لو بتحسي ان وزنك طبيعي ومش محتاجة تخسي بس دايما في منطقة مضايقاكي زايدة عن بقيت مناطق الجسم او مش متناسقة مع الباقي زي الارداف والجناب او الايد الخ.. ومهما تعملي دايت بتحسي بالعكس ان المنطقة اللي عايزه تخسسيها بتزيد مش بتقل ، في المقال ده هنقولك ازاي تخسسي منطقة زي الارداف من غير ما يتاثر بقيت الجسم في خطوات بسيطة .

  •  متقعديش لفترة طويلة

القعدة لفترة طويلة من غير حركة من ضمن الاسباب الرئيسية لسمنة الارداف والموخرة ، حاولي تتحركي باستمرار او كل فترة ، ولو شغلك علي مكتب مبيطلبش منك انك تتحركي من علي الكرسي كتير حاولي تشتركي في رياضة سواء جيم او سباحة او اي نوع من الرياضة عموما بتحبيه ، ده هيمنع او هيقلل من تخزين الدهون في المنطقة دي .

  •  قللي من الوجبات السريعة

قللي من الوجبات السريعة اللي مليانة بالنشويات والزيوت والدهون لانها من الاسباب الرئيسة للسمنة لو بتفضلي معظم اليوم برة فممكن تجهزي لانش بوكس بيه وجبة الغدا الخاصة بيكي ، وخلي الوجبات السريعة في اضيق الحدود في الظروف الطارئة

  •  متاكليش وتنامي

النوم مباشرة بعد الاكل من الاسباب الرئيسية لتراكم الدهون في الجسم بشكل عام مع وجود مشكلة زيادة الارداف بتكون الارداف هي المنطقة الاولي لتخزين الدهون ، سيبي مسافة ما بين الاكل والنوم ولو لمدة 3 ساعات قبل النوم .

  •  العبي رياضة بتركز علي الارداف

العبي رياضة بتركز علي الارداف زي السباحة او طلوع ونزول السلم يوميا لمدة 10-15 دقيقة ،المشي السريع ، تمارين الزومبا الخاصة بالارداف ، تمارين المقاومة ، نط الحبل ، ركوب العجل ، او عن طريق اجهزة الجيم اللي بتركز علي منطقة الارداف ، كل دي من الرياضات اللي هتساعدك بشكل قوي ومباشر انك تخسسي منطقة الارداف وهتزود من كتلة العضلات وتقلل من حجم الدهون ، هي من اكتر الطرق الفعالة اللي هتجيب نتيجة بشكل مباشر مع الاستمرار عليها

  •  اللف التنحيفي

ظهرت انواع كتير من الكريمات والطرق والادوات للتخسيس الموضعي زي اللف التنحيفي والميثوثيربي ، استعيني بالطرق دي هتساعدك علي التخسيس من السمنة الموضعية لكن عشان توصلي لافضل نتيجة اعملي الجلسات دي مع المداومة علي الرياضة وتقليل الاكلات المشبعة بالدهون .

  •  اشربي ماية كتير

الماية من الحاجات الاساسية لعمية التمثيل الغذائي والحرق عموما ، اشربي علي الاقل لترين ماية باليوم ، وفي بعض تطبيقات الموبايل اللي ممكن تساعدك وتفكرك باستمرار كل كام ساعة بشرب الماية .

  •  استعيني بدكتور

لو اتبعتي اكتر من طريقة ومقدرتيش توصلي للحل المرضي بالنسبة ليكي ، فروحي لدكتور علاج طبيعي وتغذية وهو هيقدر يساعدك توصلي للنتيجة المرضية بالنسبة ليكي بالطرق السلمية والمناسبة ليكي .