اولا وظيفة التلي سيلز من الوظايف المتاحه بكتره واللي بيعتقد كتير من الشباب انها وظيفه ملهاش مستقبل او اهميه وان اللي بيشتغل فيها مجرد شخص بيشتغل شغل روتيني عشان ياخد مرتب كل اخر شهر وخلاص علي عكس الحقيقة ان في شريحه من الناس بتقدر تحقق نجاحات واهداف كتير جدا عن طريق التلي سيلز ،ولكن ده بيتطلب ان يكون عندك بعض المهارات الشخصية زي انك تكون بتعرف تتواصل مع الناس كويس او متكلم جيد ومستمع جيد او عندك مهارة زي الاقناع وانك بتعرف تتفاوض و عندك صبر ، كل دي من المهارات اللي بيتطلبها اللي بيشتغل في التلي سيلز او بيتعلمها وبتكون حجر اساس ليه بعد كده .

الحقيقة ان مجال التلي سيلز ليه مميزات كتير جدا لو بتفكر تشتغل فيه في البداية ومعظم اصحاب الشركات الكبيره والمعروفه كانت بدايتهم بمجالات زي التلي سيلز والسليز والوظايف الخاصة بتعليم مهارات البيع والدعايا والاعلان لان دي المهارات الاساسية اللي بيتبني عليها اي بيزنيس كبير ناجح لو عندك المهارات دي هتقدر تنجح وتكمل لو مش عندك مش هتقدر توصل لنقطة انك تاسس بيزنيس كبير خاص بيك ، عشان كده اولا هنقولك ايه هي مميزات انك تبدأ في وظيفة زي التلي سليز ؟

انك بتقدر تكون علاقات كتير ومهمه تنفعك في حياتك والشغل الخاص بيك بعد كده . لو كنت تلي سيلز شاطر فانت هتقدر تحقق تارجت كبير وتاخد نسبة كبيرة عليه او من خلال انك تجيبلهم تعاملات جديدة للشركة . بيديك خبرة في انك تعرف شخصيات الناس واختلافاتها ازاي تتعامل مع كل شخصية فيهم بذكاء .

من كتر الاحتكاك بشرايح كتير واماط مختلفة من الناس دا بيساعدك انك تفهم سلوكيات العملاء وتفكيرهم ودي نقطة مهمه دا ممكن تساعدك في المستقبل انك تاسس بيزنس خاص بيك

بيساعدك تدخل او تتعمق في مجالات شغل افضل واكبر ليها زي السيلز او الماركتينج ودا في حد ذاته بيفتحلك ابواب شغل تانيه كتير او علي الاقل تشتغل في نفس البوزيشن بتاعك بس في شركة كبيرة ، كل النقط اللي اتلمنا عنها دي ممكن تبقي موجودة وممكن متبقاش موجودة اطلاقا علي حسب شخصية الشخص اللي داخل الشغل وحسب طريقة تخطيطه لحياته ولاهدافه ، دي الحاجه الوحيدة اللي ممكن تعرفنا اذا كان هيستفيد فعلا من التلي سيلز كوظيفة في البداية او لا ؟

  • اتعلم بعض المهارات

ممكن تحس ان شغلانة التلي سيلز شغلانه مش محتاجة فن او تعليم لكن في الحقيقة عشان تستغلها كبداية وتستفيد منها بعد كده لازم يكون عندك بعض المهارات زي انك تكون شخص متكلم ، عنده فن الاقناع ، عنده مهارة المفاوضات ..وادارة الحوار ..الخ.

دي كلها مهارات ممكن تكون متوافره عندك من غير كورسات وكمان لو مش عندك فتقدر تكتسبها عن طريق بعض الكورسات ، او عن طريق الخبره من شخص اشتغل في مجال السيلز او التلي سيلز او عن طريق التطوع في اي عمل خيري ..الخ .

  • حدد هتكلم مين

تحديد الفئه اللي بتكلمها مهم جدا قبل اجراء المكاملة التليفونيه لان بناءا عليها هتحدد حاجات كتير في المكالمه ، طريقه الكلام والاسئله والوقت اللي هتتكلم فيه ومدة المكالمه ..الخ هل هتكلم ستات بيوت مثلا ولا رجال اعمال او اصحاب شركات ولا موظف في شركة كل حد من دول هيبقي ليه طريقة مختلفة في الكلام وفي مدة المكالمة نفسها وتوقيتها ، عن طريق تحديد الشريحه بتقدر تحدد اهتمامتهم وبالتالي هتعرف مسار المكالمه هيمشي ازاي وهتقول فيه ايه ؟

