ازاى أنظم وقتى فى 10 خطوات

أكبر مشكلة بتواجهنا فى يومنا هو عدم قدرتنا على تنظيم الوقت بشكل سليم نقدر من خلاله ننجز أكثر ونزود الإنتاجية بتاعتنا عدم قدرتك على تنظيم وقتك بيعرضك لتراكم المسؤوليات والأعمال اللى محتاج تنجزها فى وقت صغير بالتالى بتتعرض لضغط عصبى ونفسى نتيجة عدم قدرتك على انجاز كل المطلوب منك فى وقت صغير وده ممكن يسببلك حالة إكتئاب

10 خطوات لتنظيم الوقت

لو كل يوم بالليل قبل ما تنام كتبت فى ورقة هدف واحد عايز تحققه اليوم التالى هيبقى عندك شئ مُلزم ليك مجبر على تنفيذه خلال الـ 24 ساعة القادمة ويفضل انك تربطه بوقت معين فى يومك بمعنى إنك تحدد ليه عدد ساعات معينة تنفذه فيها وده هيساعدك تلزم عقلك بالتركيز التام خلال الوقت اللى انت حددته لنفسك قبل ما تنام .

حاول تنفذ التاسكات الأهم الأول وهى التاسكات اللى لو إتاخرت او متنفذتش هيترتب عليها مشاكل فى شغلك او فى حياتك الشخصية لأن هى دى التاسكات اللى محتاجة تاخد الجزء الأكبر من يومك ثم يليها التاسكات الأقل أهمية وهى التاسكات اللى بتقود لتاسكات اخرى بمعنى انها تاسكات روتينية مش مرتبطة بميعاد تسليم

أكثر شئ ممكن يضيعلك وقتك هو المفاجأت اللى بتطرئ على يومك زى ان حد من صحابك يعرض عليك الخروج معاه او ان حد يحكيلك على حاجة وتقرر انك تبحث عنها عشان تعرف تفاصيل أكثر او انك تسمع عن عرض فيلم جديد على التلفزيون فتقرر تسيب التاسكات اللى وراك وتقعد تتفرج عليه إلى أخره حاول دايماً تقول لا للمفاجأت الغير متوقعة واللى مكنتش عامل حسابها فى الجدول بتاعك أو تعارضت بشكل مباشر مع مواعيد تنفيذ التاسكات بتاعتك .

بمجرد ما تبدئ تنفذ أى تاسك من التاسكات اللى وراك حاول تبعد عن أى مصدر تشتيت سواء كان شخص أو شئ لو شغلك على الإنترنت بمجرد ما تبدئ تنفيذ التاسك اللى وراك اقفل كل الصفحات اللى مش محتاجها واقفل الفيس بوك واى مصدر من مصادر التواصل مع الناس لحد ما تنتهى من التاسك اللى وراك حاول تبعد عن التلفزيون او أى نقاش بيدور حواليك عشان متضطرش تبقى جزء منه غصب عنك وتضيع وقتك .

على عكس الإعتقاد الخاطئ اللى بيقول انك عشان تقدر تنتج أكثر محتاج تفضل صاحى أطول وقت ممكن لأن اللى بيحصل هو إن عقلك بيبتدى يفقد تركيزه وجسمك فقط هو اللى بيفضل صاحى بالتالى مبتقدرش تخلص التاسكات اللى وراك فى الوقت المحدد ليها

عشان كده ينصح دائماً تنام ما بين 6 لـ 8 ساعات يومياً عشان جسمك وعقلك يكونوا فى حالة تركيز تام ساعة ما تبدأ تنفذ التاسك اللى وراك

فى بعض الأحيان بنتعطل بسبب تركيزنا المبالغ فيه فى التفاصيل ومحاولة اتمام التاسك بشكل مثالى وده بيؤدى إننا نتوقف أمام التفاصيل لفترات طويلة والتاسك اللى كان متوقعله 60 دقيقة بياخد 120 دقيقة وأحياناً أكثر .

أهم حاجة فى عملية تنظيم الوقت هو التركيز على اتمام التاسك بشكل صحيح مش شكل مثالى لأن فى نهاية اليوم اللى هتتوقف عنده هو تنفيذك للتاسك من عدمه .

لو شغلك مرتبط بالتصميم أو بالكتابة أو بالطبخ أو التدريس حاول تحوله لعادة يومية بمعنى إنك تلزم نفسك بفعلها بشكل يومى لحد ما تعتاد عليها وتبقى جزء من يومك

على سبيل المثال لو بتكتب مقالات حاول تلزم نفسك بكتابة عدد ثابت من المقالات اسبوعياً بغض النظر عن اى طارئ ممكن يطرئ عليك خلال الأسبوع ده لو قدرت تلزم نفسك بكتابة على سبيل المثال 10 مقالات اسبوعياً لمدة 3 أسابيع هيتحول تاسك الكتابة إلى عادة يومية سهل تنفيذها بدون شعور بالتعب أو بالإرهاق

متتسرعش وتخرج من تاسك لتاسك أو من عمل لعمل عشان تكسب وقت ده هيفقدك الحماس بسرعة وهيخليك تشعر بالملل والتعب

عشان كده حاول تعمل حاجة مختلفة ما بين التاسكات على سبيل المثال :-

مشاهدة التلفزيون
تصفح الإنترنت
إسمع موسيقى
إقرأ كتاب جديد
عشان تقدر تفصل ما بين التاسكات وبعضها بشكل يخليك تقدر تكمل اللى وراك .

ازاى أنظم وقتى فى 10 خطوات

ازاى أنظم وقتى فى 10 خطوات

أحياناً بيبقى صعب نركز في تنفيذ بعض التاسكات بسبب اننا بنحب نختلط بالناس الى حوالينا ونشارك في النقاشات الدايرة حوالينا لو إنت من النوع ده يبقى لازم تحبس نفسك لوقت محدد يومياً تدخل غرفة وتخلى حد من اسرك يقفل عليك بالمفتاح ويفتحلك بعد وقت محدد

وابعد عن أي مصدر تشتيت او أي عذر ممكن تختلقه عشان متلتزمش بتنفيذ اللى وراك وحاول تخلص اللى وراك خلال المدة اللى انت محبوس فيها هتلاقى انتاجيتك زادت بشكل كبير

لو فكرت في كل اللى وراك مرة واحدة مش هتعمل أي حاجة وهتحس بضغط نفسى وعصبى هيخليك مشتت وغير قادر على العمل .

قسم اللى وراك لمراحل حسب الأولوية والأهمية ومتفكرش غير فيه ولما تخلصه هتحس انك ارتحت من الضغط النفسى اللى كان عليك وهتبدأ تنجز أكثر مع الوقت .