حلم الأوائل دايما هدف اي حد وخصوصا لو كان متفوق ، وهتقدري تحققيه بسهوله في المراحل التعليميه من الأبتدائيه الي الثانويه العامه ، ولكن الجامعه شئ مختلف تماما مهما ذاكرتي وأجتهدتي علشان توصلي للقبه زي ” نجيبه ” مش هتقدري ، لأن التعليم في الجامعه وتحقيقك هدف الأولي علي الدفعه صعب بس مش مستحيل وهتقدري تحققيه مع الخطوات الآتيه :

  • ذاكري الدروس قبل ما تتشرح

أتعودي من بدايه العام الدراسي بعد ما تشتري الكتب الخاصه بالمواد ، أنك تبدأي تذاكري دروسك قبل ما تتشرح وقت المحاضره ودا هيساعدك بشكل كبير أنك تتابعي شرح دكتور الماده الخاص بيكي ، الي جانب أنك هتفتحي طرق ومناقشات كتيره معاه ودا هيساعدك تبقي معروفه أنك متفوقه عند الدكتور ، ودايما حاولي تسبقي بدرسين أو ثلاثه ..

  • أتدربي علي صياغه ورقه الأجوبه

لازم تتبدأي قبل أمتحانات الميدترم تتدربي علي صياغه ورقه الأجوبه وطريقه ترتيبها وأنها تظهر بأفضل صوره ممكنه وبدون أي أوساخ فيها ، لأن دا عليه درجات كتيره وهيخليكي مميزه عن بقيه الدفعه ..

  • راجعي أمتحانات الأعوام السابقه

أبداي بعد مذاكره كل درس عندك أنك تراجعي أمتحانات أخر خمس أعوام ، لأن الأسئله في الجامعه بتكرر بشكل كبير بس بأسلوب مختلف أو بطلب أمثله مختلفه .. فراجعي الدروس مع امتحانات الأعوام السابقه وشوفي موجود فيها أسئله ولا لا تخص اللي ذاكرتيه ..

  • ذاكري من كتب الأساتذه

بلاش تلجأي أطلاقا للمراجع والملازم الخاصه بموادك الدراسيه ، وذاكري كل دروسك من كتب الأستاذ الخاص بالماده وأكتبي في ورقه الأجابه نفس الكلام المذكور في كتابه الخاص ، لأن دا بيحسسه أنك فاهمه كويس وتعبتي في المذاكره وبيقدر يفرق بسهوله بين ورقه الأجوبه من كتابه ومن الملازم والمخلصات ..

  • نصائــــح

أحضري جميع المحاضرات وأفهمي كويس تفكير أستاذ الماده وتكتبي بنفس أسلوبه .
كوني صداقات مع الطلبه وخليكي محبوبه وليكي شعبيه كويسه ..