الطفل من عمر يوم لحد ست سنين مبيعرفش يعمل حاجه غير انه يلعب ويستكشف الدنيا من خلال اللعب بتاعته ، وطريقة لعبه بتكون شخصيته بمميزاتها وعيوبها لأن كتير من الامهات بيرتكبوا أخطاء بدون قصد بسبب عدم اختيار الألعاب المناسبة لاطفالهم ،وعشان تختاري الالعاب المناسبة لسن طفلك اتبعي الخطوات التالية:-

  • ابتعدي عن الألعاب البلاستيك

الألعاب البلاستيكية بتدي للطفل احساس مزيف بالأمان و مبتنميش الحواس بتاعته لانه مهما خبطها مش هتتكسر بسهولة و الالوان بتاعتها بتكون مزيفة ومش حقيقية ،لازم تكون الالعاب بأدوات طبيعية زي الخشب و الكرتون أو القماش أو الخيش أو الصوف عشان يتعلم ان اللعبة بتبوظ لو اتعامل معاها بعنف

وعشان لازم تكون واقعي مع الطفل لازم تكون اللعبة بدرجات اللون بتاعها زي لعبة مكعبات الخشب تكون بأكتر من درجة لأن الشجرة في الطبيعة ليها اكتر من لون

  • هاتيله لعب تكون بتخاطب حواسه

عشان اللعب بتكون كل حاجة في حياة الطفل لازم تكون بتنمي حواسه وممكن تكون بتخاطب اكتر من حاسة في وقت واحد مثال للعبة بتنمي الحواس” خمس أكياس من القماش اول واحدة فيها عيدان قرفة والتانيه فيها كزبرة ناشفة والتالتة يكون فيها كمون والرابعة يكون فيها قرنفل والخامسة يكون فيها زنجيل” وتحطهم في باسكت الحاجات دي على سبيل المثال ممكن تغيرهم باي حاجه تانية ، المهم ان الطفل يحاول يستكشفهم ويعرف هما ايه من خلال تركيزه علي الريحة

وتراعي ان الباسكت متكونش عليها رسومات ولا يكون عليها نقش والأكياس القماش تكون نفس الشكل عشان ميسبش الريحة ويركز مع الرسومات

مثال تاني للتركيز علي حاسة اللمس انك تجيب اكتر من ملمس “زي انك تجيبي كرات من الحرير والصوف والقطن وهو مغمض عينه يستكشف ملمس الكرات دي ويحط كل نوع في باسكت خاصة بيه

  • متفرقيش بين العاب الولد والعاب البنت

مفيش حاجة اسمها دي لعبة بنت ودي لعبة ولد الولد هيكون في يوم من الايام اب واخ وزوج ومن خلال لعبة بالعروسة واهتمامه بيها هيتعلم وهتغرسي جواه يحترم ويكون مسؤول عن البنت بصفة عامة

وكذلك بالنسبة لادوات المنزل لما تجيبيها لابنك هيتعلم يساعد في شغل البيت وان شغل البيت ده مش مكتوب علي البنت بس ،وكمان هيتعلم يكون نضيف ومنظم

وبالنسبة للبنت في امهات اول ما تلاقى بنتها بتلعب بشاكوش او بكورة او بعربية تمنعها وتقولها ان دي لعبة الأولاد وده غلط جدا لانها لما تمسك شاكوش وتعلب بيه هتتعلم تكون مسؤولة وكمان طريقة مسك الشاكوش والدق بيه هتقوي جهازها العصبي وهتكون بتعرف تعتمد على نفسها

  • ابتعدي عن الالعاب المتكلمة

لما تيجي تختاري ألعاب طفلك ابعدي تماما عن الالعاب اللي بتتكلم خصوصا لو ابنك لسه بيتعلم الكلام لان الالعاب دي هتتسبب أنه يتأخر في الكلام

ولأن اختيار الالعاب بتكون عشان تنمي مهارات الطفل وتخليه يتفاعل معاها ويكون عايز يعبر مش تسليه و تلهيه

  • هاتيله عرايس بيضه وسمره

وعشان تغرسي في طفلك مبدأ عدم التفريق العنصري اشتريله عرايس بألوان البشرة الطبيعية وابعدي عن العرايس اللي شكلها مبالغ فيها بمكياجها وبياضها الزائد
زي ماهتجبيله عرايس بيضه هاتيله عرايس سمره

  • سيبيه يلعب بأدوات التنظيف

لما ابنك او بنتك يمسك المقشة ويكون عايز ينضف معاكي بلاش تزعقيله وتبعديه ،ولما بيكون عايز يمسك حاجه ينقلها من مكانها بلاش تخوفيه انه يوقعها هو في الحالة دي بيكون بيلعب ومن خلال لعبة تقدري تعليمه يكون متعاون وياخد باله من الحاجة اللي في ايده

شجعيه بكلمة حلوة زي انك تقوليه برافو ياحبيبي انك عايز تساعدني بس بالراحة وانت بتحطها أو احمليها معاه

  • هاتيله العاب التحكم في الاخطاء

ضروري للطفل انه يتعلم يكتشف اخطائه بنفسه وفي العاب كتير بتساعدك علي كده زي الالعاب اللي بيكون فيها مكعبات والفرق بين المربع والتاني سم واحد والطفل لما يجي يرص المكعبات لو رص مكعب غلط البرج بيتهد

وده بيعلمه يتحكم في أخطائه وبيساعده علي التركيز وينمي مهاراته وضروري تسيبيه يكتشف أخطائه بنفسه من غير مساعده منك عشان تعوديه علي الاستقلال وأنه يعتمد على نفسه والعاب الpuzzle بتساعده علي كده

  • نصائــــح

بلاش تستهتري باي حاجة الطفل بيعملها حتى لو قاعد ع الرمل وبيملي جردل بيه لان دي حياته ولما تستهتري بيها و متديهاش حقها هيحس منك بالإهمال وهيطلع ضعيف الشخصيه
لما يكون طفلك بيعلب بحاجة حسسية بقيمته وانه بيعمل حاجة حلوة جدا عشان كل ما هتديله ثقة بنفسه كل ما هيحس بقيمته وهيتشجع دايما يكون عند ظنك فيه