اي عادة ممكن يكتسبها طفلك محتاجة وقت عشان تترسخ في ذهنه ويكون بيعملها بشكل تلقائي وعشان تنجحي تحققي النتيجة اللي ترضيكي محتاجة تاخدي بالك من شوية نقاط مهمة ومحتاجه يكون عندك شوية صبر وتمشي علي الخطوات الاتية :-

  • بدلي العقاب بالتفاهم

لو لقيتي ابنك بيلعب بحاجه ممكن تعوره او تأذيه ابدأي فهميه انه هيأذي نفسه بدال ما تعاقبيه من غير ما تفهميه لان العقاب هياثر بالسلب عليه وهيخليه فاهم انك متسلطة عليه وبتحرميه من كل حاجة خصوصا ان هو مش فاهم سبب حقيقي للعقاب ومش عارف انه بيعمل حاجة غلط وهيبدأ يعمل حاجه من اتنين

اما هيستخدم الحاجة دي من وراكي او هيخاف من استخدام اي حاجة ويبقي اعتماده الكامل عليكي طول حياته ومش هيعرف يعتمد علي نفسه ، ولازم تراعي وانتي بتشرحيله انك تكلميه باللغة اللي يفهمها من غيرتطويل في الشرح والكلام الكتير

  • اشرحيله السبب الحقيقي

لما تطلبي من ابنك يستأذن لأي سبب زي مثلا انه يفتح باب الشقة لحد أو يفتح باب غرفة أخواته أو غرفتك او يستخدم أغراض شخص تاني من الأسرة دايما وضحيلة السبب الحقيقي علي قد ماتقدري من غير ما تكذبي عليه أو تقوليله أسباب مش حقيقية زي ما كانوا بيسخدموا زمان اسلوب التخويف وشخصيات خيالية مفترضة ، لان لو ابنك اكتشف الكذب عمره ما هيصدقك تاني ودي كارثة لانك اكتر مصدر موثوق فيه بالنسباله وغالبا بتكوني مصدر الثقه الوحيد ليه وكمان هتعلميه الكذب

و لازم السبب يكون فعلا مقنع ليه متستقليش بعقل ابنك لانه بيكتشف الدنيا من حواليه وبيكون عنده نسبة ذكاء عالية جدا ، واسلوب التخويف هيأثر علي ابنك بالسلب وهتعوديه يخاف لانه بطبيعته كطفل مبيعرفش حاجة اسمها خوف ولما بتعوديه عليه بتكبر جواه زيادة عن اللزوم وبيخليه شخصية ضعيفة

  • اتعودي احيانا تستاذني منه

عشان تعودي ابنك علي انه يستاذن من غير مايحس انك بتتحكمي فيه زيادة عن اللزوم خليه يشوفك بتستاذني لان الطفل بيتربي بالحاجة اللي بيشوفها قدامه اكتر من اللي بتتقاله

وعودية قبل ماتنقلي اغراضه من مكانها لاي سبب انك بتعرفيه عشان يتعود ان هو كمان ليه خصوصيات غيره بيحترمها عشان يقدر يستوعب ازاي يحترم خصوصيات غيره وبالطريقة دي بتساعديه يحس انه ليه شخصية مستقلة ودايما هيحاول يعززها

  • عرفية انك بتحبيه وبتخافي عليه

لازم يكون في سبب في دماغ طفلك لردود افعالك او للنصايح اللي بتوجهيها ليه انتي اللي بترسخيها ، يعني مثلا لو ابنك اتعود ان ردود افعالك معاه انك بتزعقيله دايما او بتضربيه هو مش هيفهم ان دا خوف عليه وهيفهم انك بتكرهيه ، او انه وحش عشان كدا انتي كتير بتكوني مضايقه منه

رسخي في دماغ ابنك من صغره انك بتحبيه وهتزعلي جدا لما بيعمل حاجة غلط او بيحصله حاجة وحشة ، وان انتي بتقدري تعرفي اي الحاجة اللي هتضره لانك كبيرة والكبير بيعرف اكتر لان الطفل احيانا مبيكنش فاهم سبب انك بتوجهيه دايما ،ساعتها هيستوعب ردود افعالك وهيتجاوب معاكي بشكل ملحوظ ، وهتربي ابنك علي انه بيعمل كل حاجة وهو فاهم السبب الحقيقي مش هيكون شخصية مهزوزة ولا بيعمل حاجة غير وهو مقتنع بيها

  • اللي يمشي عليكي يمشي عليه

احيانا كتير بنشوف ان الام مانعة تصرف للابن معين فالابن يروح للاب يعيط او يستعطفه فاالاب يسمح بيه ، ودا غلط جدا وبيهدم الاسلوب الصح في التربية ، والطفل بيترجم دة ان اللي منعة من التصرف كان متسلط عليه وممكن يترجمه انه مبيحبوش والشخص اللي سمحله بيه دة بيحبه وعادة الطفل هيتعود علي كده وهيكون صعب جدا يتعود علي اي عادة ايجابية ممكن يكتسبها