الوضوء هو الفرض الأساسي للصلاة وطهارة البدن بتنعكس بالايجاب علي طهارة القلب وعلي سلوك الإنسان مع نفسه ومع الاشخاص اللي بيتعامل معاهم وبتاثر علي حالته النفسية وهدوئه وبالتالي بتحافظ علي اتزانه وتفكيره طول اليوم وعشان نستقيد بكل الفوائد دي يكون الوضوء صحيح وعشان تتوضي بطريقة صحيحة اتبع الخطوات التالية :

  •  إتخذ النية

فرائض الوضوء 6 اولهم أخذ النية ,مينفعش تروح تغسل وشك فتفتكر انك عايز تتوضأ فتكمل الوضوء على كده ,لازم تكون اخدت نية الوضوء للصلاة من قبل ما تبدا في اي خطوة من خطوات الوضوء

  •  اغسل وجهك متمسحوش

تاني فرض من فروض الوضوء هو غسل الوجه وكلمة وجه جايه من المواجهة يعني اللي بتواجه بيه الناس بمعنى انك لازم تغسل وجهك من اول منبت الشعر لحد أسفل الذقن ,ومن اول شحمة الاذن لحد شحمة الاذن التانيه , ولازم يكون الوجه مغسول كويس مينفعش تكون بتمس عليه شوية ميه صغيرين ممكن ميوصلوش للوجه بالكامل

  •  اغسل ايدك لحد المرفقين”الكوع”

تالت فرض من فرائض الوضوء هو غسل اليدين من اول أطراف الأصابع لحد الكوع , لازم تاخد بالك وتغسله كويس جدا لان في ناس كتير بتستعجل ومبتغسلش ايدها كويس او مبتغسلهاش لحد الكوع وبالتالي صلاتهم بيكون فيها مشاكل لان الوضوء بيكون باطل

وفي بحث اتعمل في جامعة متشجن سنة 2006 بيؤكد أن غسل اليدين يمكن ان يساعد الناس في تحسين شعورهم تجاه سلوكيات غير أخلاقية ارتكبها في الماضي وده بيدل علي أهمية وسبب فرض غسل اليدين كفرض أساسي في الوضوء لأن الوضوء هدفه الأساسي هو تحسين سلوك الإنسان وهدوئه وتغير طباعه السيئة

  •  مسح جزء من راسك

رابع فرض من فروض الوضوء هو مسح جزء من الرأس وفي اختلاف بين العلماء بين مسح جزء من الرأس أو مسح الرأس كله ,ولكن اللي اتفقوا عليه أن مسح جزء من الرأس فرض ولكن مسح الرأس كله سنة عن النبي .

يعني المهم انك تمسح رأسك كويس ونبية ان ربنا يحميك ويحفظك ويبعد عنك الأفكار السلبية والسيئة عشان ربنا يغفرلك ويبعد عنك الوساوس

  •  امسح رجلك إلى الكعبين

خامس فرض من فروض الوضوء هي غسل الأرجل للكعبين

في كلمات في اللغة العربية الفصحى بتكون زي نفس الكلمات في اللغة العامية لكن بمعني مختلف ,وكلمة الكعبين المقصود بيها العظمتين اللي في كف الرجل من الجنب ومش كعب الرجل اللي بتدوس عليه لان اللي احنا بنقول عليه كعب الرجل ده اسمه في اللغة العربية الفصحى اسمها العقب

وفي ناس كتير جدا بتغلط وهي بتتوضأ وبتغسل رجليها لحد العقب بس والميه مبتوصلش لحد الكعبين ,شرط اساسي وانت بتغسل رجلك انك تغسلها والمية توصلها كلها مش مجرد مسح عليها

ولو انت في مكان ورجلك مش هتوصل لحد الحوض لازم تملي ايدك بالمية كويس وتغسلها بحيث المية توصلها كويس جدا

رجلك هي الطريقة اللي بتوصل بيها لكل حاجه عايز تعملها سواء كانت خير او شر وعشان كده هي فرض أساسي في الوضوء عشان لما تاخد نية تطهيرها من الذنوب قبل ما تقابل ربنا وتتجه للصلاة ربنا يغفرلك ذنوبك

  •  رتب خطوات الوضوء

سادس وآخر فرض من فروض الوضوء هو الترتيب بمعنى ترتيب فرائض الوضوء بنفس الترتيب اللي اتكلمنا عليه في الخطوات

ودي كانت فرائض الوضوء اللي من غيرها او لو اتعملت بطريقة غلط الوضوء هيكون باطل وبالتالي الصلاة كمان مش هتكون صحيحة . انما باقي خطوات الوضوء هي سنة عن النبي ولو حصل أي خطأ فيها بتكون الصلاة صحيحة

ويستحب انك تعملها لانها سنه عن النبي والخطوات دي هي

1-تسمية الله قبل الوضوء

2-غسل اليدين لحد الرسغ

ولو في اي حاجة في الايدين ومتسخة تحولت من سنة لفرض لازم تتغسل كويس

3-المضمضة والاستنشاق

الملايكة اللي بتحضر أثناء الصلاة بتنفر لو الشخص موجود في فمه بواقي او ريحة فمه مش كويس عشان كده كان الرسول بيوصي بالسواك قبل الصلاة

4-التدليك

تدليك الاعضاء أثناء غسلها من سنن النبي أثناء الوضوء ويستحب انك تعملها أثناء الوضوء لانها كمان بتنشط الدورة الدموية في الجسم

5-غسل الأذن

6-تخليل اللحية

غسل الوجه فرض من فرائض الوضوء لكن تخليل المياه في اللحية من سنن الوضوء

7-تخليل الأصابع

8-غسل الأعضاء 3 مرات ماعدا الرأس

غسل الأعضاء 3 مرات ماعدا الرأس مرة واحدة من سنن الوضوء لكن الفرض مرة واحدة

9-غسل الأسنان قبل الوضوء

10-البدء باليمين