معظمنا اول ما بيخلص امتحانات ثانوية عامة ومع بداية ظهور النتيجة بيبقي السؤال اللي شاغل معظم تفكيره هو ادخل كلية ايه ؟
طب ايه الكليه المناسبة ليا ؟ طب هل الكلية الانا اخترت ادخلها هي فعلا الكلية المناسبة ؟
وعشان السؤال ده فئة كبيرة من الطلبة مبيقدروش يحسموه فبيقع نسبة كبيره منهم فاختيار كليات مش مناسبة ليهم وبيضروا يحولوا بعد سنة من دخول الكليه بعد اكتشافهم ان مش دي الكلية المناسبة ليهم ، او بعدالتخرج من الكلية يقرووا يبدؤا من الاول في كارير مختلف عن دراستهم ، عشان تتجنب كل الاخطاء دي من الاول حاول يكون اختيارك سليم وبناءا علي مجموعة من الصفات .

الموضوع هيتطلب منك ورق واقلام وشوية مجهود عشان يجنبك الوقوع في كل الاخطاء دي .

1 اعرف شخصيتك
في الغالب كل مجال من الشغل بيبقي لازم يبقي ليه نمط معين من الشخصية بيفرضه عليك زي ان في وظايف بتبقي محتاج تبقي شخص عنده ثبات انفعالي بنسبة كبيره بيعرف يتحكم في اعصابه في المواقف الصعبه لو كنت شخص عصبي او سريع الاستثارة من اي موقف ففي الغالب هتبقي بتعاني انك مش قادر تنجح في شغلك ، وفي وظايف بتطلب انك تكون شخص اجتماعي وبيعرف يكون علاقات لو كنت شخص بيحب العزله ومبيفضلش يتعامل مع الناس الا في اضيق الاحوال فهيكون الشغل ده مش من الوظايف المناسبة ليك و هتبقي الوظايف المناسبة ليك اللي بتخلص علي اللاب او الكمبيوتر واللي بتجنبك بشكل كبير التعامل مع عملاء ، من المهم جدا انك تكون بتعرف انت بتحب ايه وبتكرهه ايه ؟ لان الشغل من الحاجات اللي هتقضي فيها معظم يومك في المستقبل ولو مكنتش حابب الكارير الانت فيه والجو العام اللي بيفرضه الكارير ده عليك مش هتقدر تحقق النجاح اللي انت عايزه علي عكس لو كنت حابب الكارير الانت فيه والشروط اللي بيفرضها عليك هتقدر تحقق نجاح بنسبة كبيرة .

عشان تقدر تستخدم الطريقة دي كمان لازم تعرف الصفات اللي بتطلبها كل مجال من اللي بتفكر تنضم ليهم وهل الصفات دي متوفرة فيك ولا لا ؟ ولو غير متوفرة هل سهل اكتسبها وعندي قابلية ام لا ؟

اختبار الشخصيات هيساعدك انك تفصيليا تعرف كل حاجه عن نفسك وكمان هيطلعلك الوظايف المناسبة لشخصيتك والاختبار ده من الاختبارات المعترف بها عالميا .

2 اعرف مواهبك وامكانياتك
لو عندك موهبة معينة شايف انك شاطر ومميز فيها وبتحبها فتقدر تحولها لمهنتك في المستقبل وكل ما كنت بتحب الحاجة دي نسبة نجاحك فيها هتبقي اعلي ، لو عندك موهبة زي الرسم او زي انك شاطر في رياضة معينة ادخل تخصصات ليها علاقة بموهبتك زي فنون جميلة او فنون تطبيقية او تربية فنية تربية رياضية ، خصوصا لو كنت من الناس اللي مبتقدرش تذاكر نظري كتير وبتفضل الشغل العملي اكتر ، وافصل تماما اختيارك عن وجهة نظر الناس في الكلية دي ، نجاحك مرتبط بميولك وامكانياتك انت مش بوجهة نظر الناس فيها ، اعرف التخصصات جوه كل كليه والفرق ما بينهم واختار اكتر مجال يناسبك .

3 جمع معلومات عن كل التخصصات
كتير مننا بيدخل كليات علي اسمها بس زي سياسة واقتصاد او اعلام الخ ومبيبقاش عارف التخصصات اللي جواها ايه بالظبط ولا هيطلع ايه منها ؟ وممكن يبقي عنده اعتقاد انه دخل سياسة واقتصاد هيبقي سفير واعلام هيبقي مذيع طبعا ده شيء ممكن لكن الأهم انك تحط كل الاحتمالات وتبقي عامل حسابك عليها حاطط كذا خطة بدلية لو الاولي مقدرتش تحققها عشان من الأساس يبقي اختيارك سليم .

