شريحة كبيرة من الناس بتعتقد ان الزواج الناجح او السعيد بيتوقف علي درجة التشابهه الشخصيات والحب فقط لكن الزواج الناجح ليه عوامل او علامات تانيه بتدل علي ان العلاقة دي هتنجح وتستمر او لا ، في المقال ده هنقولك ايه العلامات اللي بتدل ان علاقتكوا ناجحة ومتوافقة او لا ؟

  •  عندكم رؤية مستقبلية مشتركة

لو عندكوا اهداف مستقبلية مشتركة وواضحة سواء في تربية الاولاد او في الطموحات في الحياه المهنية او الطموحات في الحياة عموما ده سبب من الاسباب اللي بتخلي الجواز ناجح ومستمر رغم وجود خلافات .

وجود هدف واحد مشترك بيجدد دايما من الحياة الزوجية وبيقلل من الاحساس بالروتين وبيقوي علاقة الزوجين ببعض حتي لو في مشاكل او عقبات بتواجهم ، لان دايما بيبقي في سبب بيجمعهم .

علي النقيض عدم وجود هدف مشترك وان كل زوج يكون ليه هدف منفصل ومختلف تماما عن هدف الطرف التاني بيخلق دايما نوع من الصراعات والمشاحنات واحساس كل طرف بالغربة والوحده رغم وجود الطرف التاني .

  •  كل طرف بيراعي مشاعر الطرف الاخر

من الطبيعي ان بيكون في مشكلات بين اي طرفين بسبب بعض الاختلافات في الطباع والشخصية ، من الاسباب اللي بتخلي العلاقة دي تكمل وتستمر هو ان كل طرف يتفهم التاني وميحاولش يسئ ظنه وانه يراعي مشاعر الطرف التاني ويحاول دايما يكون بيلتمسله العذر وبيفكر دايما ان الطرف التاني اكيد نيته كانت خير او مش متعتمد انه يضايقه

مع بداية اي مشكلة بيكون المشهد المعتاد ان كل طرف بيحاول يوجهه الاتهامات للطرف التاني ويرمي المسؤلية كامله عليه وان هو السبب في كل حاجه بتحصل لكن عشان نقدر نتفاهم مع بعض من المهم ان كل طرف يبقي عارف انه بيغلط وان اي مشكله بيكون الطرفين ليهم دخل فيها وانه شايف الموضوع من وجهة نظره وان الموضوع ممكن يكون في وجهة نظر تانية هو مش شايفها بالشكل الكافي ، في الحالة دي هيكون الحل ايه ؟

هيكون الحل ان كل طرف يشرح للتاني اللي مضايقه من غير ما يلقي اتهامات عليه ، ولو حابب يفهم اللي قدامه ان في حاجة ما مقصر فيها يبدا كلامه بان انا عارف ان اكيد انك مش متعمد تضايقني بس انا للاسف اتضايقت من كذا وكذا وكذا وحابب اعرف ليه في الموقف ده اتصرفت كده ؟

الطريقة دي في الاسلوب والحوار بتخلي الطرفين يقدروا يوصلوا لاسباب الحقيقية للمشكلة بدون ما يتطرفوا لمواضيع فرعية واتهامات تخليهم يحيدوا عن المشكلة الاصلية وتحصل مشاكل اكبر .

  •  القدرة علي حل المشكلات

مفيش علاقة بتخلو من وجود اختلافات ومشكلات لكن العامل الرئيسي اللي بيفرق في نجاح علاقة عن التانية هي طريقة التعامل مع المشكلات ، هل كل طرف بيحاول يوصل لحل وسط مع الطرف التاني وهل في مرونة في التعامل مع الاختلافات دي وفي طرف يتنازل في موقف وطرف بيتنازل في موقف تاني عشان يكون في توازن ، ولا دايما في طرف واحد بس هو اللي بيضحي عشان العلاقه تستمر .

العلاقه اللي قائمه علي مجهود من الطرفين وتواصل جيد ما بينهم بتنجح وتستمر حتي في ظل وجود خلافات، لكن العلاقة القائمة علي طرف واحد دايما هو اللي بيضحي وبيحاول يحسن وطور في العلاقة في الغالب مش بتستمر او بتكون علاقة غير ناجحه ، لان معظم المشاكل بتكون محتاجه اتفاق ومجهود من الطرفين .