القراءة من المهارات الحياتية المهمة أنه الطفل يتعلمها من الطفولة. القراءة بتعلم الطفل ازاي يعلم نفسه أي موضوع هو حابب يتعمق فيه وازاي يبحث عن المعلومات غير أنه في مقولة بتقول “الذين يقرأون هم الذين يقودون”. لو عاوزة تعرفي ازاي تعلمي ابنك القراءة اتبعي الخطوات دي:

من الحاجات الي دايما ناس كتير بتقول أنها كانت السبب أنها تحب القراءة هي أنه كان في حد من الأهل دايما بيقرأ في البيت. جيبي كتب أو مجلات واقرئيها وحاسسي ولادك بمدي أهمية الكتب في حياتك.

في دراسة اتعملت في أمريكا لاقوا أنه في علاقة مباشرة بين وجود مكتبة كتب في البيت وبين فرصة نجاح الطفل أنه يدخل الجامعة وده بيدل علي أهمية وجود مكتبة ولو بسيطة في البيت. ممكن تروحي مع أولادك معرض الكتاب كل سنة وتختاروا كتب لمكتبة البيت تقرأ علي مدار العام.

لو طفلك لسه مش بيعرف يقرأ ممكن تبدائي معاه بدورة القاعدة النورانية. بعض الأمهات بتحضر الدورة بنفسها عشان تتعلم الطريقة دي وتستخدمها لتعليم ابنها القراءة. في كمان فيديوهات كتير علي الانترنت بتعمل الطفل القراءة عن طريق القاعدة النورانية. بتعتمد القاعدة النورانية علي تعليم الأطفال طريقة نطق الحروف كل حرف علي حدا الأول ومع كل علامات التشكيل من فتحة وكسرة وضمة وسكون وبعدين قراءة كل حرفين مع بعض وبعدين الكلمات المكونة من حروف أكتر.

ابدئي مع طفلك بقصص وكتب ومجلات جذابة زي مجلة ميكي الي حببت أجيال في القراءة. اختاروا الكتب مع بعض واختاروا حاجات مناسبة لسنه ومستواه في القراءة كل ما كان سنه أصغر كل ما كان عدد الكلمات الي موجود في الصفحة المفروض يبقي أقل.