كل ام هتستغرب هو في اطفال مش بيحبوا امهم ،بالفعل كل الاولاد بيحبوا امهم وكل ام متاكدة ان اولادها بيحبوها ، لكن الحب درجاته مختلفة في ابن ممكن مينامش لو مامته او باباه في حاجه مزعلاهم وفي طفل بالنسباله عادي …

اول مبدا عشان تقدري تربي اولادك صح ويتقبلوا توجيهاتك ونصايحك وبالتالي يهتموا لزعلك انك تبني علاقة قوية جدا بينك وبين اولادك ، العلاقة القوية مبتتكونش من تلقاء نفسها لمجرد ان في حب فطري بين الاهل واولادهم لكن بيجي بالمجهود والصبر ،من المهم انك تعرفي ان كل حاجة الشخص بيزرعها في الاخر بيحصد نتايجها وعشان تقدري تحصدي زرعة لازم تبذلي مجهود عشانها وتهتمي بيها وترويها وتصبري عليها لغاية لما تكبر .

التربية مش بس اني اأكل ابني واشربه والبسه هدوم نضيف ، التربية مش الاهتمام بالاولاد جسديا وبنضافتهم وبس التربية اني اهتم بيهم نفسيا زي ما بهتم بصحة جسمهم ، اعرف ايه اللي بيبسطهم وايه اللي بيزعلهم ، بيحبوا ايه وبيهتموا بايه ،وان الاهل يكونوا الملجأ الاول لاولادهم في مشاكلهم ويتعلموا ازاي يسمعوهم ويتقبلوا الاختلافات وامتي وازاي اتكلم وانصحه وامتي اسكت واسمعه ،عشان علاقتك تكون قوية مع اولادك لازم تقدري تعرفي اهتمامتهم وتشاركيهم فيها وتلعبي معاهم وتديهم الحب والاهتمام…

دي اهم خطوة متوقف عليها نجاح بقيت الخطوات ، لان مهما تستخدي من وسايل واولادك مش حاسين بتاثيرك في حياتهم الا علي المستوي الجسدي بس هيبقي صعب تاثري عليهم ، وده مقال هيساعدك تعرفي الحاجات اللي هتقوي علاقتك بيهم ازاي اتعامل مع بنتي العنيدة ؟

  •  متطلبيش حاجات كتير في نفس الوقت

متطلبيش اكتر من طلب من ابنك في وقت واحد ، لانك اول ما تناديه ويرد عليكي يلاقي نفسه بيسمع قايمه من الطلبات ،هيخليه بعد كده يحاول ميردش او ميسمعش اي حاجه من اللي بتطلبيها منه ، اطلبي طلب واحد او اتنين وبعد فترة علي الاقل اطلبي طلب تاني .

  • متناديش اسمه كتير

متناديش اسم ابنك باستمرار وراها فعل امر ، علي سبيل المثال احمد رتب اوضتك ، احمد انزل اشتري حاجه ، احمد شوف اخوك بيعيط ليه وهكذا كتر الطلبات هيخليه ميستجبش في كل مره تناديه فيها ، اطلبي منه المساعده في الحاجات المهمه .

متطلبيش كل حاجه من شخص واحد ،دايما هتلاقي في حد من اولادك بيساعدك اكتر من اخواته فهتبدئي كل ما تحتاجي حاجه تطلبيها منه ، مع الوقت هيحس ان محدش بيتنادي اسمه وبيتطلب منه حاجه في البيت غيره ، قسمي المهام بين اولادك حتي لو في ابن بيساعدك بصعوبه لانك لو اتعودتي متطلبيش منه حاجه مع الوقت هيتعود انه ميساعدكيش ولا يساعد حد علي الاطلاق .

  •  قسمي ايام الاسبوع عليهم

عودي اولادك من وهما صغيرين ان كل شخص عليه يوم مسئول فيه عن نضافة الاماكن المشتركة اللي بتستخدموها كلكوا زي الحمام او المطبخ واوضة المعيشة خلي كل شخص عليه يوم لو عددكوا وليكن 4 يبقي كل شخص عليه يوم وترجعوا تعيدوا الترتيب من اول وجديد .

اتفقي مع كل البيت من وهما اطفال ان كل شخص مسئول عن نفسه ،نظافة غرفته ولبسه والاطباق اللي بياكل فيها واتعودي متعمليش المهام بتاعتهم بدلا منهم لانهم مع الوقت بيتعودا ان في بديل وهتلاقي المسؤليه كلها عليكي لوحدك .

خليهم يحبوا انهم يتعاونوا في تنظيف البيت ، اربطي دايما بين البهجة والتنضيف او الترتيب ، بانك تشغلي اغاني مفرحة وترشي البيت بمعطرات ولو اطفال صغيرين خليهم يساعدوكي كانكوا بتلعبوا لعبة ، ده هيربط في ذهنهم التنضيف والترتيب بالبهجه والسعادة ، علي عكس لو دايما بتزعقي وبيحصل مشاكل وخلافات وبتكوني متعصبه اثناء التنضيف ده هيولد في دماغهم شعور بالنفور اتجاه الشئ ده وهيكرهوه .

