أغلب موبايلاتنا الان حديثة وثمنها غالى وقريبة الى قلوبنا لكن ممكن تحصل مشكلة وهي سقوط الموبايل في الماء داخل حوض او فى حمام او فى البحر او حمام سباحة او ممكن تنساه في جيب البنطلون واتغسل و السبب اهمال او هزار وبالطبع نزعل من الموقف ده ولازم نتصرف بسرعة لمحاولة انقاذ الموبايل من التلف بشكل كامل لذلك تابع النصائح والخطوات الهامة لإنقاذ الموبايل او اى جهاز تكنولوجى بعد سقوطه في المياه

  • إخراجه بأقصي سرعة من الماء

حاول بأقصى سرعة انقاذ جهازك وخرجه من الماء وحاول تمسحه بسرعة بأى قطعة قماشة جمبك عشان تمتص الميه او ممكن تستخدم هدومك المهم مياخدش وقت في الماء وتمسحه علطول

  • أخرج البطارية والخط و الميموري

اول حاجة تعملها بعد إخراجه من الماء وتنشيفه بقماشة إخراج البطارية منه حتى لو كان شغال يفصل ولو كان داخله خط (شريحة اتصال SIM ) او كارت ميمورى اخرجهم أيضا للمحافظة على الدوائر الكهربية للموبايل وتجنب ماس كهربائي ولو حاطط كوفر او ضهرية او مركب جاك السماعة للموبايل شيل اى حاجة لانها ممكن تمنع من دخول الهواء وفى حالة الموبلات التي لا تستطيع إخراج بطاريتها يمكنك الاكتفاء بغلق الموبايل فقط

  • مسح وتجفيف الموبايل

بعد إخراج البطارية وإزالة اى شيء في الموبايل جففه وامسح اى قطرات ميه عليه ممكن بمنديل او قطنة خصوصأ عند فتحات السماعة والشاحن ومكان البطارية واى منفذ اخر وحاول تركه في مكان دافىء وجاف ولكن تجنب وضعه في الشمس او تعرضه لهواء سخن ولو كان معاك كحول استخدمه لانه بيمتص بقية الميه وممكن تستخدم طبق به أرز مش مطبوخ تضع الموبايل محاط بالرز وتتركه لفترة ما حتى يمتص كل المياه والرطوبة

  • لو سقط الموبايل في المياه المالحة

لو كنت بتصيف او وقع منك الموبايل فى ماء مالح لازم بسرعه تقفل الموبايل وتشيل بطاريته وبعدين تغسله و تمسحه بمياه عذبة او مية عادية معدنية ونقية عشان تشيل الملح داخل الجهاز لانه الملح لو وصل للبورده يؤدى لتوصيل القطع ببعضها ويسبب تلف بشكل كامل وممكن تنفجر البطارية لإنه الملح موصل كهربي عالى .

  • نصائــــح

استني يوم على الاقل او يومين وبعدين حاول تشغل الموبايل ولاحظ لو كان فيه صوت غريب او شكل غريب
بلاش تفك الموبايل او تشيل قطعه لو كنت غير خبير به لانه ممكن يبوظ منك خالص
بلاش تستخدم مجفف الشعر لانه بيزود الرطوبة داخل الجهاز وممكن تضر الهاتف اكتر ما تنفعه
بلاش تدوس على اى زرار في الموبايل لانك ممكن تخلى الميه تنتشر داخل الجهاز بشكل أوسع
لا تضغط على الشاشة او الكوفر بتاع الموبايل لانك ممكن توصل المياه للداخل اكتر ويصعب إصلاحه
انصحك بالاستعانة بأحد أخصائي ومحترفين الصيانة او مركز الصيانة المعتمد حتي يتم فحصه بشكل كامل لانه هيتعامل بطريقة سليمة مع الجهاز وممكن ينقذ موبايلك من التلف
انصحك بعدم أخذ موبالك الى البحر او حمام السباحة او اى مكان به ماء كثير