شغل البيت من الحاجات اللي بتبقي حمل ثقيل علي الزوجة من طبخ وغسيل وتنضيف وترويق زائد تربية الأطفال ورعايتهم وكمان الشغل لو كانت امرأة عاملة ، أحيانا الزوة بس بتبقي محتاجة بعض المساعدات من زوجها في بعض الأوقات عشان يقلل من الضغوطات والحمل عليها وتقدر تعيش حياتها بدون معاناة طول الوقت ، أحيانا الزوجة بتلاقي نفسها اتجوزت زوج مش متعود يساعد في مهام البيت اطلاقا ساعتها بتصاب بنوع من الصدمة ومش بتبقي عارفة تعمل ايه .عشان كده في المقال ده هنقولك ازاي تخلي جوزك يساعدك في البيت .

  •  متطوعيش بعمل كل شيء

غالبا الزوجة في اول الزواج بتبقي حاسه انها عايزة تطلع افضل ما عندها وترضي زوجها وتريحه ودي نيه حسنه لكنها بيترتب عليها مشاكل كتير بعد كده ، بتبدأ الزوجة تتبرع بعمل كل شيء واحيانا بتوصل بالاشياء اللي بتخص الزوج زي تصليح العربية او الوقوف مع العمال لتصليح بعض الأشياء بالمنزل ، بعد فترة هيتعود الزوج علي رمي كل الاحمال علي عاتق الزوجة ومع زيادة المسؤليات ووجود الأطفال بيتحول الوضع الي وضع سئ مش بتقدر الزوجة تتحمله .

حاولي من البداية متطوعيش بعمل مهام غير خاصة بيكي الا في بعض الأوقات العصيبه قومي بمساعدته اذا حسيتي ان الوضع يحتاج المساعده لكن متقوميش بتحمل المهام كامله .

  •  اطلبي طلبات صغيرة

مش من المنطقي انك تبدئي تطلبي طلبات كبيرة من زوج مش بيساعدك علي الاطلاق ،اطلبي منه في البداية لفترة طويلة طلبات صغيرة زي انه ياخد الكيس الخاص بالزباله معاه ويرميه او يشتري طلبات البيت او يحط الاكل ويشيله بعد الاكل وقوليله ان الحاجات دي هتساعدك تعملي حاجات تانيه بدلها وهتريحك واشكريه علي مساعدتك وحسسيه دايما ان ده بيبسطك لفترة طويله بعدين ابدئي زودي الأشياء تدريجيا .

  •  متزوديش سقف توقعاتك

أحيانا اللي بيسبب صدمه للزوجة انها دايما تكون حالمه بزوج مثالي هيساعدها في كل أمور البيت ونعم ده مش من المستحيل ولكن مش كل أنواع الأزواج بيساعدوا بالشكل ده لانهم غالبا بيعتبروا ان أمور البيت أمور بسيطة وغير مرهقة وانهم عليهم ضغوطات اكبر بكتير …

اذا كان زوجك من النوع اللي مش بيساعد علي الاطلاق ومش متعود من بيت الاهل انه يساعد متزوديش من سقف توقعاتك وحاولي تديه المهام الصغيرة وتجنبي مقارنة زوجك بازواج صحباتك لان ازواج صحباتك بيهم عيوب ولكن عيوب مختلفة ، تجنبي المقارنة .

  •  اتكلمي معاه واشرحيله

في معظم الأوقات بتعتبر الزوجة ان الزوج هيفهم متطلباتها من غير ما تقوله وان هيجي يوم وهيستوعب لوحده وفي معظم الحالات بيستخدموا الصمت كوسيلة للتعبير وبتحصل خلافات ومشاكل والزوج مش بيفهم اللي الزوجة عايزه توصله ،

اطلبي منه مباشرة واتكلمي معاه بلطف واشرحيله انك محتاجة مساعدته وانه يشاركك ، تجنبي انك تتكلمي معاه وقت غضبك حاولي تنتقي وقت تتكلمي معاه فيه بشكل لطيف وتشرحيله ان البيت ليه مهام كتير غير الصورة الكامله اللي هو بيشوفها وان مشاركته ليكي في بعض الأشياء الصغيرة ممكن تسهل عليكي حاجات كتير .

  •  تجنبي تصيد الأخطاء

خطا شائع بيقع فيه كتير من الزوجات اول ما زوجها يبدا يساعدها تبدا تطلعله كل العيوب اللي عاملها اثناء مساعدته وتبدأ بانتقاده وده بيخليه ميحاولش يعيد التجربة مرة تانية …

خليه يعملها حتي لو مش بالشكل المطلوب الانتي عوزاه وراجعي انتي عليها فيما بعد من غير ما توضحيله ده ،قوليله دايما انه بيقدر يعمل الحاجه دي بشكل افضل منك واسرع ومع الوقت ابدئي نبهيه بأسلوب لطيف في وسط الكلام من غير ما توجهي كلام مباشر علي الخطا اللي بيعمله .

  •  اديله وقت

عدد كبير من الزوجات بتطلب الشئ في اخر وقت فتضطر تستخدم أسلوب الزن عشان يستجيب لطلباتها ، حاولي تطلبي الحاجه قبلها بفتره وتديله فرصه يعملها من غير استعجال او زن وابدئي فكريه بعد فتره لو نسي وهتلاقيه عملها بشكل افضل من طلبها في اخر وقت مع الزن ، لان ده بيبقي من اكتر الأشياء المزعجة بالنسبة للزوج .