في بعض الأحيان بتلاحظ الأم أن تصرفات ابنها تدل أنه مش واثق من نفسه ومحتاج دفعية قوية عشان تديله ثقة في نفسه. لو عاوزة تعرفي ازاي تخلي ابنك واثق من نفسه أو بمعني أصح ازاي تبني ثقة الطفل بنفسة اتبعي الخطوات التالية:

قللي من اصدار الأوامر المباشرة للطفل وحولي دايما تقدميله اختيارين يختار منهم يكونوا هما في الأساس مناسبينك وبلاش تزودي عن اختيارين خصوصا للسن الصغيرلأن ده بيزوده حيرة. ممكن تقوليله مثلا تحب تلبس التي شيرت الأحمر ولا الأزرق ويكون انتي معندكيش مانعي يلبس أي واحدة فيهم.

قاعدة أساسية ومهمة جدا في التربية أوعي تعملي لابنك أي حاجة يقدر يعملها لنفسه. لو بيقدر يأكل نفسه يبقي سيبيه يأكل نفسه لو بيقدر يلبس نفسه يبقي بلاش تساعديه يلبس نفسه لأن الطفل لما بيعمل حاجته بنفسه وكل أما قدرته علي ده بتزيد بيكتسب ثقة بنفسه.

بعض الأمهات والاباء طول الوقت ينتقدوا في تصرفات ولادهم وحاجات كتير منها بيكون ممكن التغاضي عنها توقفي عن النقد تماما لان ده بيهد ثقة الطفل بنفسه ولو في سلوك مش عاجبك يبقي ممكن تتكلمي معاه باحترام وتشوفوا ممكن نغير الوضع ازاي.

مهم جدا أن الطفل سواء بنت أو ولد يتعلم يساعد في شغل البيت يلم السفرة ويكنس أو يروق البيت وممكن كمان لو سنه مناسب ينشر الغسيل وطبعا ترتيب سريره ومكتبه دي من مهامه الأساسية. دي من العوامل المساعدة في ان الطفل يكتسب ثقة بنفسه لانه بيحس أن بيقدر يتصرف.

كل طفل يختلف عن الاخر زي ما كل أم مختلفة عن التانية وحتي الإخوات بيختلفواعن بعض من العوامل المدمرة لشخصية الطفل هي المقارنة سواء مع اخواته أو أقاربه أو أصحابه. توقفي عن النقد وعلمي طفل يبص علي نفسه ويقارن نفسه انهاردة بامبارح انهاردة بقي بيعمل حاجة مكانش بيعرف يعملها من شهر مثلا وهكذا.

الأم دايما مشغولة في مسئوليات كتير بتبقي عليها وممكن وسط المشاغل اليومية تنسي تقعد مع أطفالها بشكل منفرد. مهم جدا أنك تحاولي تخصصي لكل طفل وقت يقعد فيه لوحده معاكي تتكلموا فيه أو تلونوا مع بعض أو تخرجوا مع بعض مثلا…

الضرب والإهانة والزعيق هيأثر بالسلب علي ثقة الطفل بنفسه
انعدام ثقة الطفل بنفسه ممكن يؤدي لمشاكل سلوكية وتبول لا إاردي