متابعة وزن المولود الجديد من الحاجات الي بتشغل الأم الجديدة دايما لأن تجربة الرضاعة بتبقي جديدة عليها وعشان كدة من أكتر الأسئلة الشائعة عند الأمهات الجدد هو “هل طفلي شبع من الرضاعة” أو ” ازاي أعرف أن بنتي شبعت من الرضاعة ؟ ” في علامات وطرق عشان تقدري تحددي اذا كان طفلك بيرضع كويس ولا لاء

الطبيعي أن الطفل في أول لحظات الرضاعة بيكون بيرضع بسرعة وبعدين تبدأ تهدأ سرعة الرضاعة لأن اللبن بالفعل بدآ يوصله لكن لو طفلك استمر لفترة طويلة بيرضع بسرعة ده معناه أنه لبنك مش كفاية كمان لو الطفل بينام وهو بيرضع أو بيتوقف عن الرضاعة شواية ويرجع يكمل ده ممكن يكون معناه أنه اللبن مش كفاية أو أن الطفل انتهي من الرضاعة.

لو ركزتي كويس هتقدري تلاحظي حركة البلع الي الطفل بيعملها وهو بيرضع وممكن ساعات كمان يكون في صوت بسيط اثناء البلع وده بيدل أن طفلك بيرضع لكن لو مش بتشوفي ده، ممكن يبقي ده معناه أن اللبن قليل وانك محتاجة تهتمي بغذائك أكتر.

لو الطفل مش بيرضع كويس مش هيملي الحفاضة بتاعته وبالتالي لما تيجي تغيريله هتلاقي الحفاضة فاضية لكن لو طفلك بيحتاج يغير حفاضته ٤ مرات في اليوم بداية من عمر ٤ أيام ييقي هو بيرضع كويس.

الطبيعي أن أول كام يوم من ولادة الطفل الوزن مش بيزيد قوي بل ممكن ينقص والمفروض أنه الطفل بيرجع لنفس وزنه وقت الولادة لما يتم ١٠ أيام وده دليل أن كمية اللبن كويسة وأن الطفل بيرضع وبيشبع.

لو الطفل بيرضع كويس هيبقي لون البول الي في حفاضة ابنك فاتح جدا وممكن شفاف أما لو مش بيرضع كويس هيبقي مركز أكتر وهيبقي لونه شبيه بلون عصير التفاح.

أهم حاجة في الرضاعة أنك تهتمي بغذائك كويس لان ده أكتر حاجة بتضمن انتاج لبن لطفلك.
شرب المية من الأساسيات للرضاعة الكويسة اشربي كمية مية مناسبة علي مدار اليوم.