الصلاة من الأولويات المهمة جدا في حياتنا ولكن بنقابل ناس كتير بتقول انها مش عارفة تنتظم في الصلاة وبيكون عندهم مبررات وأسباب اللي بتخليهم يقولوا الكلام ده وايا كانت الاسباب ،دي شوية خطوات بسيطة ممكن تساعد علي الانتظام في الصلاة:-

 

كتير من الناس عندهم رغبة في الانتظام في الصلاة ولكن مبيفكروش نفسهم عن سبب الرغبة دي ولما بيتسألوا بيكون الرد انه عشان فرض او عشان خوف من النار ،وده مش كافي للانتظام في الصلاة فلو عايز تنتظم في الصلاة لازم تحبها وعشان تحبها لازم تعرف سبب تشريعها

في تجربة اتعملت علي دماغ الإنسان بعد الصلاة وكانت النتيجة أن بعد الصلاة بخشوع وتأني مراكز الانفعال بتهدي وبتنشط مراكز الراحة والسكينة والتركيز، وده سبب ان الصلاة 5 مرات عشان تعمل توازن للإنسان على مدار اليوم عشان يقدر يكمل يومه بشكل صحيح ويواجه المشاكل والصعوبات ويتعامل مع الناس بشكل اهدي ، وده هيخليه يتجنب مشاكل كتير كانت ممكن تحصل بسهولة

وده بيدل علي احتياج الإنسان للصلاة وسبب فرضها مش سببها تكليف زائد علي الإنسان بالعكس ده عشان يخفف باقي عبء اليوم وضغوط الحياة

والصلاة بتساعد علي تنظيم الوقت وسبب خلق الله للإنسان هو إعمار الأرض ومن الصعب جدا يعرف يعمر ويشتغل وينجز وهو مبيعرفش ينظم وقته ويرتب أولوياته

بعد ماعرفت سبب تشريعها وبدأت تحفز نفسك جه وقت انك تاخد نية علي المواظبة عليها وجعلها من أولويات يومك

دايما بنلاقي شخص بيقول انا هصلي من اول بكره زي بالظبط اللي بيقول هذاكر من اول السنه الجايه ،اول خطوة لازم تعملها اول ما تاخد النية هي أنك تصلي من أول أذان يجي عليك، بمعني ان لو العشاء أذنت تروح تصليها حتى لو مصلتش باقي اليوم

وقبل ماتنام لو نويت تصحي لصلاة الفجر هتلاقي نفسك بتصحي اول ما الاذان يقول الله أكبر وده لانك لو أخذت النية صح ربنا يقويك عليها

وممكن تاخد نية الصلاة لحل مشاكلك او تساعدك تنجح أو تصلح من اخلاقك وواحده واحده اول ما تاخد علي الصلاة وتكون عادة بالنسبالك هتحبها ومش هاتقدر تستغني عنها لانك هتكون لمست كل الفوايد اللي بتعود عليك منها وهتزود حبك لربنا لأنه شرعها عليك

عشان تقوي نفسك وتفكرها دايما انك عايز تصلي اطلب من ربنا يساعدك علي الانتظام، وكتر الدعاء بيفكر عقلك دايما وبيخليها قاعدة ثابتة عنده وهيخليها في اول اولوياته و هيبدا ينفذها

خصص مكان هادئ مريح للاعصاب وافرش فيه مصليه متشلهاش وخلي ده مكان الصلاة بتاعك، ومكان بتلجأ ليه كل ما تكون مضايق وتتوضي وتصلي الفرض اللي عليك،و مع الاعتياد علي المكان ده هاتحس بالراحة النفسية وتغير مودك ،وهتبدا تتعود كمان تقيم الليل فيه ، وكل ما الاذان ياذن هتكون حابب تروح عشان تصلي

لما تكون على طول متوضي مش هتكسل تقوم تصلي اول ما الاذان يأذن حتى لو عندك شغل كتير وخايف انك ماتخلصوش

ربنا سبحانه لما شرع الصلوات شرع مع كل صلاة وقتها الخاص بيها،و التشريع ده مش هباء ومن أسباب التشريع ده انه بيعمل توازن لليوم كامل بحيث ميعديش وقت كبير الا وانت مفرغ شحنتك من اللي فات وبتبدا من جديد سواء كانت شحنات غضب أو غل أو كره أو إحساس بالظلم او تعب كل ما هتصلي هتبدا من جديد وهتفكر بشكل أفضل وهاتهدي وتوصل للحل الصح لو مش لاقي حل لموضوع تعبك من التفكير

عشان كده اول ماتسمع الاذان خليك سريع في الاستجابة وتقوم تصلي لان ده كمان هيساعدك في الانتظام وعدم الكسل الا لو عندك مانع قوي جدا ممكن تستني شويه لحد ماتقدر تصلي في أقرب وقت ممكن

كل شخص فينا عنده شخص في حياته بيعزه جدا مينفعش يسمعه بينادي عليه أو بيرن الموبايل وميردش عليه ، وعشان تتحفز ومتفوتش فرض من الصلوات اول ماتسمع الاذان يجي في بالك ان ربنا سبحانه وتعالي بينادي عليك وتخيل انه بينادي عليك ومش عايز منك حاجه بالعكس ده عايز يديك حاجه حلوة جدا ،وبيسمحلك تتكلم معاه وتطلب منه كل اللي انت عايزه، وكمان هيعاقبك لو مرحتلوش لانك هاتضيع علي نفسك فرصة كويسة جدا غيرك كتير بيتمني يرجع للدنيا عشان يعملها ولو خمس دقايق

الصلاة هي الحبل اللي بينك وبين ربنا متخليهوش حبل مقطوع عشان دايما تفضل حياتك مستقيمة
مفيش اي مبررات لعدم الصلاة او عدم الانتظام فيها لان دايما في بديل زي الصلاة القصر للمسافر والصلاة بالعين للمرض الملازم للفراش
لو خليت الصلاة من أولوياتك دايما هتلاقي مخرج للمبررات اللي كانت بتمنعك قبل كده انك تكون منتظم فيها