قصص الأطفال من أكتر الوسائل التربوية الناجحة ويمكن ده سبب من أسباب تعليق بالأطفال بأفلام الكارتون عشان القصة بتاعة الكارتون نفسه. لو أنتي أم أو معلمة هتحتاجي تحكي قصص الأطفال عشان توصلي معلومة أو حكمة تربوية أو تهذبي سلوك الطفل بشكل غير مباشر. لو عاوزة تعرفي ازاي تحكي قصص الأطفال اتبعي الخطوات التالية:

أول حاجة تعمليها عشان تعرفي تحكي قصة للأطفال أنك تختاري بطل القصة هل هيكون طفل ولا طفلة ولا مجموعة أطفال ولا حيوان معين زي الأسد أو الفيل ولا هيكون انسان بقوات خارقة زي سبايدر مان مثلا. مهم تحددي البطل قبل ما تبدأي بتفاصيل القصة.

بعد ما اختارتي البطل هتحتاجي تحددي الخلفية أو بمعني أدق الزمن والمكان الي بيحصل فيه القصة دي هل القصة دي في المدرسة؟ هل القصة دي في لندن أو علي سطح كوكب هل القصة دي بتحصل في الريف أو علي مركب في نهر النيل؟ حددي المكان والزمان كمان زي هل دي قصة في زمن الفراعنة أو قصة في المستقبل أو قصة في خمسينات القرن الماضي أيا كان اختيارك راعي أنك يكون عندك معلومات كفاية عن الزمان والمكان الي اخترتيهم وراعي سن الطفل في اختيارك ده.

كل قصة بيكون فيها لحظة الحدث الرئيسي أو المشكلة أو الحاجة الي القصة بتدور حواليها زي أي فيلم أو مسلسل في التلفزيون بتكون الأحداث كلها بتدور حوالين حدث معين. مثلا الحدث أو المشكلة دي ممكن تبقي أنه الطفل عاوز يسافر إيطاليا ومش معاه فلوس فهيحل المشكله ازاي. أو الطفل معندوش أصحاب وهيحاول يحل المشكلة دي في القصة، أو أن الطفل مش بيحب المدرسة فهيمر بمواقف تخاليه يغير رأيه وهكذا حددي نقطة محورية في القصة تبدئي القصة وانتي بتحاولي توصلي للحظة دي ومن بعدها بتبدئي تحكي ازاي البطل هيتعامل مع الموقف ده.

الأطفال بتحب النهايات السعيدة. البطل عرف يحوش فلوس ويسافر مع أهل، الأسد عرف يلاقي ابنه التايه، الطفلة عرفت تعمل أصدقاء كتير وهكذا…. اختاري نهاية سعيدة تكون نتيجة لمجهود البطل لحل المشكلة الي اختارتيها.