من أغرب الحاجات الي الأم بتتفاجئ بيها معلومة أن الطفل الي بيضرب هو الطفل الي بيخاف! للأسف بيكون انتابه شعور بالخوف لسبب ما في وقت في حياته وممكن يكون من حاجة مش بتخوف بس نتيجة الخوف ده بقي بيضرب ويستخدم العنف أول أما يحس بتوتر بدل من البكاء أو طلب المساعدة وده بيسبب للطفل مشاكل مع أصحابه. لو عاوزة تعرفي ازاي تعلمي ابنك اللعب مع أصدقائه بدون عنف اتبعي الخطوات دي:

مهم جدا أن الأم الي عارفة أن طفلها بيضرب تكون عينها عليه ومتابعه تحركاته بحيث أنها تلاحظ بوادر أي تصرف عنيف من طفلها وتمنعه. خليكي قريبة من طفلك عشان وانتي جنبه هيكون حاسس بالأمان وفرصة أنه يضرب هتكون أقل.

لو ابنك ضرب طفل تاني… توقفي عن أي رد فعل وخدي نفسك الأول وهدي أعصابك عشان تعرفي تتعاملي مع الموقف بحكمة بدل ما يكون رد فعل يبغذي العنف الي عند الطفل. أفتكري أنه بيضرب لأنه خايف ده هيساعدك تتمالكي أعصابك.

الأطفال بيتعلموا بطرق كتيرة منها التقليد. لازم تكوني قدوة لأولادك لو انتي بتضربي توقعي أنهم هما كمان هيضربوا لو أنتي عصبية ولادك كمان هيكونوا عصبيين. لو ابنك ضرب طفل تاني، اهتمي أولا بالطفل التاني وهديه قبل ما تتعاملي مع ابنك عشان ابنك يتعلم منك الإهتمام بالاخرين. احضني ابنك والطفل التاني وقولي للطفل الي انضرب “احنا اسفين أن ده حصل، بنتي كانت زعلانة ومعرفتش تعبر بالكلام”.

اللوم والتأنيب مش هيجيب نتيجة. ابنك هيتعمل التعاطف والإحساس بالاخرين مش بالتأنيب لكن بأنك تشرحيله إحاس الطفل التاني الي انضرب. علمي طفلك يحس بغيره مش أنك تحسيسيه أنه طفل وحش لأن ده هيجيب نتيجة عكسية.

بمنتهي الهدوء ومش بنية العقاب، خرجي طفلك من وسط اللعب لو ضرب طفل تاني. خديه علي جنب واقعدي معاه لحد ما يهدأ لأن غالبا أما تخرجيه من اللعب هيعيط أكتر. خاليكي هادية واصبري لحد ما يهدا تماما وتجنبي أنك تديله محاضرات واتكلمي معاه كلام بسيط باختصار ووجهي نظره لمشاعر الأطفال الاخرين.