مبروك! سواء أنتي منظرة طفلك الأول أو الرابع ممكن تبقي مش عارفة ازاي تجهزي بأفضل شكل لاستقبال العضو الجديد في أسرتكم. من المعتاد أن الأهل بيكونوا خايفين قبل وفي الأسابيع الأولي من وصول المولود الجديد. لو جهزتي بيتك واشتغلتي علي علاقتك مع شريكك هتقدري تستعدي لوصول المولود الجديد بنجاح.

  •  التعامل مع المخاوف والهموم

تعاملي علي أنه الخوف شئ طبيعي. المولود الجديد ممكن يسبب خوف وقلق كتير عند الأهل لأنه حجمه صغير وشكله بيوحي أنه “سهل الكسر” وبالتالي الأم بتبقي متواترة وبتسأل نفسها هل هقدر أعتني بالطفل؟ هل هكون أم كويسة؟ هل هأذيه؟ من المهم أنك تبقي عارفة أن دي مشاعر طبيعية. اتكلمي مع أهلك وأصحابك والدكتورة بتاعتك عن أي مخاوف أو أفكار جواكي.

  •  احضري محاضرات الأمهات الجدد

لو أنتي منتظرة طفلك الأول أو محتاجة حد يفكرك ازاي تعتني بالطفل الرضيع يبقي ممكن تحضري كورس من الكورسات المخصصة للأمهات الجدد والي بيعلمك حاجات زي:

ازاي تمسكي البيبي
ازاي تحمي البيبي
ازاي تلبسي البيبي
ازاي تغطيه وتلفيه بالغطا
ازاي ترضعي الطفل وتساعديه علي التجشؤ
ازاي تنضفي الحبل السري
ازاي تعتني بالطفل بعد الختان
بعض المعلومات الطبيية وازاي تقيسي حرارة البيبي
ازاي تهدي البيبي

  •  ابحثي عن طبيب أطفال

ابدائ البحث مبكرا عن طبيب أطفال لأنك هتحتاجي تاخدي طفلك للمتابعة مع طبيب بعد الولادة عشان يتابع صحة الطفل ونموه مع الأيام والشهور. اسئلي أصحابك وأهلك لو عندهم طبيب يرشحوهولك. في حاجات مهمة تسألي عليها وأنتي بتدوري علي طبيب أطفال:

هل الطبيب بيتعامل مع شركة التأمين الخاصة بيكي؟
مواعيد العيادة
هل الطبيب بيدي الأمهات رقم تليفونه عشان يجاوب علي أي أسئلة طارئة؟
مكان العيادة

  •  جهزي بيتك

جهزي غرفة أو مساحة للرضيع. مهما كان بيتك صغيرا سواء كان شقة أو فيلا لازم يكون في مكان للطفل ينام فيه. وكمان هتحتاجي مكان لتخزين أشياء الطفل زي الحفاضات والملابس.

متقلقيش بخصوص المساحة المتاحة في بيتك الرضع مش بيحتاجوا مساحة كبيرة في الشهور الأولي من حياتهم.
ادهني غرفة منفصلة كغرفة مخصوصة للطفل وعلقي فيها الزينة أو في الركن أو المكان المخصص للطفل في بيتك. ممكن تزيني باختيار ألوان تتناسب مع نوع الطفل سواء ذكر أو أنثي.
خدي بالك انك تستخدمي دهان غير سام لو قررتي تغيري لون الغرفة
أتاكدي أن المساحة المخصصة للطفل في بيتك هتكفي السرير الي هتشتريه للطفل.
ممكن كمان تخصصي مكان في مطبخك للببرونات واللبن الخاص بالطفل لو هتستخدمي لبن صناعي ومعقم الببرونات.

  •  اشتري الأساسيات

ممكن تبدأي تشتري الأشياء الأساسية الأول وهي الحاجات الي هتحتاجيها بالتأكيد لما مولودك يوصل بالسلامة. أغلب الحاجات ممكن تشتريها جديدة أو مستعملة. تجهيز الحاجات دي قبل الولادة هيسهل عليكي عملية الإنتقال لمرحلة الأمومة. من الحاجات الأساسية الي لازم تبقي عندك:

كرسي العربية وتأكدي من الماركة والنوع أنه مطابق للمعايير.
مهد أو سرير مطابق لمعايير الأمان.
فرش زي المرتبة والملايات الي فيها استك عشان تمسك في المرتبة.
ببرونات وتيتينا ومعقم للببرونات.
ترابيزة غيار أو مشمع تغيري عليه للطفل.
حفاضات بمقاس الرضع.
كوفرته.
بعض الملابس وخصوصا الفانلات الداخلية
المناديل المبللة.
غسول للأطفال وشامبو للرضع.

  •  جهزي حقيبة المستشفي

في الأسابيع الي قبل الولادة، جهزي شنطة المستشفي والي فيها الحاجات الي هتحتاجيها في المستشفي ليكي وللبيبي والي هيبقي من ضمن الحاجات الي فيها:

ملابس مريحة وشبشب مريح.
الأشياء الخاصة بيكي زي فرشاة الأسنان والشعر والشامبو.
حفاضات
ملابس للطفل
كوفرته للطفل.

  •  اتعلموا عن الأطفال

في معلومات كتيرة متاحة ممكن تساعد الأب والأم في الاستعداد لاستقبال المولود الجديد. اسئلي طبيبك عن المعلومات والنصايح وممكن كمان تستفيدي من خبرات الأسرة والأصدقاء. حضري نفسك كمان عن طريق قراءة الكتب والمواقع المخصصة لفترة الحمل والولادة. كمان في دورات بتكون مخصصة للأمهات الجدد والحوامل هتساعدك في التعلم والتحضير الجيد للمولود الجديد.