كتير من الأمهات بتخلي أطفالها يشاركوها السرير من وقت الولادة لكن الأمر بيبقي صعب مع مرور الوقت ولما الطفل حجمه بيكبر وحركته بتكون كتير الوضع بيكون مزعج للأب والأم. لو عاوزة تعرفي ازاي تخلي ابنك ينام في سريره اتبعي الخطوات دي:

  •  قبل موعد النوم

متستنيش أما معاد نوم الطفل يجي وتفاجئه أنه هينام في سريره. أتكلمي مع طفلك من بداية اليوم أنه خلاص كبر ولازم ينام في سريره وأنك هتكوني جنبه لحد ما ينام وخديه غرفته وشوفي ايه الحاجات الي ممكن تساعده يستريح آكتر زي مثلا وجود اضاءة بسيطة أو لعبته المفضلة معاه في السرير.

  •  احكي قصة وقت النوم

حاولي تحكيله قصة قبل النوم وتفضلي جنبه لحد ما يروح في النوم أول فترة لحد ما يتعود.

  •  طمئني الطفل

أكدي علي طفلك أنه لو احتاج حاجة ممكن يندهك وانتي هتسمعيه وممكن تجيله.

  •  كوني هادئة

طبعا وارد جدا أن الطفل يرفض بشدة التغيير ده ويبدأ يدخل في نوبة بكاء طويلة وقت النوم. مهم جدا أن الأم تحافظ علي هدوء أعصابها في الللحظات دي ومهم أنها متقدمش أي تنازل مثلا وتقوله خلاص أنهاردة أخر يوم نبدأ من بكرة تنام في سريرك لأن أي تنازل هيصعب الموضوع أكتر وهيخاليه أطول. لازم الطفل يحس أنه الأمر أنتهي ولازم الأم تحافظ علي هدوئها عشان الطفل ميدخلش معاها في تحدي.

  •  تجنبي أفلام الرعب

تجنبي أي شئ ممكن يخوف الطفل خصوصا قبل موعد النوم سواء أفلام كارتون أو كلام بينك وبين صديقتك ادام الطفل. تجنبي تخويف الطفل من الظلام بشكل عام وطبعا لازم الأب والأم نفسهم ميظهروش أي خوف ادام الطفل من الظلام أو الحشرات أو غيره لأنه لو ده حصل أدام الطفل هيفتح المجال لمخيلته.