دايما الأم بتشتكي من أن ابنها أو بنتها مش بيحبوا يشاركوا لعبهم أو الحلويات بتاعتها مع الأطفال التانين والأخوات. المشاركة من المهارات المهمة جدا الي الطفل لازم يتعلمها وبتزيد أهميتها لما يبدأ يروح الحضانة لأنه بيتعمل مع أطفال كتير وبيبقي عاوز يكون صدقات وبالتالي بعض المبادئ زي المشاركة واانتظار الدور وغيره بتبقي مهمة لأنها بتعلم الطفل المرونة. عشان تعلمي طفلك يشارك أو يبقي كريم زي ما بنقول اتبعي الخطوات التالية:

  • متجبريش أبنك علي المشاركة

ساعات الأم بتظن أنها لما تجبر طفلها أنه يشارك أنها كدة بتعلموا المشاركة وأنه بتربيه بالشكل ده يطلع كريم مع الاخرين والحقيقة الإجبار والضغط ممكن يجيبوا نتيجة عكسية مع الطفل ويعند ويستخدم الأسلوب ده بعد كدة للانتقام من الأم لما يحب يضايقها لأي سبب. الأفضل أنك تحترمي رغبة الطفل وتسيبيه يشوف رز فعل الأطفال الاخرين أنهم مش عاوزين يلعبوا معاه وبالتالي مع الوقت هيتعلم أنه لازم يشارك ألعابه.

  • كوني قدوة

لو الأهل مش بيسمحوا لطفلهم أبدا أنه يمسك حاجتهم أو أنه يجرب يستخدمها يبقي الطبيعي بالنسبة للطفل أنه يتصرف نفس التصرفات. من أهم وسائل التربية هي القدوة اتصرفي مع طفلك زي ما تحبي أنه يتصرف مع الاخرين. ممكن تسمحيله بأنه يستعمل موبيلك أحيانا مثلا مش لازم توافقي في كل مرة وهو كمان مش لازم يوافق في كل مرة أنه يشارك حاجته.

  • اتفقي مع ابنك مسبقا

ممكن تقعدي مع ابنك مسبقا قبل وجود أطفال تانيين وتساعديه يختار اللعب الي ممكن يشاركها ويشيل اللعب الي مش عاوز يشاركها. مهم نحترم رغبة الطفل في أنه مش عاوز يشارك لعبة بعينها وده هيخاليه يشعر بالراحة النفسية في وجود أي أطفال أنه ممكن يلعبوا بالألعاب الي اخترتوها مسبقا بدون ما يبقي متوتر أو خايف علي لعبة المفضلة.

  • امدحي التصرفات

لو لاقيتي طفلك بيشارك لعبه أمدحي التصرف بوضوح زي “أنت اتصرف بكرم لأنك اديت جوجو لعبتك” اربطي المدح بالتصرف الي الطفل قام بيه.

  • تجنبي الألعاب التنافسية

تجنبي أنك تدخلي طفلك لو هو سنه أقل من ٤ سنوات الألعاب الي بتعلمه التنافس لأنها غير مناسبة بالسن ده ومش هتعزز عنده مبدأ المشاركة. دايما خليه يعلب الألعاب التعاونية الي مش بكون فيها فائز محدد بل الي كل الأطفال مع بعض بيستمتعوا بيها زي الصلصال أو المكعبات.

  • استخدمي عداد وقت

من ضمن طرق تعليم الطفل المشاركة أنك تقوليله أن كل واحد هيمسك اللعبة خمس دقايق مثلا وفعلا استخدمي عداد للوقت أو ساعة الموبيل عشان تحسبي الوقت بدقة وبعد كدة الطفل بيبقي لازم يسيب اللعبة ويسمح لطفل اخر أنه يلعب بيها.