  •  اتصل في الوقت المناسب

اختيار الوقت المناسب للمكالمه مهم جدا و هو اللي بنسبة كبيره بيحدد اذا كان الشخص هيبدا يسمعك من الاساس ولا هيبقي عايز ينهي المكالمه في اسرع وقت ؟

في ناس هيبقي مناسب ليهم تكلمهم في مواعيد شغلهم ، وفي ناس هيبقي الانسب تتصل علي وقت العصر او بعده زي مثلا شريحه الامهات لان في وقت الصبح بيكونوا مشغولين في ترتيب البيت وتنظيمه وتحضير الاكل ..الخ ،والخطوات هتمشي كالاتي :

اول ما يرد هتعرف نفسك وشركتك بيه، كالتالي الو يا فندم معاك فلان الفلاني من شركة كذا .

أساله اذا كان الوقت مناسب او لا ؟هل الوقت اللي بكلم حضرتك فيه حاليا وقت مناسب ولا حضرتك تحب اكلمك في وقت تاني ؟

هيرد عليك اذا كان غير مناسب فحاول تحدد معاه وقت تاني مناسب تكلمه فيه ولو قالك اي وقت تاني فحاول انت تحدد معاد وتساله اذا كان مناسب معاه ولا لا .، ولو كان الوقت مناسب هتبدا تتكلم وتعرض منتجك او خدمتك .

  •  حدد هدف المكالمه

هل هدف المكالمه البيع ؟ ولا تحدد ميعاد تقابله فيه ؟ولا تحدد ميعاد يروحله المندوب يشوف المنتج علي الطبيعه ؟

تحديد هدف الكالمه هيحدد سياق الكلام ، لو هدفه البيع علي سبيل المثال فانت هتحاول تظهرله مميزات المنتج بطريقه تخليه عايز يشتري المنتج و ياخد قرار الشراء سريعا ، علي عكس لو بتحاول تحدد معاد معاه وهكذا (مكالمة بدون هدف تساوي عدم اجراء المكالمه) .

  • حدد المعلومات الرئيسيه

اولا لازم تحدد المعلومات الاساسية اللي لازم تقولها في المكالمة قبل ما تبدا تتصل بالعميل حدد اهم المعلومات اللي لازم تقولها في الاقل اهيمه عشان لو وقت المكالمه معاك محدود تبقي محدد المعلومات الرئيسيه اللي مش هتختصرها والمعلومات اللي ممكن تختصرها ..الخ .

  • حدد نمط شخصية اللي بتكلمه

انك تعرف بسرعة من طريقة الكلام نمط شخصية اللي بتكلمه وده هتكتسبه مع الخبرة ، هيساعدك كتير انك تكلمه بطريقه تناسب شخصيته تساعد علي اتمام عمليه البيع بنجاح (بعض نماذج الشخصيات) :-

في نوع من الشخصيات هتلاقيه بيتكلم جد جدا فلازم مسار المكالمه يمشي رسمي ومختصر الي اقصي درجه .

في نوع من الشخصيات هتلاقيه بيكلمك بود وبنوع من الصداقه ، دا تقدر تتعامل معاه من غير ما تكون رسمي 100% ومش هيحب انك طول الوقت بتقوله يا فندم او سيادتك ..الخ فممكن مع نمط الشخصية دي تتعامل بنوع من الود مع الحفاظ علي الاحترام والمسافات وتتعامل كانك صديق ليه وبترشحله المنتج او الخدمه دي وبتنصحه مش هيبقي محتاج تكليف كبير ،وفي الغالب النوع ده من الشخصيات بيبقي اسهل في طريقة التعامل والاقناع واتمام عملية البيع .

في نوع من الشخصيات هتلاقيه بيهزر في وسط المكالمه او بيحاول يخرج عن سياق المنتج اللي بتقدمهوله تماما ، فتحاول انك يبقي عندك نوع من الاريحيه اثناء المكالمه مع تركيزك انك ترجعه لهدفك الاصلي هو المنتج او الغرض من المكالمة الاساسي .

