حفظ القران من العبادات العظيمة وبتبقي أسهل لو كان ده في وقت الطفولة حيث أنه الحفظ في الصغر كالنقش علي الحجر وعشان كده أهالي كتير بيسعوا أنهم يحفظوا أولادهم وهما صغيريين لأنه بيصعب نسيانه مع الكبر. لو عاوزة تعرفي ازاي تعملي ابنك يحفظ قران اتبعي الخطوات دي:

  •  المصحف المعلم

الأطفال بيبقي عندهم قدرة هايلة علي الحفظ ممكن تشوفي بنفسك ازاي بيحفظوا أغاني الأفلام الكارتون وبالتالي ممكن تستخدمي نفس الطريقة دي وتشغلي لاولادك المصحف المعلم أثناء ما هما بيلعبوا أو بياكلوا أو في العربية مثلا. المهم في الخطوة دي أنك تثبتي علي سورة واحدة لحد ما أولادك يحفظوها وبعد كدة ممكن تنتقلي للسورة الي بعدها ودي أسهل طريقة لتحفيظ الأطفال.

  •  الشيخ المعلم

لو في امكانك أنك تشتركي لاولادك في دورات التحفيظ الي متاحة في المساجد ودي بتشجع الأطفال علي الحفظ لأن بيبقي فيه أطفال تانيين معاهم وبعض المساجد بتنظم مسابقات في نهاية كل مستوي وامتحان ودي من الحاجات الي بتشجع الأطفال أكتر علي الحفظ والمراجعة.

  •  التشجيع

لازم الطفل يلاقي تشجيع من الأسرة سواء من الأب والأم أو من الأهل والأقارب وحيس بمدي أهمية المجهود الي بيبذلة ويتم مدحه علي الحفظ والمواظبة وممكن كمان كل أما ينتهي من جزء تجيبي للطفل هدية.

  •  المشاركة

من الأساليب الي بعض الأسر لاقيتها ناجحة هي عمل حلقة قران منزلية الأسرة كلها تقرأ فيها ويسمعوا لبعض وده بدي فرصة للطفل يشوف القدوة في أهله وكمان روح الاجتماع مع الأسرة بتشجعه وبتحببه في الحفظ.