تشققات الكعبين من الحاجات المزعجه اللي بتضايق ناس كتير خصوصا السيدات لانها بتاثر علي شكل القدمين وبتسبب خشونه في الرجل واحيانا بتكون مؤلمه لو التشقق كان عميق او شديد التشققات نفسها مراحل في تشققات بسيطه وبتستجيب للعلاج بسهوله وبسرعه وفي تشققات متوسطه وتشققات عميقة بتسبب الالم وكل ما زاد عمق التشقق زادت مدة العلاج بداية من اسبوع للحالات البسطيه لشهر للحالات العميقه .

  • الاستمرارية

متعتقدش ان في كريم سحري للتشققات بمجرد ما تحطه مره واحده هتختفي التشققات علاج تشققات الكعبين احيانا بيحتاج لوقت من اسبوعين لثلاث اسابيع مع المواظبه والاستمراريه .

الفكرة فى علاج التشققات هى ان طبقات الجلد الخارجية بتجف فتتشقق ومفيش كريم فى الدنيا بيلحم الطبقات مره تانيه بعد ما تلفت ولكن العلاج هيكون بانك هتحاولي تزيلي الطبقات دي بالتدريج مع المحافظة على ترطيب الجلد باستمرار عشان تقدري توصلي للطبقات الداخلية السليمة للسطح وده بياخد من اسبوعين لشهر حسب شدة وعمق الشقوق يعنى لو سطحية او متوسطة ممكن يتم العلاج فى اسبوعين واذا كانت عميقة وواصلة للأعصاب أو الدم ( المصابين بيها بيحسوا بألم مكانها )ممكن شهر اهم حاجة الصبر والنتيجه هتكون مرضيه جدا .

  • متقفش حافي القدمين

الوقوف حافي بدون حذاء او شبشب بالمنزل لفترات طويله بيسبب جفاف القدمين فزيادة الضغط عليها لفترات طويلة وخصوصا مع الوزن الزائد يسبب جفاف الجلد وسماكته و فقدانه لليونته ومرونته وبالتالي بتظهر التشققات والفواصل بالكعب، متمشيش حافيه بالمنزل حتي بعد معالجة التشققات لتجنب رجوعها مرة تانية .

  • زيلي الجلد الميت

حطي القدمين في مياة متوسطة السخونه او دافية مايلة للسخونة فيها بعض النقط من الشاور جيل او الشامبو ،سبيها في المياه لمدة نص ساعه او ساعه ،نشفي الكعبين كويس بفوطه بعدين هتحطي اسكرب خاص بالقدمين او كريم مرطب وقومي بازالته بمنديل الخطوه دي هتساعدك انك تشيلي الجلد الميت بسهوله ابدئي بازالة الجلد الميت باستخدام مقشر القدمين.

بعد ازالة الجلد الميت نشفي قدميكي مرة تانية ،حطي كريم مرطب او معلقة جلسرين عليها معلقة عصير ليمون وحطيهم علي قدمك .

غطي رجلك باستخدام اكياس بلاستيك بعدين البسي شراب صوف او تقيل ومن الافضل لو كانت الخطوه دي قبل النوم وتنامي بيه لتاني يوم الصبح .

استمري علي الخطوات دي لمدة اسبوعين ويفضل لو يوميا قبل النوم الاهم يوميا هو ترطيب القدمين باستمرار مع تغطيتها ،مش شرط تقومي بعمل خطوة تقشير الجلد الميت يوميا يكفي مرتين اسبوعيا لكن استمري عليها كل فتره .

خلي باستمرار علبة المرطب او البلسم قريبه منك حطيها منها علي الكعبين دايما .

خلي جمبك مطهر في حالة حدوث اي نزيف من التشققات ضع عليها المطهر لمنع العدوي .

تجنبي الاحذيه المفتوحه من الخلف خصوصا للنساء لانها بتؤدي الي نشفان وتشقق الجلد

  • اعمل تحليل دم

احيانا الانيميا او نقص بعد الفيتامينات والمعادن والزنك او سوء التغذيه بشكل عام بيكون من مسببات ضعف طبقات الجلد وتشققها ، فالافضل عمل بعض التحاليل وتعويض الجسم بالفيتامينات او المعادن الناقصه ، ومع الوقت هتلاحظ تحسن بشكل ملحوظ .

  • اشرب ماية باستمرار

حافظ علي شرب الماية باستمرار وبكترة سواء في الصيف او الشتاء لان فقدان الجسم للمياه بيسبب جفاف الجلد وظهور التشققات ومشاكل البشره عموما .

  • اتاكد من عدم وجود مرض

امراض كتير زي السكر ، مشاكل الغدة الدرقية ،إلتهابات الجلد الناتجة عن التينيا .إلتهاب الجلد مثل ركود وريدي ، أعراض الهبوط ،أمراض الكلي و تناول مدرات البول ،سرطان الغدة الليمفاوية ،أمراض الصدفية و الإكزيما كلها من الحاجات اللي ممكن تسبب تشقق القدمين اتاكد من عدم وجود امراض مسببة للتشقق .

  • استخدم احذية طبية

في بعض الاحذيه الطبيه اللي كعوبها من السيلكون بتحافظ علي رطوبة القدمين فبتقلل من التشققات ، حاول تستخدمها .