ممكن تكون طالب متفوق جدا وحلم حياتك في كليه من الكليات العلميه بس خايف جدا ومرعوب من ” الفيزياء ” أو بمعني أصح بعبع الثانويه العامه زي ما انت وغيرك كتير من الطلاب مطلقين عليها ، مع أنها للأسف ماده من أبسط المواد اللي لو أتبعت خطوات بسيطه في مذاكرتها هتقدر بسهوله تفهما وتحصل علي الردجه النهائيه فيها وهما كالآتي :

  • ركز علي فهمها

الفيزياء من المواد اللي محتاجه منك بشكل كبير أنك تفهما ، وتبدأ تسال نفسك في كل نقطه وأنت بتذاكرها ، النقطه دي جات منين وايه الهدف منها وتفسر كل شئ وتربطه بحاجه معينه وبعد نهايه النقطه الواحده في درس معين ، أربطيها بالنقطه اللي ذاكرتها قبل كدا وخليك فاهم العلاقه بين كل النقط والهدف منها ..

  • أحفظ بعد ما تفهم

لو فهمت بس وكنت متميز جدا وقادر تفهم كل درس بسهوله ، بعد فتره هتنساه ومش هتقدر تفتكر اي حاجه لأنك ببساطه محفظتش كويس اللي فهمته ، وخليك متأكد انك لو فاهم كل نقطه قبل ما تحفظها هتقدر تحفظها بسهوله كبيره وتكررها كذا مره وهتثبت في ذاكراتك .. فبلاش تعمل الصعب ” الفهم ” وتسيب السهل ” الحفظ ” بحجه أنا مبعرفش أحفظ ! ..

  • حل أسئله كتيره

* بعد نهايه كل درس من دروس الفيزياء هات كل الأسئله في جميع الكتب بدايه من الكتاب الخاص بالمدرسه الي جميع الكتب الخارجيه وبعد الأنتهاء منها كلها ، دور في أمتحانات السنين السابقه علي أي أسئله خاصه بالدرس اللي أنتهيت منه وحليها ..

* دا هيساعدك بنسبه 100% أن المعلومه تفضل ثابته في دماغك ومتنسهاش بسهوله ، الي جانب أنك لو حليت بس أمتحانات السنين السابقه وركزت علي نقطه الحل وخصوصا في الفيزياء وذاكرت اجابات الاسئله هتقدر تجيب فيها في الغالب درجه كويسه ..

  • متزكرش فقط المسائل

من اكبر المشاكل اللي ممكن توقع فيها في مذاكراتك للفيزياء هي تركيزك طول السنه علي حل المسائل وخاصه المسائل الصعبه وترك النظري تماما ، دا خطأ كبير ولازم تتفاده بأنك تذاكر النظري وتفهمه وكذلك المسائل ومتسبش حاجه لنهايه الترم علشان متتوترش بشكل كبير وتحس أنك مش قادر تذاكر حاجه ..

  • نصائــــح

بلاش تتعود طول السنه علي الصعب لأن في أوقات كتيره امتحان الفيزياء ممكن يجي سهل ، فأنت متتصدمش .
أبدا اجابتك في حل الفيزياء بالتحديد بالمهم ثم الأقل أهميه ..
أثناء حلك للنظري دعم أجابتك بالقوانين والرسومات لو كان متوفر ..
بلاش تتعامل مع الفيزياء انها من أصعب المواد لأنها مش كدا وغيرك كتير جاب فيها درجات كويسه جدا حتي لو الأمتحان كان صعب
بلاش توتر نفسك طول السنه بأصعب المسائل ، وحاول تفهم المسائل مش تحفظها .