حكاية الحواديت للطفل مش مجرد تسلية او حكاية بيسمعها وينساها ولا مجرد اداة من ادوات النوم للطفل ,الحدوتة حياة تانية بيعشها ويتعايش جواها الطفل وبتمثله مبادئ واشخاص بيقلدهم وحيوانات وأشجار وحاجات جديدة بيتعرف عليها ,وعشان تقدر تفيد الطفل بكل فوائد الحكايات والطفل يكون مستمتع لازم تعرفي الطريقة الصح عشان تحكي الحدوته, وعشان تعرفي الطريقة الصح اتبعي الخطوات التالية:-

  •  راعي درجة استيعاب الطفل

مينفعش نحدد الحكايات علي حسب عمر الطفل لان المهم هو قدرة الطفل علي الاستيعاب ,وممكن يقدر يستوعب الطفل من بداية سن ال٣سنين ويفهم المناقشات وأحداث القصة

  •  اختاري القصص المليئة بالصور

في بداية عمر الطفل الصح تختاريله القصص اللي مليانه صور واللي فيها كلام قليل لان في العمر ده بيتعلم الطفل من الصور وعشان يقدر يتعرف على الاشياء واحداث القصة ابدأي اشرحيله الغلاف بيتكلم عن أيه

وتخليه يخمن الأحداث من خلال الصور عشان تشوقية للقصة قبل ما تحكيها عڜان يكون متحمس يسمعها “مثلا تقوليله تفتكر الاسد ده عمل ايه وليه زعلان او تفتكر البنت دي زعلانة ولا فرحانة ولو هي زعلانة تفتكر ايه اللي زعلها وده علي سبيل المثال “وعلى أساس الصور اللي علي الغلاف عشان تسبيله مساحة للتخيل وأنه يتكلم ويعبر وممكن من خلال الكلام ده يعبر عن حاجة جواه تكونى مش عارفاها

وتبدأي تكلمي الطفل عن اللي كاتب الكتاب وعن المواهب زي انك تعرفه ان اللي رسم الرسومات دي حد بيحب يرسم واللي كتب القصة عرفيه اسمه وحاولي تفهميه ان دي موهبه تانيه وهكذا وممكن تزودي او تقللي من أحداث القصة زي مانتي عايزه مڜ لازم يكون زي القصة بالظبط لو شايفه ان ابنك مش هيقدر يستوعب جزء معين من القصة

  •  خديه فى حضنك وانت بتحكيله

عشان تربط ابنك يحب القراءة وترتبط معاه بذكريات حلوه اقريله الحكاية وهو في حضنك عشان كل ما يفتكر القراية يفتكر الدفء والامان اللى كان بيحس بيهم وانتي بتحكيله

  •  ماتحوليش القصة لموعظة

متحاوليش توجهي لابنك الانتقادات من خلال القصة أو تفضلي تقوليله في نصايح وتحولي القصه مواعظ وكلام كتير عن الصح والغلط في شخصية ابنك سيبيه يستنتج ده من خلال القصة وسيبه يستمتع بيها ويستمتع انه بيسمعها منك

  •  احكيله القصة في مكان مفتوح

عشان توصلي لابنك معلومة كامة من خلال القصة حاولي تربطي ما بين الطبيعة وحوار الحدوته زي مثلا لو الحدوتة فيها حوار عن النباتات حاولي توريله النبات ده وانتي بتحكيله وتعرفيه بيتزرع ازاي لو امكن و ليه بنشرب الزرع ,الطفل هيستمتع بالقصة جدا وهيتعلم منها كتير وكمان هتكوني بتحببيه في القراءة

  •  اقترح الحلول لمشاكل الحدوتة

لو الحدوته فيها حد غلط زي مثلا لو القصة بتتكلم عن تعلب واغلب القصص اللي بتتكلم عن التعلب بتتكلم عن مكره ودهائه مسموحلك ساعتها تقترحي علي طفلك تصرفات صح كان ممكن يعملها التعلب عشان ميقعش في الأخطاء اللي وقع فيها

وممكن تقترحي عليه حلول يعملها اللي وقع في مكر التعلب عشان لما الشخص يقابل حد مكار يتعامل معاه بطريقة صحيحة عشان يتجنب شره وبالطريقة دي هتكوني بتفتحي عقله بالتفكير وبتنمي ذكائه

  •  ابتعدي عن الشخصيات الخرافية

بلاش نحكي للطفل حواديت عن شخصيات خرافية ونتوه الطفل ونبعده عن الواقع عشان بالطريقة دي بنشوهله تفكيره وبيكون مش قادر يجمع الأفكار بطريقة صحيحة في عقله ودايما الشخصيات الخيالية بتخلينا نربط الخير بشخصيات لازم يكون عنده قدرات خارقة عشان يعمله فهيكون صعب يستوعب ان الخير ممكن يطلع من اي شخص عادي

  • نصائــــح

الحواديت كنز نقدر نوصل بيه معلومة للطفل بطريقة ناجحة جدا و ممتعة بدون ملل بلاش نضيعها أو نستهتر بيها
الحواديت مش مجرد كلام بنقراه للاطفال دي فرصة للمناقشة كبيرة جدا مع الطفل تخليه يعبر عن مشاعره وعن خياله وتخليه مرتبط بييك فركز وانت بتحكيها لطفلك