جمع معلومات كاملة عن كل التخصصات اللي محتار ما بينها واعرف جوه الكليات تخصصات ايه ؟ والتخصصات دي بتدرس ايه؟ فالمهارات اللي هكتسبها دي هتنفعني فعلا في سوق العمل ولا لا ؟ وهكذا ، اسال ناس جوه الكليات دي بيدرسوها هما اكتر ناس بيبقوا عارفين تفصيليا الأقسام اللي جوه الكليه ومزايا كل قسم وعيوبه .

4 متخليش حد يختارلك
مع بداية ظهور النتيجة فبيحصل سيناريو من اتنين ياما بتجيب مجموع عالي فبيبقي فرض عليك دخول كلية معينة ومينفعش تختار غيرها لان هي دي القمة بالنسبة لكل الناس حواليك سواء اهلك او صحابك الخ .. وبالنسبة لمعايرهم ، او بتجيب مجموع اقل فبتبدا تختار من بين كام كلية وتخصص معينين بيدا اهلك واصحابك يرشحولك كلية معينة اكتر من غيرها لانها من وجهة نظرهم هي اللي ليها وظايف او متوفر ليها شغل .

خلينا متفقين علي كام مبدا الاول ان انت اللي مفروض بتختار الشغل مش هو اللي بيختارك ، يعني لو دخلت مجال عشان متوفر فيه وظايف وانت مش بتحبه مش هتقدر تنجح فيه مهما كان متوفر فيه وظايف .

التاني انك تسمع كلام اللي حواليك من ناحية انك تاخد المفيد منهم والنصايح اللي تناسبك لكن القرار الاول والاخير يرجعلك ، لانك لان اللي بينصحك بيبقي خايف علي مصلحتك لكن من وجهة نظره الشخصيه هو ورؤيته اللي ممكن تكون مش مناسبة ليك او مش مناسبة مع تفكيرك وامكانياتك وممكن تكون مناسبة فتفيدك فخلي القرار الاخير ليك انت.

متحددش الكلية بناءا علي مجموعك ، يعني مش معني انك جبت مجموع كبير انك شرط تدخل طب او هندسة حتي لو انت مش شايف انك هتقدر تنجح فيهم ومش معني انك جبت مجموع قليل انك تدخل حاجه مش حاببها ، مفيش كلية قمة وكلية متدنية فيه بعد كده حد بينجح وحد لا .

5 هتدخل كلية علمية ولا أدبية ؟
الفكرة ان كليات ادبي بيبقي فيها بعض الأقسام اللي تميل اكتر للمواد العلمية زي تربية قسم كمياء او تربية واداب علم نفس الخ .. بتبقي مش كلها مواد أدبية لو ميولك مش كلها للمواد الأدبية ، والعكس صحيح تقدر تدخل بعض التخصصات من علمي اللي ليها علاقة بالمواد الأدبية او مش كلها مواد علمية باحته ، حدد انت بتحب ايه اكتر وحابب تدرسه .

6 ايه الحاجات اللي شغوف بيها ؟
ايه نوع البرامج اللي لو شوفتها شغالة في التليفزيون بتشدك وبتتفرج عليها ؟ هل البرامج السياسية ولا البرامج الطبية ؟ ولا البرامج اللي بتتكلم علي المشكلات النفسية ؟ او برامج الخاصة برواد الاعمال وتاسيس المشاريع ؟ ايه المهن اللي اما بتشوفها في مسلسل او فيلم بتبقي ماثرة فيك جدا او منبهر بيها ومهتم تعرف جميع التفاصيل ؟ دي كلها من الحاجات اللي تعرفك شغفك والحاجات اللي بتحبها ؟

idea نصائــــح
حاول تستشير الناس بس القرار النهائي ليك لوحدك لانك انت اللي هتتحمل كل نتايج
المجموع مش هو اللي بيحدد مصيرك ومستقبلك او تخصصلك دور كويس هتلاقي حاجه بتحبها
دور علي الهوايات او الحاجات المييزه اللي عندك وحاول تشوف انسب مهنه ليها ايه ؟
متدخلش كلية لمجرد اسمها بس لانك بتلاقي الوضع مختلف جوه الكلية