كام مرة اتعرضتي لنوبات عصبية شديدة من الزوج وكنتي بتسالي نفسك اتصرف ازاي او اقدر اعمل ايه اهديه وايه التصرف السليم في الموقف ده ، عشان كده في المقال ده هنقولك ازاي تمتصي غضب زوجك ببعض الخطوات البسيطة اللي هتساعدك انه يهدي والمشلكة متتفاقمش .

  •  حسسيه انك مقدرة

حسسيه انك مقدره موقفه وشعوره وان الموقف فعلا يستحق انه يضايق ، لان دايما اتهامك ليه اثناء الموقف بانه مكبر الموضوع وانك تحسسيه ان الموقف ميستحقش وان هو اللي كبره هيزود من غضبه اكتر ، قوليله انك مقدرة الموقف اللي حصل ودعميه لغاية لما يهدي تماما عشان تقدري تتناقشي معاه .

  •  اتكلمي عنه بايجابيه

في بداية كلامك ابدئي بكلام ايجابي عنه ، وامدحيه لان الشخص العصبي في الاساس بيبقي في حاجه اساسية للاحترام والتقدير ، احساسه انك محترماه ومقدراه هيهديه بشكل كبير جدا وهيمتص غضبه بشكل كبير ، اظهرليه دايما انك عارفه انه طيب وكويس وان كانت نيته خير وهكذا ..

  •  متحاوليش تصارحيه باخطائه

من اكبر الاخطاء اللي ممكن تعمليها انك تجيبي اللوم عليه اثناء المشكلة وتصارحيه باخطائهوتنقديه وتحاولي توجهيه وتعدلي من تصرفاته ، دي تعتبر من الحاجات اللي ممكن تشعل النار ما بينكوا وتتسبب في مشكلة كبيرة جدا.

حاولي تاجلي من انتقادتك ووجهة نظرك في اللي حصل لما يكون هادي وفي حالة نفسيه مستقره بطريقة لطيفه وهاديه تسمحلكوا بالنقاش فيها مره تانيه لان النقاش اثناء غضبه في الغالب مش هيوصل لنتيجة الا لمشكلة اكبر .

  • سبيه ياخد القرار

سبيه يقود في شكل انك بتدوري معاه علي حلول ترضيه علي سبيل المثال لو كنتوا متواجدين في مكان عام وحصل مشكلة مع شخص او اي مشكلة ما عموما حاولي ، تقوليله طيب انت ايه اللي يرضيك في الموقف ده او شايف اننا مفروض نتصرف ازاي ؟ او ممكن اعمل ايه اقدر اساعدك بيه ؟ او شوف الحل المناسب وانا معاك فيه الطريقه دي ممكن تهديه بشكل كبير جدا لانه بيحس انك حريصه علي راحته وسعادته وانك مقدره لغضبه .

  •  تجاوبي معاه

التباطؤ والبرود او التبلد اثناء غضب الزوج من الحاجات اللي بتسبب في زيادة غضبه ، تجاوبي معاه بحكمه من غير ما تنفعلي انتي كمان تجنبا ان الموقف يزداد سوء ، حاولي تحافظي علي ثباتك الانفعالي وانك متكونيش عصبيه لكن تجاوبي معاه واتناقشي معاه في المشكله واسمعيه …

علي سبيل المثال لو حصل مشكلة بسبب انكوا اتاخرتوا علي ميعاد مع ناس بسبب انك لسه مجهزتيش حاولي تكملي لبسك بسرعة وتعتزريله وتقوليله ان في الخروجة الجاية يحاول يقولك قبل المعاد بفتره اطول عشان تلحقي تجهزي .

  • نصائــــح

تجنبي كلمات اهدي او انت عصبي او مكبر الموضوع اثناء المشكلة لانها بتزود من شحنة غضبه بنسبة كبيرة .
مش معني انك تمتصي غضبه انك بتساعديه وبتشجعيه علي الغلط ولكن بتساعديه انه يهدي عشان المشكله متتفاقمش وتكون نتايجها اسوء وبعدها تقدري تتكلمي معاه وهو هادي.