دايما الأم الجديدة بتكون قلقانة وهي بتحمي طفلها الرضيع لأن الطفل حديث الولادة بيكون حجمه صغيره قوي وسهل أنه يقع من أيد الأم. الحقيقة أنه يفضل في أول أسبوع من الولادة أن الطفل يستحمي بسفنجه مبلولة تمسح الأم بيها جسمه مسح بسيط ولحد ما الحبل السري ينشف ويقع. بعد ما الحبل السري يقع ممكن الأم تحمي طفلها مرة كل كام يوم بالطريقة دي:

قبل ما تحمي الطفل جهزي كل شئ في الغرفة واتأكدي أن درجة حرارة الغرفة مناسبة عشان بعد الاستحمام الطفل ميبردش. جهزي الملابس والحفاضة وكريم التغيير وافردي فوطة عشان تحطي الطفل عليها. كمان جهزي الحمام وادوات الاستحمام من صابون مخصص للرضع واسفنجة أو فوطة عشان تدلكي بيهم جسم الطفل. كمان جهزي كوب صغيرة تستخدميه في وضع مياة كمان علي طفلك في نهاية الاستحمام.

استخدمي الحوض آو بانيو صغير بيكون مخصص لتحميم الطفل حديث الولادة.

حطي شواية مية دافية داخل الحوض أو البانيو واتأكدي من حرارة المياة بتجربتها علي كف ايدك مكان لبس الأسورة أو الساعة.

بعد ما هتخلعي هدوم طفلك كاملة ابدأي حوطية في وعاء الاستحمام برفق وهدوء وتأكدي أن درجة حرارة المية مش مضايقاه. حطي رجله الأول وبعدين بقية جسمة وامسكيه كويس بدراعك كاملا. خلي دراعك يكون محاوطه والايد التانية استخدميه للتنظيف جسمه بالسفنجة صابون الأطفال وفي النهاية اسكبي عليه حبة مية باستخدام كوب.

امسكي طفلك جيدا بايدك الاتنين وحطيه مباشرة في فوطة وجففيه كويس وانتي ماسكاه وخدي بالك كويس لأنه ممكن لو لسه في صابون علي جسمه ممن يقع من ايدك.

لو ابنك جسمه بيقشر ممكن تستخدمي لوشن مخصص للاطفال لترطيب البشرة وطبعا بعد كده لبسيه الحفاضات وملابسه مباشرة عشان ميتعرضش للهوا.

أوعي تسيبي ابنك لوحده في حوض الاستحمام حتي لو لثانية واحدة.