فكرتي اكتر من مرة تغيري لون شعرك وتحسي باي تجديد لكن كسلتي بسبب الوقت والمجهود والفلوس اللي بتحتاجيها عشان تقدري تصبغي شعرك في اي صالون متخصص ، علي الرغم من ان صبغ الشعر في البيت مش بيحتاج اكتر من ساعة بالكتير وتكلفة بسيطة جدا ، عشان كده في المقال ده هنقولك ازاي تصبغي شعرك في البيت بسهوله خطوة بخطوة .

قبل الصبغة هتحتاجي لشوية تحضيرات بسيطة زي انك تحطي فازلين حولين الوجه والرقبة قبل جذور الشعر عشان تتجنبي تصبغ الجلد بلون الصبغة .

البسي جونتيات في ايدك ، وحضري قالب بلاستيكي مش بتسخدميه عشان تخلطي فيه الصبغة ،والبسي مريلة للصبغة او حضري قطعة من القماش تحطيها علي ظهرك ولبسك عشان تحافظي علي لبسك من الصبغة ، اشتري فرشاة للصبغة من اي صيدلية او محل مستحضرات تجميل .

اختاري العبوة المناسبة علي حسب طول وكثافة شعرك لو كان شعرك من النوع القصير في الغالب هتحتاجي عبوة واحده ، لو كان شعرك اطول من الكتف في الغالب هتحتاجي عبوتين ، لو كان شعرك اطول من كدة في الغالب هتحتاجي من 3-4 عبوات .

افتحي عبوة الاول واستخدميها ولما تخلص افتحي التانية وهكذا ، الطريقة دي الامثل عشان تتجنبي يفيض صبغة بدون ما تستعمليها .

من المهم انك تتاكدي ان الشعر خالي من اي طبقة من الزيوت او الكريمات والاتربة اللي بتعمل كعازل بين الشعر والصبغة وبالتالي بتاثر علي نتيجتها .

لو غسلتي شعرك قبل الصبغة من المهم انك تنشفي الشعر كويس بالفوطة او بالاستشوار بحيث تتاكدي ان الشعر جاف تماما ونظيف والافضل تسبيه ينشف لمدة 24 ساعة ، في حالة تاكدك من عدم وجود اي زيوت او كريمات علي شعرك تقدري تستخدمي الصبغة بدون ما تغسلي شعرك .

قسمي شعرك لاربع اجزاء متساوية عن طريق فلق الشعر بخط طولي وعرضي ، واربطي ال3 اجزاء اللي مش هتبدئي بيهم الصبغة ببنس او توك مشبك ، وابدئي قسمي الربع اللي هتبدئي بيه لخصل رفيعة بالعرض ، الافضل تبدئي الصبغة بالنص الخلفي من الشعر عشان الصبغة بتقعد عليه وقت اطول فتتجنبي ان اللون يكون افتح في مقدمة الشعر ،

البسي الجوانتي واخلطي كلا من كريم الصبغة والمظهر علي بعض كويس بالفرشاة في القالب البلاستيكي

ابدئي افردي الصبغة علي الخصل الرفيعة ، لو اول مرة تصبغي شعرك سيبي من 2-3 سم من الجذور وارجعي اصبغيهم في الاخر لان الجذور بتمتص الصبغة بشكل اسرع وبالتالي هتتسبب ان الصبغة هتكون افتح من منطقة الجذور وعشان تتجنبي ده سيبي مسافة 2 سم…

لو كنتي صبغتي شعرك قبل كده ابتدتي اصبغي من الجذور وانزلي للاطراف لان في الحالة دي الاطراف هتكون فاتحة والجذور اللي اغمق فالصبغة محتاجة تقعد علي الجذور وقت اطول عشان تحصل علي لون موحد فالافضل تبتدي بالجذور بعدين تنزلي علي الاطراف .

اتاكدي كويس انك غطيتي كامل الشعر بالصبغة خصوصا لو الشعر بيه خصل بيضاء ، بعد ما تفردي الصبغة علي شعرك بالكامل سرحي كل شعرك بالمشط عشان الصبغة تتوزع كويس علي كامل اجزاء الشعر

اغسلي شعرك بالماية الفاترة فقط لغاية لما تتاكدي ان معظم الصبغة نزلت من الشعر ، بعدها اغسلي بالبلسم عشان ينعم ويرطب الشعر من الجفاف اللي بتسببه الصبغة للشعر ، وحاولي تتجنبي استخدام الشامبو في الوقت ده .

عشان تقدري تحافظي علي لون الصبغة لامع وشعر ناعم حاولي تقللي الفترة اللي بعدها من استخدام الشامبو اثناء الاستحمام واستبدليه بالبلسم اوبحمام الكريم .

جزء كبير من البنات بيروحوا لاي صالون مخصوص بسبب ان الشعر الغامق بيبقي من الصعب تلقط فيه الصبغه ، عشان كده هنقولك بيها الطرق اللي تقدري بيها تصبغي شعرك الغامق من البيت…

في طريقة شائعة وهي سحب اللون الاول عن طريق توزيع بودرة التفتيح او الاكسجين علي جميع اجزاء الشعر فبيبدا الشعر ياخد اللون الدهبي او الاشقر وتبدأي تصبغيه باللون اللي تحبيه لكن الطريقة دي ليها عيوب كبيرة جدا لان بودرة التفتيح بتدمر الشعر لانها عبارة عن مواد كيميائية قوية بتدمر الشعر الناعم .

حاليا في بعض الصبغات المخصصة للشعر الاسود من لوريال وبعض الانواع التانية ، اسالي الدكتور الصيدلي علي الصبغات المخصصة للشعر الاسود واختاري اللون المناسب ليكي .

او استخدمي لون افتح من اللون اللي عايزه تصبغية بدرجتين وتضيفي كمية من بودرة التفتيح علي الصبغة فهي طريقة امنة اكتر من بودرة التفتيح لوحدها لكن مش دايما بتدي النتيجة المطلوبة .

لو شعرك ضعيف وجاف ومقصف الافضل انك متعرضهوش لاي صبغات لان بيها مواد كميائية اكتر ضرر للشعر هتسبب تلف وتدمير وضعف اكبر للشعر هيسبب تساقطة وتقصفه ، الافضل تعالجيه وتهتمي بيه وتستخدمي الحناء بديل للضبغة ، لان الحناء طبيعية ومفيدة ومغذية للشعر ، الحناء الوانها محدودة ومش هتديكي نفس الدرجات اللي عايزاها بالظبط من الصبغة لكن مش هتضر بشعرك في حالة ان شعرك ضعيف ومجهد .

بعد ما تخلصي فرد الصبغة علي كامل الشعر اغسلي الشعر بعد الوقت المحدد علي العبوة سواء من 30 ل 45 دقيقة
اهتمي بعمل حمامات زيوت وكريمات باستمرار عشان تتجنبي جفاف الشعر بعد الصبغة .
تجنبي صبغ الشعر باستمرار .
استبدلي الصبغات بالحنا الطبيعية .