الطفل العصبي متولدش عصبي الطفل العصبي اتعرض لمواقف في التربية والبيئة المحيطة خلته يتصرف بعصبية كرد فعل طبيعي بالنسباله وعشان تعالجي العصبية عند ابنك اتبعي الخطوات التالية :-

الطفل اللي خلاص بقي عصبي محتاج يحس انه مش متقيد لأنه جواه كبت لازم يخرج عشان يرجع هادي وتكون شخصيته متزنة ،ولازم يكون المكان اللي تخرجيه فيه واسع يقدر يجري ويتنطط فيه ويلعب بدون اي قيود عشان يخرج كل الطاقة اللي جواه

حاولي علي اد ماتقدري تخرجيه كل يوم ولو مش هتقدري علي التكلفة ممكن تخرجيه في جنينة وده المطلوب اصلا مش لازم تخرجيه في اماكن هتكلفك كتير لو معندكيش إمكانية تعملي كده لان غالبا البيت بيمنع الطفل أنه يلعب ويتنطط ويجري فبيكون عنده طاقة لازم يخرجها ولما بيتمنع الطفل من انه يلعب بالطريقة اللي بيحبها بيتحول لشخص عصبي عشان يعبر عن غضبه ويخرج الطاقة اللي جواه

دايما الطفل بيقلد اللي بيشوفه قدامه اكتر من اللي بيتقاله فمينفعش نكون دايما بنشخط فيه وبنزعقله وبنضربه ونطلب منه انه يكون هادي و ميضربش صحابه
، ولما بنحب نلاعب الطفل وهو صغير ونقوله يعض اللي قدامه وبيستجيب ده اكبر غلط بنعمله في حق الطفل لأننا بنربي فيه العنف ونرجع نعاقبه علي أنه بقي عصبي

لازم نبدل العقاب بأي طريقة تانية ونعود الطفل عليها والاب ولازم يتكلموا مع بعض بصوت واطي عشان ميخلوش الطفل دايما جواه شحنة سلبية من اللي بيشوفه وعايز يخرجها ، وده بيظهر علي الطفل من خلال تكسير الالعاب ولو الطفل عنده دبدوب اوعروسة بيفضل يضرب فيها او يقطع هدومها او يكسرها

دايما بنفتكر ان الطفل مش فاهم حاجة وبنستهتر بعقله ولو في اي مشكلة في البيت الأب والأم بيتكلموا فيها قدام الطفل، وغالبا بيكون في مشاحنات ومشادات ،عشان كده لازم لو في اي مشكلة في البيت الاهل يبعدوا الطفل عنها تماما ويتكلموا بعيد عن الطفل لانه بيخلي الطفل عصبي وجواه كبت فبيطلع يضرب صحابه وميسمعش الكلام

كل طفل بيحتاج يحس انه ليه أهمية وقيمة في نظر اللي حواليه وكل ماهيحس انه مهم وحس انه شخصية سوية كل ما هيبقى افضل وهتبقي شخصيته احسن وهيكون مبدع ومش هيحس باي كبت

دايما لما يعمل حاجة كويسة ويحس انك مبسوطه باللي عمله هيفرغ شحنة جواه كبيرة بدل ما يطلعها في عصبية وكبت هيطلعها في مشاعر فرح ويحس انه شخص كويس و هيصدق انه كويس ودايما هيكون عايز يطور من نفسه

أوقات الطفل بيتعصب لأسباب بسيطة جدا زي انه عايز يلعب بطريقة معينه وانتي ترفضي او عايز يفتح هو النور وانتي ترفضي ومن كتر الرفض الطفل بيتحول لانسان عصبي ، مفيش مانع لو سبتي الطفل يلعب بالطريقة اللي بيحبها وتخليها مسؤولية عليه بعد كده “زي انه يبقي حابب ان هو اللي يفتح النور مثلا ” وبعد كده كل ما تحبي تفتحي النور تنادي عليه يفتحه

ده هيخلي الطفل يحس بأهميته والأطفال عامة بتحب تشيل مسؤولية وتحس انها بتعمل حاجة وده هيفرق في شخصيته كتير و هيخليه انسان كويس و متزن وهادي الطباع