صوص الباشميل او الصوص الابيض مش بس بيستخدم في المكرونة بالباشميل بيستخدم في اكلات كتير جدا منها اللازنيه والمكرونه بالصوص الابيض و وشوربة الكريمه وهي تعبر من اسهل المكونات في التحضير واسرعها ومن اكتر المكونات اللي بتاثر في طعم الاكلات وبتخليها تنجح او لا ؟ ورغم سهولتها وقلة مدة تحضيرها من 10 ل 15 دقيقه الا ان في ستات كتير خصوصا اللي لسه مقلبين علي الجواز بتشتكي انها مبتقدرش تطلع تظبط الباشميل زي ما هي عايزه سواء تطلعه بالقوام اللي بتحبه متماسك او خفيف او انه يطلع مفهوش كلاكيع رغم انها بتطبق كل الخطوات اللي كتباها او سمعتها من الشيف وده بسبب بعض الاخطاء البسيطه اللي بتاثر علي قوام الباشميل بشكل مباشر .

في ناس بتحب الباشميل تقيل وفي ناس بتحبه متوسط كانه صوص شوربه وفي ناس بتحبه خفيف ، عشان تظبطي صوص الباشميل زي ما بتحبيه اول خطوة هتكون عامل رئيسي في طعمه وسمكه هي المكونات والمقادير :-

المكونات سمنه او زبده و دقيق ولبن وملح وفلفل اسود و جوزة الطيب وجبنه موزيرلا او مبشوره (حسب الرغبه).

اول حاجه هتحتاجيها ان السمنه او الزبده تكون نفس مقدار الدقيق او اقل بمقدار الثلث ،يعني لو هتحطي معلقتين سمنه هتحطي معلقتين من الدقيق او تلت معالق سمنه ومعلقتين دقيق .

ابدئي حمري الدقيق مع السمنه واستمري في التقليب لحد ما يوصل للون الذهبي او الابيض المايل للذهبي او الاشقر .

ابدئي تضيفي الحليب تدريجيا علي نار هاديه مع التقليب المستمر تفضلي تقلبي لحد ما يكون الباشميل بقوام متماسك ،ابدئي ضيفي الملح والجبنه المبشوره .

الباشميل عشان يطلع مظبوط محتاج انك تفضلي تقلبيه طول الوقت لحد ما توصلي للقوام المناسب معاكي ، لا تتركيه علي النار بدون تقليب مستمر عشان هيبدا يقطع ويبوظ منك .

حاولي يكون اللبن ساقع عشان لو سخن في الغالب هيبدا الدقيق يكلكع ويكون كور صغيره في الباشميل ومش هيبقي صوص متماسك ، زودي اللبن بالتدرج علي مراحل واستمري في التقليب كل ما تزودي لبن ، متزوديش لبن كمية كبيرة مره واحده عشان متتفاجئش ان الباشميل خف زيادة عن اللزوم .

وانتي بتضيفي اللبن بالتدريج علي الدقيق المتحمر هدي النار خالص او ممكن كمان تشيلي الحلة لمدة دقيقتين علي العين المطفيه لغاية ما تقلبي وتظبطي الصوص وترجعي تحطيها علي النار مره تانيه .

لو مبتعرفيش تظبطي صوص الباشميل بنفسك عن طريق التقليب تقدري تحطي كل المكونات في الخلاط العادي وتضربيهم مع بعض هيطلعلك الخليط من غير كلاكيع او مشاكل وهيطلعلك قوام كريمي متماسك ، هتحطي الخليط علي نار هاديه وتسمري في تقلبيه لغاية اما توصلي للقوام اللي هتحتاجيه .

الافضل تضيفي الفلفل الاسود والملح علي اللبن قبل اضافته للعجين او الدقيق المتحمر ، عشان الفلفل الاسود ميكلكعش ويبدا يدي شكل مش محبب .

لو حابه تعمليها كشوربة وطلعت تقيله شويه زودي شوية شوربه او لبن واستمري في التقليب هتلاقي قوامها بقي اخف ، ولو حابه تخففيها اكتر زودي لبن اكتر وهكذا ، لكن زودي زيادة تدريجيه بسيطه عشان ميخفش اكتر من اللازم وترجعي تتضطري تتقليه مره تانيه .

لو حباها كباشميل متماسك او كثيف وطلعت خفيفه وحابه تزودي سمكها استمري في تقليبها علي النار لحد لما تتقل ولو تقلت بس مش بالقدر المرغوب ، ابدئي جيبي حله جديده وحمري فيها معلقتين دقيق مع السمنه زي الخطوه السابقه لغاية لما توصل للون الاشقر او الدهبي وضيفي عليها الباشميل اللي كنتي عملاه من الاول وحابه تتقليه تدريجيا

يعني لو هتحطي 2 معلقه دقيق حطي 4 اكواب من اللبن لو هتحطي 4 معالق من الدقيق حطي 8 اكواب من اللبن ، هتقدري تعمليها بسهوله وفي نفس الوقت تقدري بعد كده تخفيفها او تكثفيها زي ما تحبي .

تقدري تضيفي بيضه علي الباشميل وتخلطيهم مع الباشميل كويس عشان تطلع مايه للون الاحمر .
تقدري توزعي البيضه علي وش الباشميل عشان وشها يظهر باللون المايل للاحمر .
تقدري تخلطي علي اللبن شوربه هيخلي طعم الباشميل افضل .
تقدري تضيفي معلقه اومعلقتين من القشطه علي وش الباشميل قبل ما تدخل الفرن .
لو حابه تضيفي جبنه موزيريلا علي الوش فيفضل تضيفها والمكرونة نص سوي وتضيفيها علي وشها عشان المكرونة تطلع بتشد.