ازاى

ازاي اتعامل مع المولود الجديد

ازاي اتعامل مع المولود الجديد

ازاي اتعامل مع المولود الجديد الطفل حديثي الولادة بيحتاج معاملة من نوع خاص جدا وبحذر شديد ووعي كافي نظرا لانه بيكون مرتاح راحة كاملة جوه رحم الأم وكل طلباته بتكون مجابة تلقائيا من قبل مايطلبها وعشان تعرفي طلبات طفلك ومتخليهوش محتاح حاجة لازم تعرفي شوية خطوات وتمشي عليها كالاتي :-

  • 1

    اعرفي اكتر عن حالته قبل الولادة

    عشان تقدري تتعاملي مع ابنك بطريقة صح في بداية حياته الجديدة بعد الولادة لازم تعرفي اكتر الحالة اللي كان عايش بيها قبل الولادة من جميع النواحي عشان تقدري تفسري سبب بكائه وتأقلميه علي حياته الجديدة واحدة واحدة

    الطفل جوه رحم الأم بيكون عايش في جو مظلم ووجود الضوء العالي بيعمله ازعاج ويتعبه عشان كده في ايامه الاولى ولحد شهر من ولادته متوجهيش الضوء عليه بشكل قوي

    كمان الطفل بيكون ملفوف بطريقة محكمة جو رحم الأم عشان كده من اقوى الاسباب اللي بتساعد طفلك علي النوم وخصوصا في أول مرحلة من حياته اللف المحكم هيحس بالامان ويفتكر وضعه قبل الولادة وهيروح في النوم بسهولة

  • 2

    اتعاملي معاه عن قرب

    الطفل حديث الولادة مبيشفش ابعد من وش مامته وهو علي ذراعها فلما الام بتسيبه قدام عنيها علي السرير وتعمل حاجه في المطبخ  حتي لو قريبة منه مبيكنش شايفها وبالتالي بيحس بعدم الأمان وده بيفسر سبب بكائه في اوقات كتير

    دايما خليكي قريبه من وش طفلك واحتفظي بابتسامة جميلة علي وشك كل ماتبصي لابنك عشان توصليله معني الحب والأمان

    ومن الأخطاء الشائعة انك تسيبي طفلك يبكي على السرير بحجة انه شبعان وهيسكت لوحده دلوقتي وده غلط جدا لان في مراحله الأولى الطفل بيفسر بعدك عنه هجر وبيحس بعدم الأمان ولازم انك تحافظي علي انه يحس بالامان دايما عشان ميكرهش حياته الجديدة

    ومن الحاجات المهمة اللي لازم تعرفيها هي أن الطفل معندوش القدرة على استعادة الذكريات اللي بتحسسه بالامان قبل سن السنتين عشان كده وجوده جنب الطفل دايما مهم جدا في مراحله الاولي

  • 3

    اختاري العابه بعناية

    في المراحل الأولى من عمر الطفل بيكون كل الاهل فرحان بيه و بيفضلوا يشتروا في لعب كتير لكن لازم تعملي حسابك وتعرفي الالعاب المناسبة لطفلك في المرحلة دي من عمره،  لان في العاب كتير بتعمل ضوضاء وموسيقى عالية وضوء ، وكل الاشياء دي بترعب الطفل وبتكون مزعجة جدا بالنسباله ولابد من الابتعاد عنها لأنه بيحتاج للهدوء الشديد في مراحله الأولى وتهيئة جو مناسب ويكون قريب من حياته قبل الولادة

    و الطفل لحد سن 6 شهور مبيقدرش يشوف الالوان عشان كده يستحب تكون الالعاب بتاعته ابيض في اسود وتكون عبارة عن تعليقات بتكون في السقف وتكون قريبه منه عشان تلفت نظره و يتسلى بيها وبعد كده تقدر ي تجذبيه انه يمسكها عشان يقدر يتحكم في اعصابه ويمسك الأشياء

    وبعد 6 شهور الطفل بيقدر يشوف اللون الاحمر وبعدهم ب 3 شهور بيقدر يشوف اللون الأصفر وبعدهم ب 3 شهور بيقدر يشوف اللون الأزرق

