ازاى أحسم قرارى ما بين حاجتين

كتير بنيجي في مواقف ونقف منبقاش عارفين نعمل ايه ؟ بيبقي قدمنا قرارين وطريقين ومش عارف ناخد اي قرار فيهم وتمشي في اي طريق منهم ؟ وهل لو مشيت فيه هو ده الطريق الصح؟ او مش هندم عليه ؟ بنفضل محتارين مش عارفين نعمل ايه ؟

خطوات الاختيار الصحيح للقرار الصحيح

حضر ورقا بيضا واقسمها نصين واكتب قرار رقم
1-واكتب مميزاته وايه الفايده اللي هترجعلك من القرار ده وعيوبه او نقط ضعفه او سلبياته بشكل عام
قرارا رقم 2- واكتب مميزاته وعيوبه ورقمهم

شوف عدد العيوب في كل قرار منهم واعرف ايه اللي عيوبه اكتر ؟
واي قرار اللي عيوبه تقدر تتحملها او تتحمل نتايجها او متقبله اكتر بالنسبالك ؟

المقارنه الواضحه والمباشره في خطوات بتسهل علينا اننا نقدر ناخد القرار الصح
بشكل اسهل

هيبقي قدامك اختبارين او قرارين كل قرار فيهم ليه عيوب ومميزات لكن في الاخر في قرار فيهم هيكون الاقرب لهدفك اسال نفسك اي قرار فيهم اللي هيخدم خطتك

متاخدش اي قرار لمجرد انو الاسهل او مميزاته اكتر بغض النظر عن انو هيوصلك لاهدافك او لا ،لان في الغالب القرار الاصعب هو اللي هيكون بيخدم خطتك فحاول
تفكر الاول ومتخليش المميزات هي اللي توجهك لمجرد ان الحاجه دي طريقتها اسهل ،اضمن ،اامن .
احيانا هتبقي في موقف ان قدامك قرارين قرار فيهم هو المريح والاسهل لكن القرار التاني هو اللي هيساعدك انك تكمل خطتك او تاخد خطوه في تحقيق هدفك .

احيانا بتكون المخاطره او اختيار القرار الاصعب هو اللي هيساعدنا اكتر
واحيانا الحاجات المضمونة مبيكونش ليها نتايج مرضيه او علي الاقل مش هتعلمنا حاجات جديده

احيانا بيبقي كتر ترددنا بسبب اننا مش عايزين نتنازل عن حاجه ، عايزين نعمل كل حاجه في نفس الوقت ، عايزين ناخد كل المميزات ونجمعها مع بعض.

احيانا ده بيخلينا منقدرش نعمل اي حاجه منهم لاننا بنبقي وزعنا تركيزنا علي كذا حاجه وشتتنا انتبهنا وفي الاخر ادائنا في القرارين كان ضعيف وبالتالي بنخسر كل حاجه .

تقبل فكرة التنازل وانك مش هتاخد كل حاجه ،فكرة انك تجمع بين كل حاجه في نفس الوقت هي في الغالب بتفشل لازم تتقبل انك هتاخد بعض المميزات وتستحمل بعض العيوب .

هتمسك عيوب كل قرار منهم وهتتخيل اسوء نتايجه اللي ممكن تحصل او متوقعه وقرر ايه اسوء نتايج فيهم اللي ممكن تتحملها ،ولو حصلت هتقدر ترجع تحسن الوضع بعدها وتتحمل نتايجها ،او علي الاقل تبقي متوقع حدوثها او احتمالية حدوثها
عشان لو حصلت تبقي عامل خطة بديلة
خد الترتيبات اللي ممكن تعملها في حين حصلت تقدر تقلل من نتايجها العكسيه عليك او علي الاقل تبقي متوقع حدوثها فمتصابش بالاحباط

حاول تستشير حد من المقربين ليك بس يكون متفهم اهدافك وخطتك مينصحكش بالقرار الاسهل ،او يكون عنده خبره في الحاجه اللي بتساله فيها ويفضل لو كان جرب الحاجه اللي بتستشيره فيها .

عرفه مميزات وعيوب كل قرار منهم بالنسبالك واتناقش معاه كانك بتفكر بصوت عالي مع نفسك واكيد هيساعدك تاخد القرار الصح ،لانه مر بتجارب كتير مختلفه عنك فاكيد هيقولك نصيحه تساعدك .

ايا كان ايه القرار اللي اخدته وايا كان ايه نتايجه حتي لو كانت نتايجه سيئه فانت اخدت بالاسباب وعملت بيها فمتندمش اي كانت النتيجه حتي لو كانت سيئه فانت اكيد هتتعلم منها وهتاخد خبره

حاول تتعلم حاجات كتير علي قدر ما تقدر ، وتخوض تجارب وتنجح وتفشل ،اكتشف حاجات بتحبها وحاول تتعلمها وحاول تقرا كتير في مجالات مختلفه .

التجارب الكتير والحاجات اللي هتتعلمها هتقدر تخليك تقيم الامور بشكل سليم ويبقي ليه وجهةة نظر ورائي في اي خطوة بتاخدها .

حاول تستغل كل واقت في انك تتعلم وتنمي وتتطور من نفسك

الخطوه او القرار اللي هتاخده ايا كان هو ايه فهتستفيد منه وهيعلمك وهيعود عليك منه نفع كبير ولو علي المستوي البعيد .

لكن انك تستسلم لترددك ومتاخدش اي قرار نهائي باستمرار ده هيرجعك
ورا بشكل كبير ، وهتفضل بتندم علي قرارات لو كنت خدتها كان زمان وضعك
وحياتك شكلهم مختلف .

 نصائــــح

جمع معظم المعلومات والتفاصيل عن القرارين عشان تقدر تاخد قرار وانت مكون صوره كاملهه

الندم علي القرار الغلط افضل الف مره من الندم علي عدم اتخاذ القرار من الاساس

لو انت شخصية متردده بطبعك فاحسبها سريعا وخد القرار متقفش كتير وافتكر ان دا مش اخر قرار هتاخده في حياتك