مفيش طفل بيتولد مبيحبش النظافة والجمال والتنظيم لكن الطفل بيشوف شوية متغيرات في المحيط اللي هو عايش فيه بتخليه ينسي الفطرة اللي اتخلق عليها وبتحوله انسان مستهتر بالنظام ،وعشان تخلي ابنك منظم اتبعي الخطوات التالية :-

صعب جدا تقدري تقنعي الطفل انه ميرميش العابه او اي حاجة تخصه أو متخصوش وهو شايف كل الجو اللي حواليه مش منظم لان الطفل بياخد باله جدا لو في اي حاجة مش في مكانها الطبيعي

ولان الطفل مبيتعلمش بالكلام فلازم يشوف كل حاجه جنبه مرتبة وفي مكانها الصحيح ,وميشوفش حد وخصوصا الاب بيرمي حاجة مش مكانها

الطفل من اول ما يتولد لحد 3سنين بيبقي بيركب جواه صورة لكل حاجة حواليه وبيستوعب كل شئ، ولما يشوف دايما انك انتي وكل الأسرة لما بتصحي من النوم بترتب سريرها هيتثبت قدامه إن من البديهي جدا وشئ اساسي انه لما يصحى بيرتب سريره، وده هيخليه يتعود علي فكرة النظام في كل حاجة في حياته ،لان الطفل لازم عقله يمتص صورة للترتيب والنظافة والجمال عشان دايما يكون محافظ أنها موجودة

لما الطفل بيشوف ان في حد بينضف مكان حد تاني بيفهم ان ده الطبيعي زي مافي حد بيشيل مكانك ان هو كمان في حد هيجي ويشيل مكانه ومش هيتعلم يرتب حاجته بنفسه وبالتالي مي هيقدر يعرف فكرة النظام

ولو كنتي متطرة تستعيني بحد ينضفلك البيت يبقي تجبيها في وقت يكون الطفل مش موجود فيه في البيت او تعملي معاها او علي الاقل ميكونش استعانتك بيها كتير

سبب ان الطفل لما يحط لعبة على الأرض ميشلهاش بعد مايلعب بيها ان بيكون عقله اتبرمج علي انه ممكن يشيلها في اي وقت تاني لانه بيكون شاف اي حد قدامة أجل شغل وراه زي انك ممكن تغسلي المواعين وتسبيها علي الحوض شوية وبعدين تشيليها او باباه بيرجع من الشغل يحط هدومه شويه بعدين يشيلها وغالبا انتي اللي بتشيلها

ولما تسالي الطفل وتقوليله ليه اللعبة دي مرمية علي الارض مش هيعرف يرد عليكي لانه بيعملها من دون إدراك لان عقله بيكون اتبرمج علي كده ،فعشان وعشان تساعدي الطفل يكون منظم لازم تخلي بالك من تصرفاتك قدامه

لو كافأتي الطفل لما تشوفيه بينظم ويرتب اغراضه هيحس ان ترتيبه لاغراضه شئ مش طبيعي وحدث يستحق المكافأه لكن الطفل لازم يحس انه ترتيبه لاشيائه شئ طبيعي زي الاكل والشرب والنوم، عشان كده بلاش تكافأيه لما يرتبها

لو الطفل علي طول شايف الدنيا مش مرتبه حواليه ولا منظمة وجيتي تقوليه شيل العابك مش هيستوعب الكلام وهيعاند قصادك وممكن يساومك زي انه يقولك هشيلها بس اعمليلي كذا

والحل انك تبدأي تنظمي قدامه كل يوم وتخلي كل البيت يبدأ ينظم نفسه وحاجته ويبدأ يشوف الطفل ده قدامه فهيبدا يشارك معاكوا وينظم حاجته وهيكون مبسوط وكمان هيبدا يساعدك في ترتيب البيت لانها هتتحول عادة عنده بيحبها

اولا لما بتطلعي للطفل كل العابه مرة واحدة بتخليه مش مركز ومشتت وكل شوية بيغير اللعبة اللي بيلعب بيها ومبيستفدش بحاجه منهم ومن وهو صغير هيتعود علي كده، ولما يشوفك دايما بتطلعيله لعبه يلعب بيها ويخلص وبتشليها مكانها وتطلعيله غيرها هتبرمجي عقله أن لكل حاجة مكان وهيعرف يتأقلم علي النظام

ثانيا عشان يتعلم يكون منظم لازم يبدا يتعلم ده من خلال ألعابه عشان لما هيلعب بلعبة ويزهق منها يشيلها ويطلع غيرها هيتعلم يكون منظم في وقته ويرتب أولوياته وينظم حياته ويكون متوازن في كل شئ

عشان الطفل يقدر يكون منظم ساعديه علي التنظيم من خلال تسهيلات هتعمليها له زي انك تحطيله العابه علي أرفف عشان يكون من السهل انه يحبها ويحطها مكانها ،لكن لو محطوطين في صندوق أو كرتونه هيكون صعب عليه يفهم فكرة التنظيم وده لانه لما بيجي يحط لعبة او يشيلها بيفضل كتير يدور عليها وغالبا بيقلب كل الصندوق عشان يوصل للعبة معينة وبيكون صعب علي عقله يفهم ان ممكن يرتب اغراضه

ابنك بيتعلم منك فلازم تكوني منظمة وكل الأسرة كذالك عشان بيتعلم منكوا
متعاقبيش الطفل علي انه مش منظم لانه مبيتعلمش الاهمال من نفسه والتربية هي السبب الوحيد في أن الطفل يكون مش منظم او يكون منظم
عشان تساعدي الطفل يكون منظم متحسسيهوش انه مذنب وتبصليه نظرة انه انسان مش كويس وتضايقي منه، لازم تحتضنيه وتحتويه وواحدة واحدة كل حاجة بتتغير