    اعملي ركن مخصوص للطفل عبارة عن مرتبة اقصي ارتفاع ليها 5 سم عشان الطفل ميقعش من عليها وفي ضهرها مراية كبيرة بطول الحيطة عشان الطفل لما يعدي ال3 شهور يبدأ يبص لنفسه في المراية ويتسلى ، والمرتبة دي هتساعده انه يسند عشان يقعد وعشان يمشي وهتساعده يعمل توازن لنفسه واحظري يكون ده ركن العقاب بتاعه وانك بتسيبيه فيه وتروحي تعملي اللي وراكي عشان ميكرهش المكان ويكون مرتبط عنده دايما بذكري وحشه

    الركن ده كل البيت يقعد فيه أطول فترة ممكنة ويلعب مع الطفل فيه عشان يرتبط عنده بذكريات حلوه  ويعرف ان المكان محبوب من كل اللي في البيت

  • 4

    اتبعي الطريقة الصحيحة للرضاعة

    بعد الـ3 ساعات الأولى من الولادة لازم يبدا الطفل في الرضاعة الطبيعية وعدم اللجوء للرضاعة الصناعية إلا للضرورة القصوى لأن الرضاعة الطبيعية بتقري مناعة الطفل علي عكس اللبن الصناعي بيزود من وزن الطفل ومابيعوضش ربع فايدة الرضاعة الطبيعية

    لبن الام بيتغير أثناء مرحلة إرضاع الطفل حتى تمام شبعه والطريقة الصحيحة عشان يوصل للطفل كل فايدة اللبن انه يرضع من مكان واحد في الرضعة الواحدة لان في اول ما الطفل بيبدا يرضع بيكون لبن الأم بيحتوي علي سكر وماء وفي نهاية رضعة الطفل بيكون في اللبن كل المكونات والدهون اللي بتشبع الطفل

    وفي حالة ان الطفل ميرضعش بشكل صحيح مبيرضعش غير سكر وماء وبالتالي مبيحسش بالشبع وبطنه بتتملي علي الفاضي وبتلاقي الطفل بيصحي بعد الرضعة بوقت قليل جدا ويبكي عشان جعان

    عشان كده لو الطفل نام وهو بيرضع لازم تصحيه بشكل لطيف عشان يكمل رضعته للآخر ويحس بالشبع عشان ينام نوم متواصل من ساعتين ل3 ساعات

    ولازم تعرفي ان لبن الام في اول 3 ايام للطفل مهم جدا حتي لو في الحضانة لأنه بيقوي مناعة الطفل وبيحميه من التعرض للأمراض بسهولة

    ومن المفاهيم الغلط اللي عند كتير من الناس أن اللبن بيكون عند ام اضعف من ام تانية وتلجأ بعض الأمهات في الحالة دي لارضاع الطفل كل فترة بسيطة بحجة انها تعوض الطفل

    الطبيعي ان الطفل بيرضع بمعدل 10لـ12 مرة خلال اليوم كل ساعتين او تلاتة في حالة الرضاعة بالطريقة الصحيحة اللي اتكلمنا عنها

    ومن الاسباب اللي بتسبب بكاء الطفل من المغص هي الرضاعة الصناعية لأنها بتزود وزن الطفل على الفاضي لانه بيحبس الماء والأملاح داخل الجسم  وايضا الأعشاب بتملي بطن الطفل على الفاضي إلا لو وصفها الطبيب كبديل للأدوية زي 5 سم من الينسون لتهدئة الطفل وممكن تستخدميه مرة واحدة في اليوم

  • 5

    الاهتمام باغتسال الطفل

    امهات كتير بتخاف علي طفلها من البرد وبتطول مدة اغتسال الطفل أطول فترة ممكنة ودي من الحاجات الغلط جدا اللي بنقع فيها لان العرق بيسبب المرض للطفل وضروري اغتساله كل يوم في فترة الصيف وكل 3 ايام في فترة الشتاء ، ومدة اغتسال الطفل متزدش عن 10 دقائق

  • 6

    الاهتمام بالتطعيمات الإضافية

    بعيدا عن التطعيمات الإجبارية اللي بتعملها وزارة الصحة اللي بتكون اول 3 شهور في تطعيمات اضافية اهتمامك بيها بيجنب طفلك امراض كتير مثل

