القران الكريم من أعظم العبادات في شهر رمضان، وناس كتير بيكون جواها رغبة في التعبد وقراءة القرآن ولكن بسبب ضيق الوقت مبتقدرش تختم القرآن وده بيسبب ضيق لناس كتير وعدم الرضا عن نفسهم
ودي خطوات بسيطة هتساعدك تقدر تختم القرآن بشكل راضي عنه في الشهر الكريم :-

  •  متقارنش نفسك بحد تاني

اول خطوة عشان تقدر تختم القرآن الكريم في رمضان انك متقارنش نفسك بحد تاني وتدخل في سباقات ونقاشات مين خلص ومين لسه لان ده بيخلي عقلك يركز علي الكمية أكتر من الافادة ،والخشوع وهو الغرض الأساسي من قراءة القرآن وفي الاول و الاخر دي عبادة بينك وبين ربك مش من حق حد يسالك عليها ،وممكن تختم القرآن مرة واحدة أفضل من 3 مرات

وكل شخص وليه ظروفه ومسؤولياته اللي مختلفة عن التاني والقدرة علي كمية وكيفية التعبد، مينفعش تقارن نفسك بيه الحاجة الوحيدة اللي تقارن نفسك فيها مع اي شخص تاني هو المبدأ نفسه”انه يكون بيتعبد وانت لا ”

ولما تقرأ القرآن بتدبر وخشوع وتحس انه فارق معاك هيكون حافز ليك لبعد رمضان انك تمشي علي نفس الطريقة دي، وكمان هيشجعك انك تختمه في كل رمضان

  • تنظيم الوقت

من اكتر الاسباب اللي بتخلي ناس كتير متقدرش تختم القرآن هو توهم ضيق الوقت ، والحقيقة ان دايما وقتنا بيكون بيساعي اكتر من المهام اللي بنحطها فيه، ولكن بسبب عدم تنظيم الوقت بنتوهم العكس وبسبب عدم وضع أولويات لأهم المهام في اليوم

المفروض ان يكون وقت رمضان مقسم ما بين العمل والأكل والدراسة والعبادات والأهل ونقلل من الخروج مع صحابنا بعد الفطار بنسبة معقولة بحيث يكون مرة واحدة في الأسبوع علي سبيل المثال

واستبدال قراءة الكتب بقراءة القران و نرجع لقراءة الكتب بعد شهر رمضان الا لو في وقت فاضي في اليوم

وتخصيص وقت مخصص في يومك لقراءة القرآن ويفضل يكون قبل الفجر أو بعد الفجر ولحد الشروق لان ده بيكون فضله عظيم جدا ، وممكن يكون الوقت ده بعد العصر وقبل المغرب خصص منهم انسب وقت ليك ولو في يوم كنت مشغول فيه تقدر تستبدله بالوقت التاني

  •  تأجيل المسلسلات الرمضانية لبعد رمضان

من الأولويات اللي عند اشخاص كتير في رمضان واللي بتخليهم مش قادرين يختموا القرآن هي المسلسلات اللي بتنتشر جدا في رمضان

ودايما الفضول بيشدنا لو حد حكي موقف من مسلسل انك تعرف الموقف اللي هيحصل بعد كده، وتلاقي نفسك بتتشد للمسلسل بعد كده وبتسمعه بعد ماكنت ناوي انك تختم القرآن وتستثمر وقت رمضان بشكل صح

و لو شدك مسلسل او حد حكي ليك موقف او شفت برومو افتكر ان المسلسل هيتعاد بعد رمضان اكتر من مرة وتقدر تتابعه براحتك وان المسلسل هيتعاد بعد رمضان وتقدر تنزله من على الانترنت بس وقت رمضان هو اللي مش هتقدر تعوضه تاني باي طريقة

  • خصص مكان لقراءة القرآن

بعد ماتكون خصصت وقت لقراءة القرآن يستحب في رمضان انك تكون مخصص مكان خاص بالعبادات بتاعتك تصلي فيه وتتعبد وتقرأ القرآن ويكون مكان مريح للاعصاب وبعيد عن الضوضاء والاجواء اللي ممكن تشتتك

وتهيئة الجو المناسب هيساعدك تحب قراءة القران لأنك كل ما هتحس انك بتستفيد بطريقة ملموسة كل ماهتحب انك تداوم عليها وهتكون فعلا بتفرق في حياتك

  •  استغل وقت المواصلات في حالة الضرورة

لو يومك مرهق أو حصل ظرف طارق ومفيش في اليوم أي وقت هيسمحلك تقرأ الجزء المخصص باليوم ده حاول تستغل وقت المواصلات

وده مش هيكون زي القراءة في مكان هادي لكن هيخليك متفوتش يوم غير وتكون قرأت فيه ولو جزء بسيط ،عشان لو عديت يوم هيشد يوم تاني و هتبوظ النظام اللي مشيت عليه

  • وضع جدول بسيط للشهر

كل ماكان الجدول بسيط كل ماكان هيساعدك تختمه اسرع مثال” الشهر 30 يوم و القران 30 جزء لو كل يوم قريت بمعدل جزء هتقدر تختم القرآن مرة على مدار الشهر والجزء 20 صفحة يعني لو قريت بعد كل صلاة 5 صفحات بس هتقدر تختمة مرة في الشهر