الناس من جميع الأعمال ممكن يبقي عندهم حساسية من اللبن لكنها منتشرة أكتر في الأطفال الرضع حوالي ٢-٣٪ من كل الأطفال الرضع بيعانوا منها وأغلب الأطفال بيتعالجوا منها تلقائيا أما بيكبروا وفي بعض الأطفال بتستمر معاهم.

لم الطفل يكون عنده حساسية من اللبن ده معناه أنه جهاز المناعه بتاعه – والي في العادي بيحارب العدوي – بيعمل رد فعل للبروتين الي في اللبن البقري واللبن البقري يعتبر العنصر الأساسي لكل ألبان الأطفال الصناعية. كل مرة الطفل بيرضع فيها، الجسم يبفتكر أن البروتين ده جراثيم وبيحاربهم وده بيسبب الحساسية في الجسم.

عادة بيظهر علي الأطفال الرضع أولي أعراض حساسية اللبن بعد أيام لأسابيع من أول مرة ياخدوا فيها لبن صناعي. الأطفال الي بترضع طبيعي فرصتها أقل أنها تصاب بحساسية اللبن لكن لو عندهم الحساسية دي ممكن تظهر عليهم الأعراض لو الأم بتتناول منتجات ألبان. بعض الأطفال الي عندهم حساسية اللبن بيظهر عليهم أعراض الحساسية مباشرة بعد الرضاعة وبعضهم بعد ساعات أو أيام. لو عاوزة تعرفي ازاي تتعاملي مع حساسية اللبن عند الأطفال تابعي بقية المقال:

في الأطفال الي بيظهر عليهم الأعراض بعد شرب اللبن مباشرة، الحساسية ممكن تسبب:

صعوبة في التنفس

كحة

تعب في المعدة

ترجيع

اسهال

انتفاخ العيون أو هرش في العيون

بقع حمرا

وغيرها من الأعراض الي الطبيب هيشرحالها….

حساسية اللبن ممكن تعمل أعراض مختلفة في أوقات مختلفة. بعض الأعراض بتكون بسيطة وبتكون في عضو واحد فقط من الجسم زي الجلد والأعراض البسيطة دي مش معناها أنه كل مرة الطفل هيظهر عليه أعراض بسيطة ممكن الرضعة الي جاية الأعراض تبقي أشد.

بالنسبة للأطفال الي مش بيظهر عليهم أعراض بعد شرب اللبن بفترة بسيطة بيكون عندهم أعراض تانية ممكن تظهر بعد ساعات لأيام من الرضاعة زي:

سيولة في البراز

ترجيع

رفض الأكل

مغص وتغيير عام في المزاج

حساسية في الجلد

لو طفلك ظهر عليه أعراض قوية زي تورم الشفاة أو الحلق أو صعوبة في التنفس أو أي أعراض علي أكتر من عضو زي أعراض علي الجلد والترجيع يبقي مهم تاخدي طفلك للطوارئ فورا.

لو شاكة أن طفلك عنده حساسية من اللبن استشيري طبيب الأطفال. الدكتور هيسألك بعض الأسئلة وهيشرحلك كل حاجة. بعد ما الدكتور يكشف علي طفلك ممكن يطلب تحليل براز و دم. الدكتور كمان ممكن يطلب منك زيارة أخصائي حساسية. أخصائي الحساسية هيقوم بعمل اختبار جلدي. في الاختبار ده الطبيب أو الممرضة هتحط نقط صغيرة من اللبن علي جلد طفلك وبعدين هيقوم بعمل خدش بسيط علي سطح الجلد. لو ظهر علي طفلك أي أعراض للحساسية الجلد هيورم شواية في المناطق الي فيها اللبن. في الحالات الشديدة من الحساسية ممكن الأخصائي يوصفلك علاج.

لو بترضعي طبيعي وطفلك عنده حساسية من الألبان يبقي من المهم أنك تتجنبي أي منتجات ألبان في أكلك لأن البروتين الي بيسبب الحساسية دي ممكن يوصل للطفل من خلال لبن الأم. كمان لو دخلتي لطفلك أكل يبقي من المهم أنك تتأكدي أنه مفيهوش لبن. كمان هتحتاجي تتكلمي مع طبيبك عشان يساعدك تلاقي مصادر بديلة للكالسيوم والمواد الأخري الي كنتي بتحصلي عليها من اللبن.

لو بترضعي صناعي ممكن الدكتور يطلب منك تغيري نوعية اللبن لنوع مخصوص للأطفال الي عندهم حساسية من الألبان.