حاول تتعلم اكتر عن انماط الشخصيات وازاي تقدر تكتشفهم عن طريق لغة حوارهم او طريقة كلامهم ده هيساعدك بشكل كبير انك تعرف تتعامل مع كل عميل بالطريقه اللي تعلي نسبة اقتناعه بالمنتج ..الخ

  •  خلي المكالمه علي شكل نقاش

متحولش المكالمه لنوع من انواع الرسائل المسجله المحفوظه اللي بيتم فيها طرح وعرض كل المعلومات عن المنتج او الخدمة ورا بعضها .. وتقوم بسؤاله هل تحتاج هذا المنتج او الخدمة وتقوم بانهائها .. لان ده بشكل كبير جدا مبيساعدش العميل انو يقتنع بمنتجك او خدمتك ..فبالتالي هتخسر عدد كبير من العملاء اللي كان من المحتمل اتمام الصفقه او عملية الشراء ..الخ

خلي المكالمه تدور علي شكل حوار او نقاش عن طريح انك تطرح اسئلة هتبدا تجمع معلومات منه عن انطباعه عن شركتكم والمنتج والخدمه وبالتالي هتعرف تفكيره عن الحاجه دي وتقدر تناقش معاه الافكار دي ولو في صورة ذهنية سيئه ممكن تحسنها ..الخ وبالتالي هتحقق الهدف من المكالمه بشكل اكبر بتبدا تساله :

عن ايه انطباعته عن الشركه وهل يعرفها ولا لا ؟ ولو ميعرفهاش حاول تديله معلومات سريعه ومختصره عنها تديله نوع من الثقه.
ولو عنده انطباع سئ حاول تحسنه عن طريق النقاش او انك تعمله عرض خاص ليه .. او تحاول تحل له مشكلته السابقه مع منتجكم او خدمتكم

بعدكده هتبدا تساله علي المنتج نفسه

وهل استخدمه او جربه قبل كده ولا لا ؟ايه اخر انطباع عنه ؟ ايه المميزات والعيوب اللي شايفها في المنتج ؟
لو عنده افكار سيئه عن المنتج او الخدمه هتبدا تناقشها معاه ..الخ

  •  اعرض الميزه التنافسيه لمنتجك

هتبدا في دماغك تعمل مقارنه سريعه بين منتجك او خدمتك والمنتج اللي اشتراه قبل كده ..وتبدا تقوله المميزات اللي في شركتكوا او منتجكوا بتميزكوا عن اللي هو بيستخدمه

  • متنساش تقفل البيعة

اهم خطوة هنا ازاي تقفل البيعه صح وتتم العملية ؟

هنا بيكون العميل في منطقه القرار ..بياخد القرار اواخده بالفعل ..لو كان قراره بالموافقه او الميل للموافقه حاول متدلوش وقت كبير او مساحه للتفكير ..حاول تتم الديل بشكل لطيف بعرض اسئله

ممكن نجيب المندوب لحضرتك امتي ؟
بكرة مناسب لحضرتك نجيبلك المندوب ؟

  • تحلي بالصبر

عشان تنجح في المجال ده لازم تعرف انك هتتعامل مع ناس كتير بشخصيات مختلفه وبافكار مختلفه فمحتاج نوع كبير من الصبر ..هتقابل الشخصيات الصعبه التعامل والحاده والمواقف اللي ممكن تضايقك زي ان حد يقفل التليفون او يكلمك بطريقه مش كويسه وهتلاقي اللي بيحترمك وبيعاملك كويس وهتقدر تتم البيعيه بسهوله ..فتحلي بالصبر واعرف انك هتقابل كل المواقف دي ومتاخدش الموضوع بشكل شخصي

  • الشغل هيعلمك

كل ما هتشتغل علي ارض الواقع كل ما هتتعلم تتكلم ازاي وتقول ايه وتتارجت ( تستهدف ) مين فمتتوقعش نتايج مبهره في الاول الموضوع محتاج خبرة ومتقلقش كل الخطوات اللي فاتت دي هتتم في خلال دقايق سريعه بالتدريب والخبره هتقدر تتقنها .

  • اعرف نقط قوته وضعفه

اعرف نقط ضعفه وقوته ..من خلال طريقة كلامه هتقدر تفهم هو بيحب ايه ومبيحبش ايه بالطريقه دي هتقدر تعرف تشتغل علي الحاجات اللي بيحبها او تتجنب الحاجات السيئه اللي مبيحبهاش .. او تقدمله عرض يساعده او يوفر عليه انو يسهله الحاجه اللي مبيحبش يعملها مثلا إلخ …

  • بينله اسباب اسئلتك

ممكن شخص علي سبيل المثال يقولك ايه الاسئله دي كلها هو تحقيق؟ ابدء بينله السبب او مبرر للاسئله ان احنا بنعمل استفتاء لراي العملا ..او بنحاول نقدم لحضرتك افضل خدمه تناسبك ونعرف نقدمهالك بالشكل اللي تحبه إلى أخره .

  • متحبطش بسرعة

هتتصل بعملاء كتير وفي اللي هيقفل في وسط الكلام وفي اللي هيديلك احساس انو موافق ومتمم البيعه وهيتراجع في اخر وقت ده كله وارد بشكل كبير فى مهنة التلى سيلز