    1-الانفلونزا البكتيري وده الوزراة ضمته في الفترة الأخيرة وبقي اجباري

    2- تطعيم الروتا بتاع المية جرعة عند شهرين وواحدة عند 4 شهور

    3-تطعيم الالتهاب الرئوي عند شهرين وجرعة عند 4 شهور و جرعة عند 6 شهور

    و جرعة منشطة عند سنه ونص

idea

نصائــــح

  • اعرفي ان المص عند الطفل شئ طبيعي مش كل ماهتلاقية بيمص ايده هيكون جعان

  • الفترة اللي بيكون فيها ابنك مولود جديدو لسه في فترة الرضاع فترة قصيرة بلاش تهمليها لان ليها عواقب وخيمة

  • لبن الام بيحتوي علي مياه طبيعية  عشان كده متبدايش تشربي ابنك غير مع بداية الاكل او لو بيرضع صناعي

  • البكاء عند الطفل ليه اسباب كتير ومش كل ماهتلاقية بيبكي هتأكليه ممكن يكون بكي عشان في صوت جامد جمبه او مش مرتاح او محتاجك تحضنيه

ezay article 70

المصـــادر

  • د داليا الخرباوي

ezay article 05

الأسئلة المجابة

انا ابني عنده 8شهور وعضمت المخ قفلت بدري والدكتور مخ اعصاب قالي اتابع النمو بتاعه وهو الحمد الله نمو طبيعي جدا وسبب قفل العضمه بدري واتقالي زياده كالسيوم انا مش عارفه ايه الاكل المناسب ليه عشان بقيت العضم اللي ف الدماغ مش يقفل بدري

الأجابة: هو فعليًا مفيش عضم تاني في الدماغ بيكون مفتوح, الجزء اللي بيكون في الراس من ورا بيقفل بعد شهرين من الولادة, والجزء الأمامي المفروض بيقفل بعد سنه وشهرين, وبما انه قفل بدري والحمدلله النمو سليم, فخلاص كده مفيش أي عضم تاني مفتوح في الدماغ

ابني لما بيكون التلفزيون شغال بنادي عليه مش بيرد ولو حاجه ف ايده برضو مش بيرد ويرجع يصوت انا مش عارفه اعمل ومش فاهمه ايه حاحه واحيانا بتيجي رعشه ف شفيفه

الأجابة: اصلا التليفزيون ممنوع قبل السنتين لانه بيظهر سمات توحد من فضلك امنعي التليفزيون واستبدليه بألعاب وأنشطه يدويه تنمي مهاراته حسب سنه هتلاقي الانشطه والالعاب المناسبه منزلين فيها حاجات كتير علي الصفحة بننصحك تشوفيهم في الاول هيزهق ويعيط وبعد كده هيتعود واحده

انا ولادت قيصرى يوم 8واحد وكنت لسه في نص التامن وابنى دخل الحضانه بس كل يوم اسمع من الدكتور حاجه جديده ظهرت عندو وانا تعبانة ومحتاجه حد يطمنى ويقولى الحقيقه بالله عليكم هبعت التقرير بتاع حالته وتقولى فيه اى

الأجابة: نتمناله الخروج على خير وتطمني عليه، لكن بننصحك تتابعي مع طبيبك أفضل لأنه عارف كامل حالته الصحية، للأسف الدكاتره اللي معانا مش هيقدروا يفيدوكي علشان تخصصات مختلفة، وياريت تطمنينا على النونو لما يخرج بالسلامة ان شاء الله. ومتقلقيش معظم الأطفال دلوقتي بيدخلو

هل مجموعه جونسون غلط علي الاطفال

الأجابة: بتفرق من طفل لطفل، لازم تجربي الاتنين علشان تقدري تقرري، لكن لو عايزه رأينا هنقولك جونسون أفضل خصوصا في ريحته، منتجات سانوسان زي الشاور والشامبو ريحتهم مش حلوه أو ملهمش ريحه تقريبا، بالنسبه لكريم حفاض سانوسان طبقته تقيله جدا ومش بيتفرد بسهوله وبيفضل معلم

لو سمحت انا ابنى عنده شهرين وعضمه بيفرقع وهو بيحرك أيده او رجله ده معناه اي هل ممكن يكون عنده نقص كالسيوم

الأجابة: اعرضيه علي دكتور اطفال واطلبي منه يكتبلك علي تحليل الكالسيوم، لو التحليل طلع فيه نقص كالسيوم بيكتبلك جرعه محدده حسب النسبه والوزن، لكن الكالسيوم تحديدا مينفعش تديه من نفسك لانه بيعمل ترسبات علي الكلي لو مكنش الطفل محتاجه او لو اتاخد بجرعه غلط

اظهر المزيد من الاسئلة