زاي اتغلب علي ضغوط الحياة اليومية

يوميا كل واحد فينا بيصحي وبيدا يستعد ليومه بنشاط بس تدريجيا بيفضل يحصل احداث ومواقف بتخلي الشخص عليه كم كبير جدا من الضغوط وحاسس بالقلق والتوتر والخنقة والعجز خصوصا لو كانت الضغوط دي يومية بشكل مستمر ، بيبقي مش عارف المشكلة فين او ايه السبب او الحل ايه ؟

1 أسال نفسك
اول حاجة لازم تعملها عشان تقدر تقلل من الضغوط دي تسال نفسك هل الضغوط دي مستمره ؟ هل انا يوميا حاسس بان عليا ضغوط كتير وعبئ مش قادر اتحمله ؟ ولا الضغوط دي مؤقته بقالها فترة صغيرة يومين او حتي شهر ؟وهنا السؤال دا اجابتة هي نص الحل لان الضغوط دي لو كانت مستمرة بشكل يومي فده يدل علي وجود مشكلة /مشاكل ما موجودة بصفة مستمرة والشخص بيتعامل معاها غلط او مبيحلهاش من الاساس ، لو كان الاحساس بالضغط لفترة مؤقته فده في الغالب بيبقي بسبب ظرف معين بيمر بيه الشخص بمجرد اما يتغير الظرف ده يتحسن هيبدا يختفي الضغط معاه .

استخدم حلول جديدة ، في الغالب الحلول التقليدية القديمة اللي دايما بتسخدمها في حل مشاكلك ماظهرتش اي نتايج والدليل هو وجود الضغوط دي واستمرارها فحاول تستخدم طرق جديدة في حل مشاكلك .

2 حط خطة

عدم اتباع الشخص لخطة وانه يمشي الحياة عشوائيا هو الاسهل لكن هو الاختيار اللي هيخليه دايما بيلف في دايرة ضغوضات الحياه اللي بتزيد كل يوم عن اللي قبله لانه مبياخدش خطوات جديدة في حياته لتغير الوضع السئ او المشكله.

حدد ايه هي المشاكل اللي مسببالك ضغوط وحط خطط ليها وطرق لحلها كل سنه تحط خطوات عايز تعملها علي سبيل المثال في سنه هتبدا تحوش فلوس عشان تاخد كورس معين هيساعدك تترقي في شغلك او عشان تاسس مشروع خاص بيك بتحلم تنفذه وفي سنة تانية هتبدا تحوش مبلغ معين عشان تتجوز وتاسس اسره وهكذا ده هيخليك عندك خطوات بتحققها كل فترة بتقلل من احساسك بالضغط او التوتر ، نظم حياتك واعملها خطوات محددة كل سنة ومراحل بتمشي عليها الشخص ،فكر تحسن من وضعك بكل الطرق ولو جربت طريقه او طريقتين وفشلوا في الف طريقة تانيه ممكن تنجح .

3 متأجلش
اكتب يوميا في مفكره عندك اللي محتاج تعمله في يومك في خطوات و حاول تنظم وقتك وكل حاجة تنفذها تعمل علامه عليها ، ولو اضطريت تاجل حاجه حاول تنفذها اليوم اللي بعده مباشرة متاجلهاش فترة طويلة .

متخليش دايما باستمرار عندك حاجات كتير متراكمه عليك سواء شغل او حاجات محتاجها ضروري وعايز تشتريها ايا كان التسويف بشكل عام بيخليك دايما مضغوط ومحتاج تقوم بحاجات كتير في وقت قصير وبيخلي دايما عندك مشاكل سواء في حياتك او في شغلك ، حاول تقوم بمهامك في وقتها بدل من تاجليها .
4 اتجنب الاشخاص المزعجة
لو في شخص في حياتك دايما مسببلك ازعاج او ضغط او دايما في بينكوا مشاكل بشكل مستمر وبتحس ان هو من الحاجات اللي مسببالك توتر وقلق وضغط طول الوقت حاول تتجنب التعامل او الكلام معاه ولو مضطر للتعامل معاه فحاول تتجنب الدخول معاه في نقاشات طويله غير مثمره ،تعامل في اضيق الحدود .

5 خلي مكان نومك مريح ونضيف
النوم وراحة الجسم من الحاجات الأساسية اللي بتخفف من ضغط طول اليوم واللي بتخليه يرجع يستعيد نشاطه من تاني خلي المكان اللي بتنام فيه تحديدا مريح سواء المراتب او المخدات ، وحاول توفر جو جميل و هادي علي قد ما تقدر .

حاول علي قد ما تقدر يكون المكان اللي بتقعد فيه معظم يومك هادي ومريح وجميل حاول كل فترة جدد فيه تجديدات بسيطة تضيف علي المكان حيوية وجمال لان المكان اللي بنتواجد فيه بشكل مباشر او غير مباشر بياثر علينا وعلي راحتنا النفسية وعلي احساسنا لو متواجدين في مكان جميل وجو حلو بيخلي عندنا هدوء وسلام وبيزود من قدرة الشخص علي الإنتاج او الابداع ، ولو متواجدين في مكان مليان بالفوضي والعشوائية بيخلي عندنا ضغط عصبي وبيخلينا سريعي الانفعال ومتوترين.

6 العب رياضة

الرياضه بشكل عام بكل انواعها من الحاجات اللي بتقلل الضغوطات بشكل مباشر سواء الجري او السباحه او كرة القدم او حتي المشي في الهوا الطلق ، حافظ علي لعب الرياضة اسبوعيا علي الاقل تلت ايام هيفرق معاك بشكل كبير وهيقلل من احساسك بالضغوط وهيفرغها باستمرار .

7 سافر
لو كنت في جو عام كله مليان بالضغوط وحاولت بكل الطرق انك تهيئ الاوضاع حواليك ومقدرتش وحاسس انه يومك كله عبارة عن ضغوط وصراعات فممكن يكون المكان اللي عايش فيه هو سبب الضغط ، فحاول تسافر اي مكان تاني الظروف فيه تبقي انسب وتقدر تعيش حياتك من غير ضغوط من جميع الاطراف حواليك ،في الاف الاماكن والبلاد اللي ظروفها مختلفة عن التانية متحصرش نفسك وتفكيرك علي مكان معين .