنت من السهل جدا أنها تنتقل من شخص لاخر بشكل يستحيل السيطرة عليه.

  •  اتكلم مع أولادك عن مفهوم الخصوصية

مش كل شئ مناسب للمشاركة علي الإنترنت. اتكلم مع أولادك عن أهمية أنهم يحافظوا علي خصوصية حياتهم وأنه مينفعش يشاركوا كل المعلومات الشخصية الخاصة بهم علي الإنترنت زي عنوانهم واسم مدرستهم وتفاصيل حياتهم اليومية وأن الإنترنت مش المكان المناسب لعرض التفاصيل الشخصية. كمان غير مسموح أنهم يشاركوا معلومات تخص الأسرة.

  •  كن متابع للتكنولوجيا

لازم الأب والأم يكونوا دايما متابعين أحدث التطبيقات الي أولادهم بيستخدموها ويتعلموا يستخدموها لإن مهارات الطفل في استخدام الإنترنت ممكن تطور بسرعة جدا ويتفوق علي مهارات أهله وده هيخاليهم يفقدوا السيطرة علي طريقة استخدام أولادهم للانترنت وبالتالي ممكن أولادهم يتعرضوا لمخاطر الإنترنت.

  •  تابع نشاط أولادك علي الإنترنت

ترك الأطفال يستخدموا الانترنت بلا رقابة هيؤدي لأضرار كبيرة. فهم أولادك أنك بتتابع استخدامهم للإنترنت واتكلم معاهم وافهم منهم دايما هما بيعملوا ايه علي أجهزتهم.

  •  أمنع استخدام الأجهزة في غرف النوم

أمنع أولادك من استخدام الكمبيوتر والتابلت أو الموبيل في غرف النوم. اتفق معاهم أن استخدام الأجهزة دي مسموح فقط في غرفة المعيشة. منع استخدام الأجهزة في غرف النوم بيساعد علي متابعة نشاط الأطفال والوقت الي بيقضوه علي الإنترنت وكمان هيمنعهم من السهر ليلا للدردشة مع الأصدقاء.

  •  وجه أهتمام أولادك لأشياء أخري

من المهم أن الأطفال يكون ليهم اهتمامات أخري زي الرياضة أو القراءة ومينفعش يكون اهتمامهم مقتصر علي استخدام الإنترنت. ساعدهم في تنمية هوايتهم وشغل وقتهم بأشياء أخري مفيدة.

  • نصائــــح

حافظ علي علاقة طيبة مع أولادك وصاحبهم عشان تقدر تنصحهم وهما يتقبلوا منك النصيحة.
اسمع دايما من أولادك قصصهم واعرف مين صحابهم.
لو ابنك وقع في مشكلة أو اتصرف غلط علي الإنترنت متغضبش وبلاش تنتقده حاول تحل معاه المشكلة.
حط القواعد بعد مناقشتها مع أولادك وشرح الهدف منها.