ازاي اعرف ان خطيبي لا يصلح للزواج

كتير من البنات بيبقوا في فترة الخطوبة وفي مشاكل ما بينهم وبين خطايبهم ومبيبقوش قادرين يحددوا هل المشاكل دي طبيعية وزي المشاكل اللي بتحصل بين اي اتنين ولا المشاكل دي جرس انذار ان في حاجة غلط وان الشخص ده مش مناسب ؟ وعشان تقدري تحددي ده فالمقال ده هنكتبلك اهم الصفات اللي لو لقتيها في خطيبك اعرف انه هيتعبك بعد الجواز ومش هيبقي شريك الحياه المناسب .

1 المتحكم او المسيطر
الشخص اللي اول ما ترتبطي بيه بيحاول يتحكم في كل تفاصيل حياتك الدقيقه (لبسك ، شكلك ، هتروحي فين ؟هتيجي منين؟في خروجك؟في شغلك ؟اصحابك يتحكم بشكل زايد عن الطبيعي ، بيوجهك طول الوقت تتصرفي ازاي في كل الموقف وبيعتبر ان هو ده الصح وبيبررلك ده رايما بانه بيحبك وخايف عليكي انك تعتقدي انه بعد الجواز هيتغير او سيطرته دي هتقل ده غالبا بيبقي غلط لانه بالعكس بعد الجواز بيعتبرك دخلتي من ضمن ممتلكاته وبالتالي بقي ليه الحق الكامل في التحكم فيكي والحكم عليكي .

اعرفي ان النمط ده من الشخصيات لو فكرتي تكملي معاه هتبقي مضطره تعيشي حياتك زي ما هو شايفها وبس ، هو اللي هيكون بيحددلك وبيرسملك معظم خطوات حياتك وتعاملاتك وواجب عليكي انك تمشي عليها والا هتفضلوا في صراعات مع بعض طول الوقت .
2 الغيره المفرطه
الغيره الطبيعية مطلوبه وبيعتبرها الراجل نوع من أنواع الرجوله وبتعتبرها البنت دليل علي الحب، لكن الغيره المفرطه هي بمجرد الخطوبه مش عايزها تتعامل أي تعامل مع زميلها في الشغل ، ولا تتكلم مع قريبها الولاد ، لو صادفت حد من جيرنها متقولوش صباح الخير مش عايزك تتعاملي اي تعامل حتي لو باحترام وبحدود مع اي جنس ذكر ايا كان السبب ، في الغالب عيوبنا بتتاصل فينا بالسن يعني بتزيد مش بتقل، يعني عيوبنا بتبقي جزء مننا كل ما بنكبر فبالتالي الغيرة المفرطة دي بتفضل موجودة مش بتنتهي بمجرد الجواز .

3 بيحاول يعزلك
بيحاول دايما يعزلك حتي عن صديقاتك البنات بيختارلك اشخاص معينين اللي تتعاملي معاهم ، بيبقي عنده تطلع ان يكون هو وحده مصدر اهتمامك ، في المستقبل في حالة وجود اي خلاف ما بينكوا ميبقاش ليكي حد غيره تحكيله او توديه ، وبعد مرور فترة من الجواز هتكتشفي ان مبقاش ليكي اصحاب او زمايل ومبقتش علاقتك قوية بحد حتي اقرب الناس ليكي .

4 مبيسمعش
كل ما تحاولي تكلميه او تفضفضي له مبيسمعش بيحاول يغير الموضوع البنت او الست عموما بتحب عن طريق ودانها بتحب اللي يسمعها لما تتكلم ، واللي يسمعها كلام حلو ، الراجل اللي مش بيسمع لك دايما مش هيكون رفيق جيد معاكي لحياتك في المستقبل مش هتقدري تحكيله مشاكلك وتتناقشي معاه فيها ومش هتقدري تحسي ان في حد بيشاركك حياتك مش هتحسي براحه كل ما تتكلمي معاه ، في الغالب هتلاقي رفض وصد ليكي عشان مبيسمعكيش وده هيخلق مايسمي بالخرس الزوجي ما بينكوا يعني انكوا الانتوا الاتنين توصلوا لمرحلة انكوا قاعدين مع بعض جسديا لكن مفيش اي حوار بيتفتح ما بينكوا ومفيش حاجه حابين تتكلموا او تتناقشوا فيها مع بعض .

5 رأيه من دماغه
مبيعتبرش ان ليكي الحق في انك تشاركيه القرارات الخاصه بيكم ، بيهمش دورك بشكل دايم ، مبيعملش غير اللي في دماغه وبس ،مبيحاولش ياخد رايك او يسمعه بتتفاجئ دايما بالقرارات من غير ما يكون عندك علم بيها ،بيعتبر ان رايك ده حاجه ملهاش ادني اهمية في الغالب الشخص ده لو خدتي قرار الزواج منه هيهمش دورك بشكل كبير جدا في معظم التفاصيل .

6 لا يعتمد عليه
بيتهرب دايما انو يساعدك ، الشخص اللي كل ما تعتمدي عليه في حاجه حتي لو كانت بسيطه دايما عنده اعذار وحجج ومبررات ، دايما مش هيقدر ، دايما مش فاضي ، دايما عنده اعذار بصفه مستمره ، ده في المستقبل هيتهرب من معظم المسؤليات وهيسيببها كلها عليكي بشكل دايم وهيبقي دايما عنده إحساس بعدم الرضي عن الحياه الزوجيه ومضايق لانها زودت من مسؤلياته وبقت عبئ عليه ودايما هيحملك مسؤلية ده وان انتي السبب في ده .

7 سئ الظن
اللي دايما بيفسر كلامك بشكل خاطئ بيفهمه من منظوره هو ومن خبرات سيئه هو عاشها ومر بيها ، بيفهم الكلام بطريقه غلط دايما ودايما انتي في بتحاولي تبرريله تصرفاتك وفي حالة دفاع عن نفسك طول الوقت وبتحاولي تفهميه القصد الصحيح من كلامك الشخص ده في الغالب بيبقي عنده شيء من الشك في الناس المحيطه بيه حتي اقرب الناس لو قررتي ترتبطي بيه هتفضلي طول حياتك في حاله من التبرير المستمر والصراعات المستمره .

idea نصائــــح
الجواز اساس نجاحه الاختيار السليم .
الجواز لازم يكون محطة السلام والراحة مش الصراعات والمشاكل .
الجواز اساسه الثقه بين الطرفين مش التشكيك .
متكمليش لو شايفة ان العلاقة مرهقة ليكي وبتستنزفك واساسها مش سليم .