لاحساس بالدوخه زي انك تشوف الحاجات حواليك كانها بتدور او بتتصاعد وتتهابط مع صداع خفيف بيؤدي احيانا للقئ اثناء المواصلات او السفر ودي من الحاجات اللي بيعاني منها بعض المسافرين او مستخدمي وسائل المواصلات بشكل عام خصوصا الاطفال والسيدات والحوامل وبالتالي بتعرضهم لمواقف محرجه اثناء السفر بتزعجهم .

حاول قبل السفر بمدة لا تقل عن تلت ساعات تمتنع عن الاكل خصوصا الوجبات الدسمه المليانة بالزيوت والدهون وان لزم الامر فحاول تاخد وجبات خفيفه جدا زي ثمرة فاكهه او زبادي ، شوربة الخ ..

حاول تتجنب القراءة اثناء السفر او المواصلات لانها من الحاجات اللي بتزود الشعور بالدوخه والقئ وبتساعد علي حدوثهم لان تسليط النظر علي نقطه محدده اثناء السفر بتزيد من المحفزات البصريه اللي بتؤدي الي تهيج الدماغ .

حاول تقعد جمب الشباك ويفضل الامامي جمب السائق وانظر للامام وكانك في حالة مراقبة للطريق ومنعطفاته وحركات المرور والاشارات ، اذا كنت في المقعد الخلفي فحاول تتابع حركة الطريق من الشبابيك الجانبيه ، لان من ضمن الاسباب الرئيسيه اللي بتسبب الشعور بالدوخه هي تضارب وتضاد الاشارات الحسيه اللي بتوصل للجسم والرسايل اللي بيستقبلها المخ عن طريق رؤية العين للعربية من الداخل في وضع سكون وعدم حركه وعلي العكس رؤية جهاز الاتزان في الاذن الداخليه ان الجسم في حالة حركة ، وعشان كده ثبيت النظر جوه العربية بيزيد الوضع سوء وبيزود من الاحساس بالقئ .

في بعض الادويه في الصيدليات مضاده للهستامين اللي بتساعد علي الوقاية او العلاج من القئ اثناء السفر زي

Meclizine
Bonine
Antivert
Dramamine
يجب مسبقا استشارة الطبيب لتجنب الاثار الجانبيه .

اثناء السفر او قبل السفر حاول متحطش برفيوم خصوصا لو ريحته قويه لانه بيساعد اكتر علي الشعور بالقئ
تجنب انك تقعد جمب حد من المدخنين اثناء السفر وان كنت مدخن فامتنع عن التدخين اثناء السفر
حاول متشتربش قهوه قبل السفر بمده لا تقل عن 6ساعات

لو عندك اختيار بين كذا وسيلة مواصلات فالقطر هيبقي افضل وسيلة مواصلات للأشخاص اللي بيعانوا من الدوخه والقئ اثناء السفر .

شرب كوب من الجنزبيل ممكن يستخدم كبديل للدواء ،خصوصا للحوامل والمرضي لانه ملوش اي اثار جانبيه ويعتبر من مضادات التقيؤ ،ومفيد للجسم عموما .
من ضمن الاعراض الجانبيه لادوية التقؤ والدوخه جفاف الفم واضطرابات الرؤيه والاحساس بالحاجه للنوم لذلك يحذر من تناول مثل هذه الادويه من قبل السائق
مضغ لبانه اثناء السفر هيقلل من شعورك بالقئ .