بناء بيت وأسرة هو حلم كل شاب في مقتبل العمر وبمجرد ما الشاب بيتخرج ويشتغل بيدأ رحلة البحث عن الزوجة الصالحة الي هتبني معاه البيت والأسرة الي بيحلم بيهم. وعشان تعرف مواصفات الزوجة الصالحة اتبع الخطوات دي:

  •  اتبع حديث النبي (ص)

النبي (ص) بيقول: تُنْكَحُ الْمَرْأَةُ لِأَرْبَعٍ : لِمَالِهَا ، وَلِحَسَبِهَا ، وَلِجَمَالِهَا ، وَلِدِينِهَا ، فَاظْفَرْ بِذَاتِ الدِّينِ تَرِبَتْ يَدَاكَ . فالنبي (ص) في الحديث ده بيوصف حال الناس في الزواج بعضهم بيتجوز الست عشان جميلة أو غنية أو عشان أهلها أو عشان دينها ونصحنا النبي (ص) أنه الواحد يبحث عن ذات الدين. فمن أهم مواصفات الزوجة الصالحة هي أنها تبقي متدينة وبتتقي الله.

  •  الصداقة

في معلومة مغلوطة منتشرة عند الناس أنه المتجوزين لازم يبقوا شخصيتهم مختلفة عشان يكملوا بعض والتجربة والواقع وخبراء العلاقات الزوجية بيقولوا أنه الكلام ده مش صحيح مهم جدا أنك تختار زوجة ينفع يكون بينكوا علاقة صداقة بمعني أنه ليكوا اهتمامات مشتركة مثلا في مواضيع ممكن تتكلموا فيها مع بعض بتفهموا بعض وبتحبوا تقضوا وقت مع بعض.

  •  القبول

من الحاجات المهمة كمان أنه يكون في قبول من ناحيتك ليها بمعني أنك تكون مشدود ليها وبتحب تقابلها وتشوفها. مهم برضو أنك تفرق بين مشاعر الانبهار ومشاعر الإعجاب والحب لأن ساعات ممكن تقابل واحدة جميلة جدا فتنبهر بيها بس بعد وقت قليل الانبهار ده بيروح لكن القبول بيستمر.