  •  كافئيهم

بعد كل سلوك ايجابي بيعمله ابنك من الضروري انك تشجعيه وتكافئيه ببعض الكلمات اللي تسيب في نفسه اثر ايجابي زي انك تقوليله انك بتحبيه وشكرا لانك دايما بتساعدني وهكذا ،الانسان دايما بيميل انه يكرر السلوكيات المربوطة باثر ايجابي ويتجنب السلوكيات اللي مربوطة باثر سلبي ، اربطيله دايما السلوكيات الايجابيه بالتشجيع والمدح اللفظي والمعنوي .

لازم تعملي عندك ورقة لكل ابن بالحاجات الايجابيه اللي عملها وكل ما يوصل لعدد معين من الحاجات الايجابية كافئه بهدية او بخروجه او بحاجة حلوه بيحبها وهكذا مع الوقت هيكون السلوكيات الايجابية دي من ضمن عاداته الاساسية .

  •  عاقبيهم

من المهم ان الاب والام يجمعوا بين اسلوب المكافئة والعقاب ، من الغلط ان الاباء يدللوا ابنائهم بالشكل الزائد فميستخدموش العقاب المعتدل اطلاقا او يعاقبوهم بشكل مبالغ فيه او ميكافؤش اولادهم بالشكل اللي يستحقوه .

في أساليب كتيرة لعقاب الأولاد إذا أخطؤوا، ولكن العقاب غالبًا بيؤدي لنتايج مؤقتة فقط ، لوحظ إن كتير من الأبناء بعد العقاب بيمتنعوا عن فعل الشيء اللي اتعاقبوا عليه لفترة وبيرجعوا لنفس الفعل بعد فترة قصيرة .

من المهم على الاهل انهم يراعوا اساليب وطرق العقاب السليمة عشان يقدروا يعدلوا من سلوكيات وافكار اولادهم، ويتفهموا ان مش كل العقاب ضرب ،ويبعدوا عن الضرب اطلاقا . ازاي اعاقب ابني من غير ما اتسبب في اذيته ؟

من طرق العقاب دي انك تحرمه من حاجة معينة بيحبها او من مصروفه او لعبه معينه وهكذا لكن من المهم ان العقاب ميكونش في حاجه من احتياجات الابن الرئيسية زي الاكل او التعليم الخ .. من الحاجات الاساسية .

حاول تلفت انتباهه للحاجه اللي محتاجها منه اكتر من مره لو كان متجاهلك او مش منتبهلك استخدم اي طريقة من العقاب السوية عشان يبدا ينتبهه لكلامك ، لكن احذر الاكثار من العقاب المتكرر باستمرار والعقاب الجسدي لان كل بتاثر بالسلب مش بالايجاب .

  •  تقبلي الاختلاف

من المهم علي الام انها تكون مستوعبه ان اولادها مش شرط يكونوا بيعملوا نفس تصرفتها وهي صغيره وتفضل في مقارنه طول الوقت بين اللي كانت بتعمله واللي هما بيعملوه دلوقتي ، اعرفي ان كل زمن مختلف عن التاني وان كل شخص ليه تصرفاته وطريقة فهم واستقبال للمواقف مختلفة عن التاني ،تقبلي الاختلاف وحاولي تتفهميه وتتعاملي معاه ،واسمعيهم علي قد ما تقدري عشان تقدري تفهميهم اكتر .

  •  اطلبي من الاب يساعدك

من المهم ان الاب يكون بيساعدك ويكون له دور في حياة اولاده حتي لو ظروف شغله صعبه ، بعض المساعده البسيطة منه والتوجيه والعقاب هتسهل عليكي حاجات كتير ، ومن الخطأ ان الام دايما تكون متصدره المشهد ومصدر لكل حاجه في البيت لان في بعض الامور بتبقي محتاجة حزم من جهة الاب ، اطلبي منه دايما انه يكون بينصحهم وبيكافئهم وبيعاقبهم ويشاركك في تربيتهم.

  •  عرفيهم عواقب تصرفاتهم

لو بيتجاهلوا دايما كلامك ومش بيحاولوا يعتمدوا علي نفسهم ، سيبي غرفهم وملابسهم والاشياء الخاصة بيهم مش نضيفه ، هيجي ابنك يخرج مش هيلاقي حاجة يلبسها نضيفة فهيضطر انه يغسلها ، هيجي ينام هيلاقي المكان مش نضيف فيضطر ينضفه وهكذا ، لو اولادك مش بيهتموا لكل ده هنا دور الاب انه يتدخل ويعاقبهم اذا مستجابوش وبقوا مسؤلين عن الاشياء الخاصة بيهم .

  • نصائــــح

خلي العقاب في الاشياء المعنوية مش الجسدية ، لان العقاب في الاساس هدفه تعديل السلوك مش ايذاء والمه .